Read lango Agege 38 Bible Online

Agege 38 - lango bible

Agege 38

¹Kare-nono Juda te ya oko i baŋ omego mere, te dak baŋ lonnoro me dullam ame nyiŋe Kira.

²A doŋ Juda tye kuno, en oneno nyaka a dano moro me Kanaan a nyiŋe Cua; en onyomo te daŋ cako donyo baŋe.

³Dako-nono te yac, te nywalo atin awobi, pappere te cako nyiŋe ni Er.

⁴Dako dok te yac, te dok nywalo atin awobi, ote cako nyiŋe ni Onan.

⁵En dok te nywalo awobi ocele, ote cako nyiŋe ni Cela. Atinnono en onywalo i Kejib.

⁶Juda te nyommi wode me kao Er nyako ame nyiŋe Tamali.

⁷Ento Er atinnere me kao-nono rik onwoŋo mom ber i nyim Rwot, omio Rwot te neke oko.

⁸Juda te kobbi wode Onan ni, “Yin myero ilak amuni, ibed cware, wek inywalli ominni atinnoro.”

⁹Ento Onan oŋeo ni atinnono mom bino bedo mere; omio i kare ame en donyo baŋ ci-ominnere, koŋ ogeo onyo koti mere piny me kur enywalli ominnere atin.

¹⁰Gin a en otimo-nono mom onen aber baŋ Rwot, omio Rwot te neke en daŋ oko.

¹¹Juda te kobo baŋ ci-wode Tamali ni, “Yin myero doŋ ibed i ot baŋ pappi bala dako a cware mom, naka waŋ ame woda Cela odoko dwoŋ”; pien onwoŋo en tye i lworo ni kare ocele en daŋ bino to bala omego mere. Tamali te dok bedo baŋ pappere.

¹²Ka kare okato, dako a Juda ame onwoŋo nyaka a Cua-ni te to oko. A doŋ cuny Juda opye, en owoto i Timna, baŋ onyar yer rommi mere. En owoto karacel awottere Kira, dano me Adullam.

¹³Kare ame otitti Tamali ni, “Kwaroni owoto i Timna pi nyaro yer rommi mere.”

¹⁴Tamali ogonyo rukkere a nyuto ni cware oto oko, te wumere boyo kome luŋ kede atambala, te wot bedo piny i ŋet yo ame woto Enaim, ame tye i yo Timna; pien oneno ni Cela doŋ odoko dano adwoŋ oko, ento mom olake.

¹⁵Kare ame Juda onene, en otamo ni alaya ennono, pien owumo waŋe oko.

¹⁶Juda owoto baŋe i ŋet yo, te penye ni, “Wek abut ba kedi,” pien onwoŋo en mom oŋeo ni ci-wode ennono. Tamali te penye ni, “Ibino ce miya ŋo ka aye yin ibuto keda?”

¹⁷Juda ogamo ni, “Abino cwayi akale dyel i akina dyegina.” En ogamo ni, “Ibino jeŋo giri moro koŋ iye, tuno ka icwao?”

¹⁸Juda te gamo ni, “Kara ajeŋ ŋo?” Tamali okobbe ni, “Atem ame tye iye ginnoro ame nyuto ni megi, kede tol kede abironi ame tye i ciŋi.” Juda te miye jami-nono luŋ, te buto kede; Tamali te yac oko.

¹⁹En te dok paco wot kwanyo atambala oko i kome, te doŋ dwoko rukere ame nyuto ni en dako ame cware oto.

²⁰Juda te oro awottere ame dano me Adullam, me tero akale dyel, wek gam jami mere a rik ejeŋo baŋ dako ca dwogo, ento naka mom te nwoŋo dakonono,

²¹Dano ame oro te penyo jo kannono ni, “Kara alaya moro ame yam bedo i ŋet yo me Enaim, tye aman kwene?” Gin ogamo ni, “Alaya moro gire yam mom bedo kan.”

²²En te dokwot kobbi Juda ni, “Mom anwoŋe gira, dok daŋ jo me kuno okobo ni, ‘Alaya moro gire yam mom bedo kan’.”

²³Juda te dok iye ni, “Wek en doŋ ter jami-nono bed mere, me kur bed nyerowa. Koŋ inen an acwaye dyel yin mom ite nwoŋe.”

²⁴Kare ame dwe doŋ okato adek, oterri Juda kop ni, “Ci-wodi Tamali obedo yaya bo waŋe atata, omio aman en doŋ oyac oko pi tar waŋe-nono.” Juda te kobo ni, “Kele wunu, me waŋe oko,”

²⁵Kare ame onwoŋo otye akele, en ocwao kop baŋ kwaro mere ni, “Won jami magi en oyac keda.” Dok daŋ te medo ciko ni, “Koŋ ŋi, nen won jami magi: atem, tol kede abiro.”

²⁶Juda oŋio jami-nono, te kobo ni, “En omio kop oloa oko, pien mom amie baŋ woda Cela.” Pe dok te medo buto kede.

²⁷A doŋ kare mere me nywal oromo, onwoŋo rut tye i yie.

²⁸A doŋ en tye alolle, atin acel te cwayo bade oko, dako ame acole te tweyo uci arema i ciŋe kun kobo ni, “Mam en ogeo pello.”

²⁹Ento kare ame mannono odwoko ciŋe oko, nen, ominnere en a dok te geyo pelo, omio okobo ni, “Iyabo yoni tetek piŋo?” Mannono te miyo cako nyiŋe Perej.

³⁰Ominnere doŋ te pello i cen kun uci arema tye i ciŋe, ote cako nyiŋe ni Jera.