Read lango Agege 31 Bible Online

Agege 31 - lango bible

Agege 31

¹Yakobo te bedo winyo awobe a Laban kun kobo ni, “Yakobo doŋ omao lim a papa wa luŋ, aman en doŋ odoko twon alonyo moro a mom kobere kede lim a papawa.”

²Yakobo te neno Laban mom dok nene i waŋ aber bala a yam con,

³Rwot te kobbi Yakobo ni, “Dok doŋ i lobo a kwariwu, baŋ jowu, an abino bedo kedi.”

⁴Yakobo te lwoŋo Lakeri kede Lea i bar kan a limmere tye iye.

⁵Te kobbigi ni, “An doŋ aneno ni papawu mom dok nena i waŋ aber bala a yam con, cite Obaŋa a papawa obedo gwoka gira.

⁶Wun daŋ iŋeo wunu kite ame abedo tic kede baŋ papawu kede tek koma luŋ,

⁷ento kadi amannono, en obedo bwola abwola kun loloko ocara me ticca tyen apar twal, cite Obaŋa mom oye en timo ginnoro arac i koma.

⁸Ka ce en okobo ni, ‘Lim akwo luŋ aliŋaliŋa bino bedo megi’, gin luŋ onywalo aliŋaliŋa. Ka en dok oloko doge ni, ‘Rommi kede dyegi luŋ ame obino nywalo agiragira en ame bino bedo me ocarani’, gin luŋ dok onywalo en agiragira keken.

⁹I yore-nono Obaŋa okwanyo lim i ciŋ papawu oko te miyo baŋa.

¹⁰I kare ame rik nyogi tye akwaro megi dyegi kede megi rommi, atiŋo waŋa malo i waŋ lek ate neno nyogi ame atepo obedo agiragira, kede aliŋaliŋa kede apecel.

¹¹Amalaika Obaŋa te lwoŋa i waŋ lek ni, ‘Yakobo’, an ate gamo ni, ‘An ene.’

¹²Eka te kobba ni, ‘Koŋ itir; waŋi inen nyogi ame atepo, gin luŋ obedo aliŋaliŋa, onyo apecel onyo agiragira, pien doŋ atyeko neno ginnoro ducu ame Laban tye ka timo i komi.

¹³An Obaŋa me Betel kan ame rik ionyo iye moo i wi kidi ca, eka ite daŋ kwoŋ baŋa. Amito iru ya oko i lobo-ni idok i lobo ame rik onywali iye’.”

¹⁴Lakeri kede Lea te gamo ni, “Tye dok dul limmoro i ot a papawa?

¹⁵Mom doŋ en nenowa acalo rok ocele? En doŋ otyeko catowa oko, dok daŋ tye acamo lim ame imie pirwa oko.

¹⁶Lim luŋ ame Obaŋa doŋ okwanyo oko baŋ papa wa doŋ megwa kede me itinowa. Doŋ pi mannono ba, gin ame Obaŋa okobo, en a myero doŋ itim.”

¹⁷Yakobo te ya keto awobe mere kede monnere i wi inaga,

¹⁸en te kolo limmere luŋ, kede jami mere ducu ame enwoŋo i Padan-aram, te cako wottere me dok baŋ pappere Icaka i lobo Kanaan.

¹⁹Kare ame Laban owoto mworo yer rommi mere, Lakeri okwalo jogi a pappere ducu i ot.

²⁰Yakobo obwolo Laban kun mom otitte pi wottere.

²¹Mannono omio en olwi oko i jami mere luŋ, te wot ŋolo kulo Efurate, kun dok tutuŋ kidi me Gilead.

²²A doŋ nino okato adek twal, ote titti Laban ni, “Yakobo olwi owoto gire oko.”

²³Laban te mukere i wati mere luŋ, oryemo yorgi niŋa abiro, eka ote nwoŋe i kidi me Gilead.

²⁴Cite dyewor Obaŋa te bino baŋ Laban, dano me Aram, i wan lek, te kobbe ni, “Gwokere kur iwot ikob ginnoro baŋ Yakobo.”

²⁵Laban rik te mako Yakobo iyo. En onwoŋo Yakobo doŋ oguro kema mere i akina kiddi, cite Laban kede wati mere te guro megi i wi kidi me Gilead.

²⁶Laban te penyo Yakobo ni, “Kara piŋo itima kit man ba? Ibwola kit-ti, ite tiŋo anyirana kede jamina lwi kedgi bala imaogi i mony?

²⁷Ŋo kara okeli lwi i muŋ kun mom ititta? Aco kono onwoŋo rik atwero ciki i yomcuny kun owero wer ajaa kede naŋa opuk.

²⁸Ŋo kara omoni miya ciko anyirana kun anoto lemgi kede me itinogi? Itimo tim me miŋo meicel.

²⁹Onwoŋo atwero timi lit, cite Obaŋa a pappi okobo keda tin iwor ni, ‘Gwokere kur iwot ikob kopporo baŋ Yakobo.’

³⁰Nen ba, kadi bed yin iya oko me wot pi paro dok i ot a pappi, piŋo kara dok ikwalo cal jogina?”

³¹Yakobo ogamo dog Laban ni, “An onwoŋo abedo kede lworo, pien rik an atamo ni yin ibino mayo anyirani oko i baŋa.

