Read lango Agege 4 Bible Online

Agege 4 - lango bible

Agege 4

¹Adam rik te ŋeye gin kede dako mere Kawa, te yac nywalo Kain kun kobo ni, “Rwot okonya omio anwoŋo atin ico.”

²Dok te nywalo ominnere Abel. Abel te bedo akwarommi, Kain apur-poto.

³A doŋ otyeko kare, Kain okelo cammogo ame ocek i poto mere, omio baŋ Rwot.

⁴Abel te kelo mege itino rommi me kao kede dwolgi.

⁵Rwot te neno Abel kede mottere i yomcuny. Cuny Kain te waŋ atek, waŋe te bale oko.

⁶Rwot te penyo Kain ni, “Cunyi owaŋ piŋo? Dok waŋi oballe piŋo?

⁷Ka ce itimo ber, mom obino pwoyi? Ka ce mom itimo ber, bal buta i doggola, cunye pyepyeta i komi, cite myero iloe.”

⁸Kain te kobbi ominnere Abel ni, “Owot i poto.” Ame doŋ gin tye i poto, Kain ocako romo ominnere, te neko oko.

⁹Obaŋa te kobbi Kain ni “Kara Abel tye kwene?” En te gamo ni, “Pe aŋeo; an abedo agwok ominna bo?”

¹⁰Obaŋa te kobbi Kain ni, “Ŋo ame itimo? Nen, remo ominni ame oony tye a koko i lobo kun winyere baŋa. Aman doŋ oceni oko

¹¹i lobo ame oŋamo doge te gamo remo ominni ame yin ionyo.

¹²Lobo mom dok bino cekki cam ka ipuro; ibino bedo aloŋ-piny kun iwowota atata i wi lobo.”

¹³Kain te kobbi Rwot ni, “Can ame imia pek meicel ame mom aromo yeyo.

¹⁴Nen tin doŋ iryema oko i poto, mom abino dok nen i nyimi; abino bedo aloŋpiny kun awowota atata i lobo, ame ŋattoro keken ka onwoŋa bino neka oko.”

¹⁵Rwot te dok kobbe ni, “Mom amannono gire! Ka ŋattoro oneko Kain, abino culo kwor i kome tyen abiro. Rwot te keto anen i kom Kain, me ŋattoro ka onwoŋe kur neke.”

¹⁶Kain te ya oko i nyim Rwot, te wot bedo i lobo Nod, tuŋ kide me Eden.

¹⁷Kain rik te ŋeye gin kede dako mere; oyac te nywalo Enoka. Te gero boma, te cako nyiŋ boma-nono ni Enoka bala nyiŋ wode.

¹⁸Enoka te nywalo Irad; Irad te nywalo Mekujael; Mekujael te nywalo Metucael; Metucael te nywalo Lamek.

¹⁹Lamek te nyomo mon aryo; acel nyiŋe Ada, acel nyiŋe Jilla.

²⁰Ada onywalo Jabal ame rik obedo kwaro a jo ducu ame bedo i kema, kun okwao lim.

²¹Ominnere nyiŋe Jubal, ame rik obedo kwaro a jo ducu ame goo naŋa opuk kede ame kuto nyamulere.

²²Jilla daŋ te nywalo Jubal-kain, atet jami tic ducu me mola kede nyonyo. Amin a Tubal-kain obedo Naama,

²³Lamek te kobbi monnere ni, “Yin Ada kede Jilla winy wunu koppa; wun mon a Lamek cik yitwu i gin ame akobo. Pien aneko dano pi waŋa, acobo awobi ame ogoa,

²⁴Ka ce obino culo kwor a Kain tyen abiro, Lamek obino culo kworrere tyen pyerabiro wie abiro twal.”

²⁵Adam rik dok te ŋeye gin kede dako mere, eka dako te nywalo awobi, te cako nyiŋe Ceji, pien okobo ni. “Obaŋa doŋ oye miya atin okene me leyo ka Abel ame Kain oneko.”

²⁶Ceji daŋ te nywalo atin awobi, ote cako nyiŋe Enoci. I karenono jo te cako lwoŋo nyiŋ Rwot.