Read lango Agege 37 Bible Online

Agege 37 - lango bible

Agege 37

¹Yakobo obedo i lobo Kanaan, i lobo ame yam pappere koŋ obedo iye-ni,

²Man en kop i kom ikwae a Yakobo. Kare ame Yucepu doŋ oromo mwaka apar wie abiro me dittere onwoŋo rik en doŋ kwao lim karacel kede omego mere. En obedo karacel itino awobe a Bila kede Jilpa, ame gin onwoŋo mon a-pappere; Yucepu rik te dotogi baŋ papagi,

³Icrael onwoŋo maro Yucepu atek kato itino ocele luŋ; pien onywale kun en doŋ oti, te kwoye boŋo abor, dok bade daŋ boco.

⁴Omego mere ka oneno ni papagi maro Yucepu katogi oko, gin te cako dage oko; cakere i kare-nono mom doŋ ote kop kede i kuc.

⁵Kare ame Yucepu oleko lek, en otito baŋ omego mere, omego mere doŋ te medde ameda i dage.

⁶En okobbigi ni, “Winy wunu koŋ kit lek ame aleko:

⁷aleko ni onwoŋo otye i poto otweyo ŋano ame okwao, arita ŋanona te ya malo cuŋ atira; arita ŋanowu te cokere gure dyere, eka ote ryebere piny me woro aritana.”

⁸Omego mere te gamo ni, “Yin ibino loyowa ateni? Yin en a doŋ ibino bedo adwoŋ ame loowa?” Gin doŋ te medde dage atek ateka pi lekkere-nono kede pi koppere.

⁹Yucepu dok te medo leko lek ocele, te daŋ tito baŋ omego mere, kun kobo ni, “Jo-ni omegona, dok aleko lek ocele. Aleko ni ceŋ kede dwe kede acer apar wie acel obedo ryebere piny i nyima.”

¹⁰Kare ame en otito lek man baŋ pappere kede baŋ omego mere, pappere ocoke, te juke atek ateka kun kobbe ni, “Kodi lek aŋo ame ileko amannono-nono. Yin itamo ni an kede totti kede omegoni obino bino ote ryebere piny i nyimi?”

¹¹Nyeko te mako omego mere atek meicel i kome, ento pappere te kano kop mano luŋ i cunye.

¹²Kare ame omego mere onwoŋo owoto kwayo lim a papagi i ŋet Cekem.

¹³Icrael okobbi Yucepu ni, “Omegoni mom tye akwat ceggi i Cekem? Biye me aori baŋgi.” En ogamo doge ni, “An ene, adwoŋ.”

¹⁴Pappere te kobbe ni, “Wot koŋ inen ka omegoni kede lim tye aber, me ite dwoggo an kop.” En te cwaye ya i luŋ me Kebron, te wot naka i Cekem.

¹⁵Lonnoro te nwoŋo Yucepu tye awiwira atata i dye bar, te penye ni, “Yin kara iyenyo ŋo?”

¹⁶En ogamo ni, “Ayenyo omegona. Tim ber ba ititta kan ame gin tye akwat iye.”

¹⁷Lonnono te kobbe ni, “Gin doŋ otyeko ya oko i kan, pien awinyo ka gin kobo ni, ‘Owot wunu naka i Docan.’ ” Yucepu te cako wopo yorgi, te nwoŋogi i Docan.

¹⁸Kare ame gin onene i kannabor, kun onwoŋo en mom ru otuno ceggi baŋgi, gin te cako yiko kop me neke oko,

¹⁹kun okobo ni, “Won lek ca bino ca.

²⁰Biye wunu me tin oneke wunu oko, obole wunu i burroro kan, wan obino kobo ni, ‘Lee moro me tim en omake, te mwode oko’, me koŋ onen kit ame lekkere bino cobere kede.”

²¹Kare ame Reuben owinyo yikgi-nono, olare oko i ciŋgi, kun en kobbigi ni, “Mom ber wan ikomwa ikwanyo kwo mere.”

²²Reuben dok te kobbigi ni, “Pe myero wan oony remo mere kadi acel, ento obole wunu i bur ame tye kan-ni; myero ciŋwa kur gude kadi acel.” En onwoŋo oyikere me kwanyo oko i ciŋgi, wek edwok baŋ pappere.

²³Kare ame Yucepu otuno baŋ omego mere, gin opoto i kome, ote gonyo koti mere oko i kome, koti ame onwoŋo en oruko abor dok bade daŋ boco.

²⁴Gin omake ote tere wot bole i bur. Burrono onwoŋo yie tye nono, pii pe iye.

²⁵Gin gigi doŋ te bedo piny cem. I kare ame gin otiŋo waŋgi malo, ote neno jo Icmael ame oya i Gilead, karacel kede inaga ecipan ame otino odok, moo yat ecoma, kede murra, kun owoto kede i Miciri.

²⁶Juda dok te kobbi omego mere ni, “Konyo kara ŋo wan me neko ominwa eka ote wumo remo mere?

²⁷Biye wunu me ocate wunu baŋ jo Icmael, mom myero wan oneke kede ciŋwa, pien en ominwa, obedo komwa ikokome.” Omego mere te ye koppere-nono.

²⁸Ocat wil me Midian te bino beo kannono, omego a Yucepu te waye oko i bur, gin te cate baŋ jo Icmael, pi cekel me ryal pyeraryo. Gin te tero Yucepu naka i Miciri.

²⁹Kare ame Reuben odwogo i bur, oneno Yucepu doŋ mom tye i bur, en te yeco boŋo mere oko,

³⁰Odok cen baŋ omego mere te kobbigi ni, “Atin ca pe i bur do! Kara man an tin adok kwene ba!”

³¹Gin te neko dyel, ote kwanyo koti a Yucepu luto i remo mere.

³²Gin te kelo koti aborrono, dok a bade daŋ bocoboco-nono baŋ papagi kun okobbe ni, “Wan en onwoŋo koti-ni, koŋ inen, ŋi aber ka koti a wodi ennono onyo pe.”

³³Kare ame en doŋ otyeko ŋiyo, okobo ni, “Man kom koti atinna ennono; lee tim doŋ omwodo atinna oko do, ateteni, lee tim doŋ okikilo oko.”

³⁴Yakobo te yeco boŋo mere oko, te tweyo boŋo cola i pyere, te bedo koko wode pi kare alalac.

³⁵Awobe mere luŋ kede anyira te ya malo wot kweyo cunye, ento en te kwero oko ni kur kwe cunye, kun kobo ni, “Mom amannono gire; an gira abino lubo yo atinna i koko naka i lyel.” Pappere te bedo koke amannono

³⁶Jo Midian te cato Yucepu oko i Miciri baŋ Potipar ame en adwoŋ tic a Parao, kun loo ocirikale luŋ ame kuro piny.