Read lango Agege 35 Bible Online

Agege 35 - lango bible

Agege 35

¹Obaŋa okobbi Yakobo ni, “Ya iwot ibed i Betel iyik keno lam kuno pira an Obaŋa ame rik anen baŋi i kare ame riŋo ominni Ecau.”

²Yakobo te kobbi jo ode kede jo luŋ ame bedo baŋe ni, “Bol wunu kit obaŋa luŋ ame obedo mea rok ocele, ilonyere wunu kenwu, ite loko wunu rukwu oko.

³Ya owot wunu i Betel, owot oyik wunu keno me lam kuno, pi Obaŋa ame rik ogamo doga i kare ame atye i can, dok obedo gwokowa i kabedo luŋ ame owoto iye.”

⁴Gin te miyo baŋ Yakobo kit obaŋa luŋ ame obedo mea rok ocele, ame onwoŋo tye baŋgi karacel kede atem luŋ me yitgi. Yakobo te yikogi i te kworo ame onwoŋo tye ceggi i Cekem.

⁵Kare ame gin tye iyo, lworo adwoŋ meicel ame oya i baŋ Obaŋa omakoboma luŋ ame onwoŋo doŋ ceggi kedgi, omio mom ote ryemo yo itino a Yakobo,

⁶Yakobo kede jo a rik tye baŋe luŋ te bino i Luj, ame en Betel, a rik tye i lobo Kanaan,

⁷te cano keno me lam kuno, eka te cako nyiŋ kabedonono ni El-betel[11]; pien kabedo-nono obedo kan ame rik Obaŋa onyutte gire kene baŋ Yakobo i kare ame en riŋo ominnere.

⁸Debora apidi a Lebeka te to oko, ote yike i te kworo ame tye tuŋ piny me Betel. Nyiŋ kabedonono ote cako ni Allon-bakut[12].

⁹Obaŋa dok omedo nyutte baŋ Yakobo i kare ame en oya i Padan-aram, te lamme gum.

¹⁰Obaŋa okobbe ni, “Nyiŋi Yakobo, ento mom dok obino lwoŋi ni Yakobo; nyiŋi doŋ bino bedo Icrael.”

¹¹Obaŋa okobbe ni, “An Obaŋa Won Twer Ducu. Nywal, inya, imedde; rok luŋ bino ya i komi, kede lwak rok ecipan, kede rwode adoŋodoŋo daŋ bino ya i komi.

¹²Lobo ame rik amio baŋ Iburaim kede baŋ Icaka abino miyo baŋi, abino miyo baŋ ikwai en lobo-nono.”

¹³Obaŋa te ya oko i baŋe i kabedo ame okobo kede iye-nono, te yito malo,

¹⁴Yakobo te cibo kidi cuŋ atira kan ame Obaŋa okobo kede iye-nono, te liyo gi-yalo Obaŋa me amata i kom kidi ame ecibonono, eka te onyo moo i kome.

¹⁵Yakobo te cako nyiŋ kabedo ame Obaŋa okobo kede iye-nono ni Betel.

¹⁶Gin te ya oko i Betel, medde i wot anyim; ame onwoŋo gin mom ru otuno Eparat, kun onwoŋo pwod bobor, rem me nywal te goyo Lakeri oko, nywallere te bedo atetek.

¹⁷Kare ame onwoŋo en tye alolle atek ateka i colle, dako ame onwoŋo acole te kobo ni, “Kur ilwor, pien amanni dok inwoŋo atin awobi ocele.”

¹⁸A doŋ kwo mere cegi tum (pien oto), ocako nyiŋe ni Benoni, ento pappere ocako ni Benjamin.

¹⁹Lakeri oto ote yiko iyo Eparat (ame en Beterekem).

²⁰Yakobo te cibo kidi cuŋ atira i wi lyellere, kidi ame ocuŋ atira i wi lyella Lakeri-nono pwod tye naka atot tin.

²¹Icrael te medde i wottere anyim, oguro ke ma mere i pem me Eder loka tuŋ ca.

²²Icrael te bedo i lobo-nono, Reuben te wot buto aŋeca a pappere Bila, Icrael te winyo timerenono oko. Awobe a Yakobo rik tye gin apar wie aryo.

²³Itino a Lea onwoŋo ene: Reuben ame obedo atin kao a Yakobo, Cimeon, Levi, Juda, Icakar kede Jabulon.

²⁴Aco mea Lakeri onwoŋo ene: Yucepu kede Benjamin,

²⁵Itino a Bila aŋeca a Lakeri ene: Dan kede Naputali.

²⁶Itino a Jilpa aŋeca a Lea te bedo ene: Gad kede Acer. Magi gin itino a Yakobo ame en onywalo i Paddan-aram.

²⁷Yakobo obino baŋ pappere Icaka ame rik onwoŋo bedo i Mamre, ame en Kiriat-arba kede Kebron, kan ame kwaro mere Iburaim kede Icaka yam obedo iye con,

²⁸Mwaka Icaka me dittere onwoŋo doŋ oromo mia acel kede pyeraboro

²⁹kwo Icaka te tum oko, en oto te wot nywako kabedo kede kwari mere, kun onwoŋo mwaka mere doŋ bup, a doŋ oteggo atek. Itino mere Ecau kede Yakobo te yiko kome.