Read lango Agege 40 Bible Online

Agege 40 - lango bible

Agege 40

¹Icennere a doŋ man otimere oko, adwoŋ poko koŋo kede adwoŋ tedo ogati abaka me Miciri te timo balloro baŋ adwoŋgi, abaka me Miciri.

²Akemo te mako Parao i kom oticcere adoŋo aryo-nono: adwoŋ poko koŋo kede me tedo ogati.

³En te ketogi i ot adwoŋ a loo cirikale ame okur piny, kan ame rik onwoŋo otweo iye Yucepu.

⁴Adwoŋ a loo cirikale te miyogi i ciŋ Yucepu, en te gwokogi; gin koŋ te bedo i buc pi kare moro.

⁵I dyeworroro acel gin te lek, gin aryo luŋ ame otweogi i buc, apok koŋo kede ated ogati abaka me Miciri, kun ŋat acel acel lekkere pat tere daŋ pat.

⁶Odiko ka Yucepu obino baŋgi, onwoŋo gin aryo luŋ waŋgi oballe.

⁷En te penyo odoŋe me tic a Parao a rik onwoŋo tye kede i buc, ame oketogi i ot adwoŋere-ni, ni, “Waŋwu kara tin oballe piŋo?”

⁸Gin te gamo ni, “Tin wan oleko lek, ento mom tye ŋattoro a twero gonyiwa tere.” Yucepu te gamo ni, “Mom Obaŋa gire en agonyo tere? Koŋ ititta wunu lekwu-nono.”

⁹Adwoŋ poko koŋo te cako poro lekkere baŋ Yucepu, kun kobbe ni, “Nen ba, an aleko ni olok onwoŋo tye i nyima,

¹⁰kun jaŋe tye adek. Ame onwoŋo pwod oluro me cako turo, oru nyako nyige oko, te daŋ cek oko.

¹¹An onwoŋo amako ikopo a Parao i ciŋa; apwono nyig olokkono ate biyo iyi ikopo a Parao, ate miyo ikopo-nono i ciŋ Parao.”

¹²Yucepu te kobbe ni, “Lekki-nono te koppere ene: jaŋ olok adek cimo nino adek;

¹³odoŋ nino adek Parao bino dwoki i ticci, ite bino miyo Parao ikopo i kite a yam itimo con i kare ame ipoko koŋo mere.

¹⁴Ento myero ipo pira ka doŋ idok idog ticci; tim ber yin daŋ itam pira ba, ititti Parao kop i koma, me en daŋ gonya oko i ot man.

¹⁵Pien an rik okwala akwala i lobo a jo Eburania; aman daŋ dok oketa i buc kan nono kun mom abalo ginnoro.”

¹⁶Ka adwoŋ tedo oneno ni ogonyo lek awottere aber, en daŋ oporri Yucepu mege kun kobo ni, “Nen ba, an daŋ aleko ni onwoŋo adodo ditti me ogati adek i wia.

¹⁷Iya dita i malo mere onwoŋo tye iye kwon ogati apapat pi Parao, cite winy onwoŋo tye dok acamo oko iyi dita ame ayeonono.”

¹⁸Yucepu te gamo ni, “Lekkinono te koppere ene: ditti adek, cimo nino adek;

¹⁹i nino me adekkere, Parao bino toŋo wii ŋuno oko, te ŋabi i kom yat, winyo te camo riŋo me komi.”

²⁰Kare ame nino me adekkere oromo, ame en nino a rik onywalo iye Parao, Parao otedo arama pi oticcere ducu, en te kelo adwoŋ poko koŋo kede adwoŋ ogati nyim omiro mere.

²¹En te dwoko adwoŋ poko koŋo i dog ticcere me poko koŋo: en te miyo ikopo i ciŋ Parao.

²²Ento adwoŋ tedo ogati en te ŋabo malo i kite ame Yucepu ogonyo kede lekkere.

²³Adwoŋ poko koŋo naka mom te po gire pi Yucepu, wie te will oko i kome atwal.