Read lango Agege 3 Bible Online

Agege 3 - lango bible

Agege 3

¹Twol rik onwoŋo ryek ame okato leyi ducu ame Rwot Obaŋa otio. En openyo dako ni, “Mom Obaŋa okobo ni kur icam wunu yattoro ame tye i poto?”

²Dako okobbi twol ni, “Otwero camo nyig yen ducu i poto-ni,

³cite Obaŋa okobo ni kur ocam nyig yat i dye poto, kur ogud kome, me kur oto.”

⁴Twol te kobbi dako ni, “Pe ibino to wunu gire,

⁵Obaŋa ŋeo ni ka icamo wunu, waŋwu bino yabere, ibino doko wunu calo Obaŋa kun iŋeo poko wunu gin aber kede gin arac.”

⁶Ka dako oneno ni yattono ber me acama, dok kao waŋ, dok yattono mitte, pien mio dano doko ryek, opwono nyige, te camo; te miyo mogo baŋ cware, te camo.

⁷Gin aryo ducu waŋgi te yabere oko, ote ŋeyo ni otye onoro; gin te kwoyo pot olam karacel me aruka i pyergi.

⁸Tuŋ otyeno ame piny okwe, gin te winyo dwon Rwot Obaŋa kun woto i poto, eka dano kede dako mere te pono oko i nyim Rwot Obaŋa i akina yen ame tye i poto.

⁹Rwot Obaŋa te lwoŋo dano kun kobbe ni, “Itye kwene?”

¹⁰En te gamo ni, “Awinyi ka iwoto i poto, lworo te maka, pien atye gira onoro, ate pono gira oko.”

¹¹Dok te penye ni, “Ŋa okobbi ni itye onoro? Icamo ce yat ame aciki ni kur icam?”

¹²Dano te gamo ni, “Dako ame imio ni bed keda, en omia nyig yat, ate camo.”

¹³Rwot Obaŋa te penyo dako ni, “Man ŋo ame yin, itimo-ni?” Dako te gamo ni, “Twol obwola, ate camo.”

¹⁴Rwot Obaŋa te kobbi twol ni, “Pien itimo tim man, oceni akato i akina leyi ducu me paco, kede i akina leyi ducu me tim. Ibino mol kede yii, dok ibino camo apua nino ducu me kwoni,

¹⁵Abino keto amone i akina yin kede dako, kede i akina ikwai kede ikwae. Akware bino goyo wii, yin ibino toŋo opuny tyene.”

¹⁶Baŋ dako te kobo ni, “Abino medo rem i kom atek kare me yac; ibino nywalo itino kede rem. Ento mitti bino bedo tye i kom cwari, dok en bino loyi.”

¹⁷Baŋ Adam[1] te kobo ni, “Pien yin iwinyo kop a cegi, icamo nying yat ame an aciki in kur icam, oceno lobo, oko piri; ibino camo gin ame ya iye kede aroma nino ducu me kwoni.

¹⁸Bino nyayo okuto kede ocokocok, ibino camo pot dek me tim.

¹⁹Ibino camo kwon pi kwok olworo nyim, ituno ka idok i lobo, pien akwanyi iye. Yin apua, ibino dok iyi apua.”

²⁰Dano te cako nyiŋ dako mere ni Kawa, pien en tota a jo ducu ame kwo.

²¹Rwot Obaŋa te yiko lao, te miyo Adam kede cege me aruka.

²²Rwot Obaŋa te kobo ni, “Nen, dano doŋ odoko cal kedwa, kun ŋeo poko gin aber kede gin arac. Aman doŋ pe dok omi rye ciŋe pwon nyig yat me kwo, ocam, mio doŋ bino perakino atwal.”

²³Man omio Rwot Obaŋa oryeme oko i poto i Eden, me wot puro lobo ame rik okwanye iye.

²⁴En oryemo dano oko; te keto okerubi kede pala romo ame lyel mac, wirre tuŋŋi kede tuŋŋi, i yo tuŋ kide me poto Eden, me gwoko yo ame woto i yat me kwo.