Read lango Agege 33 Bible Online

Agege 33 - lango bible

Agege 33

¹Yakobo otiŋo waŋe malo te neno Ecau tye abino i jo mere mia aŋwen. En te cako popoko itino mere baŋ Lea kede Lakeri, kede baŋ aŋeca mere aryo.

²Aŋeca mere aryo kede itinogi, en te cwayogi i nyim, Lea kede itino mere te lubogi, eka Lakeri kede wode Yucepu te doŋ coko tere,

³En ikome te ru yutte wot i nyim, i kare ame en doŋ ceggi ominnere, oryebere piny tyen abiro.

⁴Cite Ecau ocelo ŋwec, oriŋo me jole. Opoto i kome kun kwako kore, mako daŋ ŋute, eka te noto leme; gin luŋ ote cako koko.

⁵Ka Ecau dok otiŋo waŋe malo, oneno mon kede itinogi, te penyo Yakobo ni, “Maka kono jo mene abino cae?” En ogamo ni, “Magi-nono itino ame Obaŋa omio baŋ amironi pi kica mere.”

⁶Aŋeca aryo karacel itinogi ka otuno ceggi baŋgi, oryebere piny.

⁷Lea daŋ amannono, karacel kede itino mere, ka gin otuno aceggi, oryebere piny. Yucepu kede Lakeri, ame gin en onwoŋo doŋ ogiko te jo, gin daŋ ka otuno ceggi, oryebere piny.

⁸Ecau te penye ni, “Kara lwak jo ecipan ame abedo rwatte kedgi-ca te koppere ŋo?” Yakobo ogamo ni, “Gin-nono luŋ me yomoro cuny adwoŋŋa, wek en pwoa.”

⁹Ento Ecau te gamo ni, “Ominna, an atye i mega a romma, wek limmono luŋ bed gire megi.”

¹⁰Yakobo ogamo ni, “Pe amannono adwoŋŋa, tim ber igam mot ame an amii-ni ka ce ineno ni ayomoro cunyi, pien iyi ateni, cuny ame ijola kede-ni, omio ka aneno waŋi, rom aroma ame aneno waŋ Obaŋa.

¹¹Tim ber igam mot ame doŋ atyeko kelo oko baŋi, pien Obaŋa doŋ onyuto kica mere baŋa, dok daŋ atye i mega ame roma.” Yakobo te bedo diye atek i koppono tuno ka en oye, te gamo mottere-nono.

¹²Ecau doŋ te kobo ni, “Aco wek doŋ onywak wunu yo karacel kun an atelliwu yo.”

¹³Cite Yakobo te kobo ni, “Adwoŋŋa, yin iŋeo aber ni itino pwod tino, dok daŋ atye i rommi kede dok ame itinogi pwod dot; mano bino miyo ka amiogi owoto atek ateka kadi kono pi nino acel keken, gin bino ol te bino miyo limma luŋ to oko.

¹⁴Pi mannono, myero yin iwot itel nyim amironi, kun an alubo yori momot ame rommi lim kede itino wot aboŋo peko moro naka ka atuno baŋi i Ceir.”

¹⁵Ecau te gamo ni, “Wek koŋ aweki jo moro i akina jo ame abino kedginie”. Cite Yakobo te kobo ni, “Piŋo kara adwoŋŋa? Tim ber iwek koŋ doŋ abed amannono.”

¹⁶Ecau gire doŋ te cako wottere oko i nino-nono ikome, me dok i Ceir.

¹⁷Yakobo te wot dok tutuŋ Cukot, te gero ode pire kene kede kabuto a limmere. En omio nyiŋ kabedo-nono olwoŋo ni Cukot.

¹⁸Icennere Yakobo doŋ te tuno gire i kuc i boma me Cekem ame tye i Kanaan, kun onwoŋo oya i Paddan-aram. En te guro kema mere i nyim bomanono.

¹⁹Dul lobo ame en onwoŋo oguro iye kema mere-nono onwoŋo owilo ciliŋ ame romo mia i baŋ itino a Kamor, ame papa a Cekem.

²⁰En te cano keno me lam kuno, te cako nyiŋe ni El-Eloe-Icrael.