Read lango Agege 34 Bible Online

Agege 34 - lango bible

Agege 34

¹Dina nyaka a Lea ame onwoŋo onywalo gin kede Yakobo rik owoto limo monnogo me lobo-nono.

²Cekem wot a Kamor, dano me Kivi, ame onwoŋo aloc me lobo-nono, ka onene, omake te buto kede tetek, te miye lewic.

³Mittere i kom Dina nyaka a Yakobo omedde meicel, omio en te mare atek, te kop kede i mwolo meicel.

⁴Cekem te doŋ penyo pappere Kamor ni, “Nyomma nyako-ni bed cega.”

⁵Yakobo ka owinyo ni obalo nyare Dina, kun i kare-nono onwoŋo awobe mere tye akwat i bar. Yakobo odio cunye, oliŋ gire iti, naka waŋ ame awobe mere odwogo.

⁶Kamor papa a Cekem te wot baŋ Yakobo me wot penyo nyom.

⁷Awobe a Yakobo ka owinyo koppono, gin te dwogo oko i bar. Akemo onwoŋo omakogi atek miecel, pien timmono onwoŋo mom ber kadi acel me timere i akina Icrael; pi buto i nyaka a Yakobo. Kodi timmono mom ber me atima.

⁸Kamor te kop kedgi kun kobo ni, “Woda Cekem omaro nyarwu atek, tim wunu ber, iwek wunu en nyom nyarwu me bed cege,

⁹me wan onyomere kedwu. Miwa onyom anyirawu, me wun daŋ inyom wunu anyirawa.

¹⁰Bed wunu kedwa, kun ibedo wunu i lobo ame imito wunu. Bed wunu iye i kuc kun iwoto icato wunu iye wil, me inwoŋ wunu jami.”

¹¹Cekem daŋ te kobo baŋ papa a Dina kede omego mere ni, “Tima wunu ber i gin ame an atimo; yeya wunu anyom Dina, an abino culo jami luŋ ame ibino wunu ŋolo.

¹²Ŋol wunu gin ame imito wunu luŋ me nyom, kede me mot; an abino culo ducu, ento myero iye wunu anyom Dina bed cega.”

¹³Awobe a Yakobo te gamo dog Cekem kede pappere kun gin obwologi obwola, pien en onwoŋo obalo amingi Dina.

¹⁴Gin okobbigi ni, “Mannono gin ame wan mom oromo timo ginnoro iye, pien mom otwero miyo aminwa baŋ dano a mom oliro; mano twero kelliwa lewic.

¹⁵Tye gin acel keken ame ka otimere twero miyowa oye, ginnono ene, wun myero iye lirre wunu me idok wunu calo wan.

¹⁶Mano bino miyo wan omiowu anyirawa, wan daŋ obino nyomo anyirawu, dok daŋ obino bedo kedwu; ote doŋ doko rok acel.

¹⁷Aco ka wun ikwero wunu winyo kopwa, mom ilirre wunu, wan obino tero giwa nyarwa, ote ya wot oko.”

¹⁸Kopgi-nono te yomoro cuny Kamor karacel kede wode Cekem.

¹⁹Awobi-nu mom dok ogal, otio gin ame okobo i caa-nono cutu, pien nyaka a Yakobo onwoŋo oyomoro cunye okato kare. En onwoŋo rik dano ame omio kwogo adwoŋ meicel akato jo luŋ me ot a pappere.

²⁰Kamor kede wode Cekem owoto i dog bomagi te poro kop i jo me bomagi kun okobo ni,

²¹“Jo ame bedo kedwa aber, myero wan owek wunugi bed i lobowa, ocat wil iye, pien lobowa gire lac ame romogi; wek wan onyom anyiragi, wan daŋ omigi megwa.

²²Doŋ ba, tye kop acel keken ame twero miyo gin bino ye bedo kedwa, odoko rok acel kedwa, koppono ene: jowa luŋ a co myero lir del komgi me co bala gin.

²³Man mom bino miyo limgi, jamigi kede leyigi luŋ doko megwa? Wan myero oye wunu kopgi me gin bed kedwa.”

²⁴Jo luŋ ame rik beo i dog bomagi-nono oye kop a Kamor kede wode Cekem, eka co luŋ ame beo i dog boma-nono te lirre oko.

²⁵I nino me adekkere, ame doŋ bur a jo ame oliro okwok, Cimeon kede Levi, omego a Dina te mako pala me romogi, ote wot donyo i bomagi kun otuogi atua, ote neko co ducu.

²⁶Kamor kede wode Cekem daŋ ote neko oko i pala romo, ote kwanyo Dina oko i ot a Cekem tero oko.

²⁷Itino a Yakobo te bino i boma a jo ame oneko, ote yako jamigi pi balo amingi.

²⁸Oyako rommi, dok kede kane-gu luŋ kede ginnoro luŋ ame gin onwoŋo tye i boma kede i bar.

²⁹Abargi karacel kede itinogi kede mongi luŋ gin oyako oko, anaka jami ame onwoŋo tye i udigi, ote wot kede oko.

³⁰Yakobo te kobbi Cimeon kede Levi ni, “Wun doŋ ikelo wunu can oko i koma, ibalo wunu doŋ nyiŋa oko baŋ wegi lobo-ni, jo Kanaan kede jo Periji. Kit acalo an jona nok, ka gin bino notte karacel te cako lweny i koma, gin bino nekowa tyekowa oko.”

³¹Gin te dok iye ni, “Yin onwoŋo imito wan owekgi otim aminwa bala alaya?”