Read lango Agege 30 Bible Online

Agege 30 - lango bible

Agege 30

¹Ka Lakeri oneno ni mom enywalo atinnoro baŋ Yakobo, nyeko ocako make i kom aminnere. En te kobbi Yakobo ni, “Mia an daŋ itino, ce ka mom itwero miya itino, an adeye gira oko.”

²Yakobo yie te waŋ oko i kome, te kobo ni, “An adoko Obaŋa bo? Obaŋa gire en ame ogeŋi nywal.”

³Lakeri te kobo ni “Kara po aŋecana Bila eneo, yin doŋ donnye me en nywal atinnoro i coŋa, me atot ya an daŋ anwoŋ itino pire.”

⁴En te miyo aŋeca mere Bila baŋ Yakobo, te gamo acalo cege.

⁵Bila oyac, te nywalli Yakobo atin awobi.

⁶Lakeri te kobo ni, “Obaŋa doŋ otyeko ŋolo kop aber baŋa, owinyo daŋ kwacca, omia atin awobi.” En te cako nyiŋe ni Dan.

⁷Bila, aŋeca a Lakeri dok te yac, te nywalli Yakobo atin awobi.

⁸Lakeri te kobo ni, “Aromo atek meicel wan aminna, ento doŋ aloc.” Omio en te cako nyiŋ atinnono ni Naputali.

⁹Ka Lea doŋ oneno ni etyeko cuŋ doŋ oko, kun mom dok enywalo atinnoro, en daŋ omio aŋeca mere Jilpa baŋ Yakobo wek bed cege.

¹⁰Aŋeca a Lea daŋ te nywalli Yakobo atin awobi.

¹¹Lea te kobo ni, “An yora i gum ba.” Omio en te cako nyiŋ atinnono ni Gad.

¹²Jilpa aŋeca a Lea dok te nywalli Yakobo atin awobi me aryo.

¹³Lea te kobo ni, “An winyona tye, pien mon bino lwoŋa ni, A kome iwinyo!” Omio en te cako nyiŋ atinnono ni Acer.

¹⁴I kare me kayo ŋano, Reuben owoto i poto te nwoŋo iye yat nyodo te kwanyo kelo baŋ tottere Lea. Lakeri te kobbi Lea ni, “Ama nyeka, duta ba yat nyodo a wodi aduno.”

¹⁵Ento Lea te dokke ni, “Cwara ame imao-nono mom doŋ rommi? Imito dok tero daŋ yat nyodo a woda?” Lakeri ogamo ni, “Aco ka amanno ba, en tin doŋ bino buto baŋi dyewor me imia yat a wodi.”

¹⁶Otyeno ame Yakobo onwoŋo tye abino kun oya i poto, Lea owoto ojole i waŋa yo, te kobbe ni, “Myero tin yin doŋ idony i oda, pien atyeko wili oko i yat nyodo a woda.” Yakobo te buta baŋ Lea dyeworrono.

¹⁷Obaŋa owinyo kwac a Lea, omio oyac, te nywalli Yakobo atin awobi me abiccere.

¹⁸Lea te kobo ni, “Obaŋa doŋ oculo waŋ miyo aŋecana baŋ cwara oko.” Omio en te cako nyiŋ atinnono ni Icakar.

¹⁹Lea te dok yac, te nywalli Yakobo atin me abicellere.

²⁰Lea te kobo ni, “Obaŋa doŋ omia mot aber i nyomere, aman doŋ cwara bino mara, pien doŋ onywalo otino abicel twal wan kede.” Omio en te cako nyiŋ atinnono ni Jabulon.

²¹Icennere dok te nywalo nyare, te cako nyiŋe ni Dina.

²²Obaŋa te dok cako paro pi Lakeri, te winyo kwaccere, te yabo ot nyodo mere.