³²Doŋ ba, ŋat ame ibino nwoŋo cal jogini i akina jami mere, mom bino bedo kwo. Yin nyut giri moro ame tye baŋa i nyim jowa kan, me ikwany giri.” Yakobo onwoŋo mom ŋeo ni Lakeri okwalo cal jogi.

³³Laban te donyo i kema a Yakobo, kede mea Lea kede mea mon aŋeca aryo luŋ, cite mom naka onwoŋo cal jogi mere. En te ya i kema a Lea te donyo i mea Lakeri.

³⁴I kare-nono onwoŋo Lakeri orwako cal jogi i te lao ame obedo kede i wi inaga ame onwoŋo obedo kede piny. Laban te ŋiŋio jami luŋ a tye i kema ento naka mom onwoŋogi iye.

³⁵Lakeri te kobbi pappere ni, “Adwoŋŋa, kur cunyi waŋ ba i koma, pien mom atwero ya malo i nyimi kun atwo twowa me mom.” Laban naka mom te nwoŋo cal jogi mere kadi bed oyenyo atek.

³⁶Yakobo te ŋo oko, te da i Laban kun penye ni, “Kara doŋ ane gin ame abalo? Abalo ŋo, en ame omio yin iryemo yora atek ateka-ni?

³⁷Yin doŋ iyenyo jamina luŋ, ka ce tye giri moro ame inwoŋo, kel iket i nyim joni kede jona, me gin ŋol kop i akina wan aryoni.

³⁸An atyeko baŋi mwakki pyeraryo, ento min romo onyo min dyelloro mom gire yie oony, mom daŋ amwodo nyok romoni moro kadi acel.

³⁹Limmi luŋ ame lee tim omwodo mom adwoggo baŋi, an en ame alunyo culo waŋe. Mom tye moro ame orwenyo dyeceŋ onyo dyewor ame mom ipenya pire.

⁴⁰Ceŋ rik ŋwaŋa dyeceŋ kede koyo daŋ ocira dyewor, nino daŋ obedo remma.

⁴¹Mwakki pyeraryo ame abedo kede i odi, atio baŋi mwakki apar wie aŋwen pi anyirani kede mwakki abicel pi lim, cite i mwakki-nono luŋ ibedo loloko ocarana oromo tyen apar twal.

⁴²Kono mom Obaŋa a kwarona, Obaŋa Iburaim, kede Obaŋa ame pappa Icaka lworo obedo keda, kono tin icwaa awoto turwa i ciŋa nono. Obaŋa oneno peko ame abeo iye kede tic ame atio gira i ciŋa, omio tin iwor en ojuki.”

⁴³Laban te gamo dog Yakobo ni, “Anyira mega, itinogi mega, lim luŋ mega, kede jami luŋ ame ineno-ni gin luŋ mega. Kara ŋo ame myero tin atim pi anyirana kede itinona?

⁴⁴Biye, me oket cikere moro i akinawa me bedo caden i akina wan kedi.”

⁴⁵Yakobo te tiŋo kidi cibo cun atira.

⁴⁶Yakobo te kobbi jo mere ni, “Cok wunu gweŋe.” Gin te depo gweŋe coko karacel, eka gin te cem i ŋet gweŋe ocoko karacellono.

⁴⁷Laban te cako nyiŋ kabedonono ni Jegar-cakaduta, ento Yakobo te cako mege ni, Gilead.

⁴⁸Laban te kobo ni, “Gweŋe ame ocoko karacel-li obedo caden i akina wan kedi.” Mannono en omio ocako nyiŋ kabedo-nono ni Gilead.

⁴⁹Kidi ame ocibo ocuŋ atira ocako nyiŋe ni Mijipa, pien okobo ni, “Rwot myero gwok kinwa, ka doŋ opokere oko.

⁵⁰Ka ce ibino wuno anyirana onyo ibino nyomo dok mon ocele dodo i komgi, kadi bed amanni ame cadennoro a dano mom i akinawa kan, ento Obaŋa bino bedo caden i akinawa.”

⁵¹Laban dok te kobbi Yakobo ni, “Nen gweŋ ame ocoko karacel-li kede man ocuŋ atira-ni ame otyeko keto i akina wan kedi.

⁵²Gweŋ ocoko-ni, kede kidi ocuŋ atira-ni, gin caden. An mom dok abino kato gweŋ ame ocokoni kede kidi ocuŋ atira-ni me bino baŋi, yin daŋ mom ibino kato gweŋ ame ocokere-ni me bino baŋa, me bino timo ginnoro arac.

⁵³Obaŋa Iburaim kede Obaŋa a Nakor kede Obaŋa a pappi obed aŋolkop i akinawa.” Yakobo te kwoŋ i nyiŋ Gat a rik pappere Icaka olworo.

⁵⁴Yakobo te ŋolo lee me yalo Obaŋa i wi kidi, te lwoŋo jo mere luŋ bino camo kede. Kare ame gin doŋ ocamo cem otum, gin te buta i kidi kuno dyeworrono.

⁵⁵A doŋ piny oru, Laban oya te noto lem ikwae kede me anyira mere, te lammigi winyo; te doŋ pokere kedgi dok paco tuŋe.