Read lango Agege 29 Bible Online

Agege 29 - lango bible

Agege 29

¹Yakobo dok te medde i wottere naka i lobo a jo ame tye tuŋ kide.

²Kare ame en obedo neneno piny, oneno akoŋŋoro i dye bar, rommi onwoŋo tye obuto piny kuno i dul adek apapat i ŋet akoŋŋono, pien rommi rik mato pii kannono. Dog akoŋŋono rik onwoŋo ocego i twon gweŋŋoro.

³Kare i kare ka rommi doŋ ocokere kuno, okwat cokere te loro gweŋ oko i dog akoŋ, eka daŋ dok ote dwoko kakare ka rommi doŋ otyeko mato pii.

⁴Yakobo te kobbi jo a rik tye kuno ni, “Omegona, kara iya wunu i kwene?” Gin te gamo ni, “Wan oya i Karan.”

⁵Yakobo te penyogi ni, “Iŋeo wunu Laban wot a Nakor?” Gin te gamo ni, “Wan oŋee.”

⁶En dok te penyogi ni, “En tye aber?” Gin te gamo ni, “En gire tye aber. Neno nyare Lakeri ca bino i rommi ca!”

⁷En te kobo ni, “Kara ceŋ pwod tye do, caa mom ru oromo me coko lim akwo karacel. Mi wunu rommi mat pii me iwot ikwagi wunu doki.”

⁸Cite gin te dokke iye ni, “Pe otwero miyogi ituno ka lim akwo ocokere karacel, gweŋ daŋ doŋ ocoro oko teŋe i dog akoŋ, en amio ote miyogi mato pii.”

⁹A kun Yakobo pwod tye akop kedgi, Lakeri te pello kun okelo rommi a pappere, pien onwoŋo rik en a kwaogi.

¹⁰Yakobo ka oneno Lakeri nya nero mere Laban kede rommi a nero mere Laban, en owoto, te coro gweŋ oko i dog akoŋ, te miyo rommi pii mato.

¹¹Yakobo te noto lem Lakeri kun cunye yom atek.

¹²Yakobo te titti Lakeri ni en obedo omaro mere ikome, tottere Lebeka. Lakeri te riŋo paco wot kobbi pappere.

¹³Kare ame Laban owinyo pi atin aminnere, oriŋo te wot jole, okwako kore kun noto leme, eka te tere i ode. Yakobo te titti Laban kop luŋ ame otimere.

¹⁴Laban te kobbe ni, “Yin kom cogona kede riŋo koma!” En te bedo baŋe dwe acel.

¹⁵Laban te kobbi Yakobo ni, “Kadi yin ibedo okeona, myero iti baŋa aboŋo culloro? Yin myero ikobba gin ame imito ni kono amii pi ticci.”

¹⁶Laban onwoŋo tye anyira mere aryo, nyare adittere nyiŋe onwoŋo Lea, eka en atidi mere te bedo Lakeri.

¹⁷Lea rik nyako a waŋe obedo dimidimi, ento Lakeri onwoŋo mwonya atek meicel, ame ber me anena.

¹⁸Yakobo onwoŋo maro Lakeri, en omio en te kobbi Laban ni, “Abino tic mwaka abiro pi Lakeri nyari atidi.”

¹⁹Laban te gamo ni, “Bedo ber ka amie baŋi kato ame amie baŋ ŋattoro ocele; yin bed baŋa.”

²⁰Yakobo te tic mwakki abiro pi Lakeri, ento mwakki-nono luŋ obedo kom aduno aduna i baŋ Yakobo pien en rik onwoŋo maro Lakeri atek.

²¹Yakobo te doŋ kobbi Laban ni, “Mia ba doŋ dakona me abed kede, pien kare a rik omoko doŋ otum oko,”

²²Laban te tedo arama, te lwoŋo iye jo luŋ a rik tye i kabedo-nono.

²³Otyeno en te kelo nyare Lea baŋ Yakobo, Yakobo te cako buta kede acalo cege.

²⁴Laban te daŋ miyo aŋeca mere Jilpa baŋ nyare Lea, me kony Lea.

²⁵Cite odiko ka piny oru, Yakobo onwoŋo ni dok elunyo nyomere i Lea. Omio en te penyo Laban ni, “Kara omio dok itima aman kono? An rik mom onwoŋo abedo tic gira pi Lakeri? Ibwola kara piŋo, nera?”

²⁶Laban ogamo ni, “Turwa kan mom otimo amannono. Mom ogeo miyo nyako atidi nyomere kun en adwoŋ adoŋ i ot.

²⁷Yin koŋ ityek cabit me nyomerewu-ni oko, ate dok bino miyo Lakeri daŋ baŋi pi tic ame ibino tiyo pi mwakki abiro ocele.”

²⁸Yakobo daŋ te ye tyeko cabit acel me nyomeregi, eka Laban te miye dok nyomo Lakeri.

²⁹Te miyo aŋeca mere Bila baŋ Lakeri, me kony Lakeri.

³⁰Yakobo te cako buta daŋ i Lakeri acalo cege kun maro Lakeri kato Lea. En dok te medde tic pi mwakki abiro ocele.

³¹Ka Rwot oneno ni Lea mom omaro, oyabo ot nyodo mere kun Lakeri pwod oraŋa.

³²Lea oyac eka te nywalo atin awobi, te cako nyiŋe Reuben, kun kobo ni, “Pien Rwot oneno canna, man doŋ bino miyo cwara mara.”

³³En dok te yac, te nywalo atin awobi, te cako nyiŋe Cimeon, kun kobo ni, “Pien Rwot owinyo ni an odaga, omio en dok omedo miya atin-ni.”

³⁴Dok te medo yac, te nywalo atin awobi, te kobo ni, “Aa, man doŋ bino miyo cwara dwogo i koma, pien doŋ anywale awobe odoko adek twal.” Omio en te cako nyiŋ atinnono ni Levi,

³⁵Dok te medo yac te nywalo atin awobi, te kobo ni, “Man doŋ abino pako Rwot.” Omio en te cako nyiŋ atinnono ni Juda. I ŋe man, en koŋ dok te cuŋ oko.