²³Lakeri te yac, te nywalo atin awobi, te kobo ni, “Obaŋa doŋ otyeko kwanyo lewic i koma,”

²⁴En te cako nyiŋ atinnono ni Yucepu, kun kobo ni, “Myero Obaŋa omedda dok atin awobi ocele.”

²⁵A doŋ Lakeri onywalo Yucepu oko, Yakobo okobbi Laban ni, “Amito doŋ iweka adok i lobowa.

²⁶Mia monna kede itinona ame an atio pirgi atia baŋi, me iweka doŋ awoti; pien yin iŋeo kit ame atio kede baŋi.”

²⁷Laban te gamo ni, “Ka ce ber an ikobo, atyeko tyeto aniaŋ ateni ni Rwot omia winyo piri.

²⁸Doŋ ba, yin myero ititta gin ame imito ami baŋi me ocarani, an abino miyi.”

²⁹Yakobo odokke ni, “Yin ikomi iŋeo kite ame atio kede baŋi, kite ame agwoko kede limmi

³⁰Limmi rik nok atek, koŋ inen kite ame doŋ omedde kede wok; Rwot obedo miyi winyo kannoro luŋ ame an alokere iye. Kara doŋ aman an abino nwoŋo lim pi jona awene?”

³¹Laban te penye ni, “Kara doŋ myero amii ŋo ba?” Yakobo te gamo ni, “Ginnoro ame yin ibino miya mom tye; ento ka ce iye, mia dok amedde kwayo limmi.

³²Yeya tin abebea i dye limmi akwo luŋ, ayer rommi luŋ agiragira onyo en apecel, kede itino rommi acollege, karacel kede dyegi luŋ ame obedo agiragira onyo en apecel; magi-nono bino bedo me ocarana.

³³Kittono, cil a cunya bino nen icen ka ce yin ibino ŋiyo ocarana. Dyelloro ame ibino nwoŋo tye baŋa ame mom agiragira onyo apecel kede romo moro a mom col, gin luŋ ibino tero ni akwalo akwala.”

³⁴Laban te kobo ni, “Koŋ doŋ bed kit ame ikobo-nono.”

³⁵I ninonono Laban te yero nyogi dyegi luŋ ame obedo agiragira onyo apecel, kede akale dyegi luŋ agiragira onyo apecel, dyegi luŋ ame tye kede tonnoro atar i komgi; kede itino rommi luŋ acol, te miyogi baŋ awobe mere,

³⁶te daŋ poko akinagi oko i Yakobo kun borrere romo wot me nino adek twal. Yakobo doŋ te kwayo lim ame adoŋ baŋ Laban.

³⁷Yakobo te jako jaŋ yago kede yao, kede ogali, te liliŋo kun dadano pokgi, weko kome kan atar doŋ olaŋara.

³⁸En te pyelo jaŋ yen elilino-nono i nyim rommi kede dyegi i weer ame pii mol iye, ame lim akwo mato iye pii, pien nyogi kwaro en a monnege ka gin abino mato pii.

³⁹Megi dyegi kede megi rommi ame okwaro i nyim jaŋ yen aliŋalina-nono, jo-nono nywalo itino agiragira onyo apecel kede aliŋaliŋa.

⁴⁰Yakobo te poko itino rommi-ni pat. En te leleko megi dyegi kede megi rommi dwoko i mea Laban agiragira.

⁴¹Kare luŋ ka nyogi dyegi kede rommi atekkege kwaro megi dyegi kede megi rommi, Yakobo wie mom wil iketo jaŋ yennere ame aliŋaliŋa ca, i pii ame amol i nyimgi, me gin yac i akina jaŋ yennerenono.

⁴²Ento en mom keto jaŋ yennerenono i nyim en agorogoro mege; mannono te miyo en agorogoro mege bedo mea Laban, cite en a komgi yot te bedo mea Yakobo.

⁴³Mannono te miyo Yakobo doko twon alonyo moro a mom kobere, kun odurre i lim akwo, aŋeca, opii, inaga kede kane.