Read lango Agege 41 Bible Online

Agege 41 - lango bible

Agege 41

¹A doŋ mwaka aryo twal okato, Parao te lek ni, onwoŋo etye ecuŋ i ŋet kulo Nail,

²eka ete neno dok abiro ocwe a komgi opipira, oya i kulo Nail kun gin acamo ogada.

³Dok ocele abiro ame omok, ojony atek ateka daŋ te bino i kulo Nail kun lubo yorgi, ote daŋ bino cuŋ i ŋet dok ame okwoŋo bino, ame tye i ŋet kulo Nail.

⁴Dok ame omok, ojony atek ateka-ca te camo dok ocwe a komgi apipira-ca oko. Parao te doŋ co oko i waŋ nino.

⁵En dok te nino oko, te dok leko lek me aryo mere. Oleko ni eneno wit kal abiro ame oluŋere ocek abeco i tyen kal acel keken.

⁶I ŋegi dok onwoŋo tye iye wit kal ocele abiro ame olot, odoŋo arecoreco, kun yamo alyet me oro onerogi oko;

⁷eka wite abiro arecoreco ca te mwonyo maca abeco ca oko. Parao te dok co oko i waŋ nino, te nwoŋo ni dok emedo lek.

⁸Odiko ka piny oru, yie te bedo waŋ atek; omio en te cwalo okwena lwoŋo otyet kede oryeko luŋ me Miciri. Parao te tittigi lekkere, ento ŋattoro mom te nen i akinagi ame romo gonyo lek a Parao.

⁹Adwoŋ poko koŋo te kobbi Parao ni, “Tima ber adwoŋ, tin apo bala.

¹⁰I kare ame rik Parao cunye waŋ i koma an amiro mere eka te tweya i buc karacel kede adwoŋ tedo ogati, i ot a loo cirikale luŋ ame kuro piny,

¹¹wan aryo luŋ rik ote lek i dyewor acel, lekwa wan aryo luŋ rik tergi papat.

¹²Awobi moro me Eburania onwoŋo tye kedwa. En rik te gonyo lekwa kun gonyo me a ŋat acel acel kite ame lekkere tye kede.

¹³Kite ame en rik ogonyo kede lekwa, daŋ obino otimere kittono. An obin odwoka i dog ticca, ento adwoŋ tedo ogati ote ŋabo kome malo.”

¹⁴Parao te cwayo kwena lwoŋo Yucepu, ame daŋ ote ru kelo oko oyotoyot i buc. Yucepu te lyelo wie, te daŋ lokoboŋo mere, te doŋ donyo baŋ Parao.

¹⁵Parao te kobbi Yucepu ni, “An onwoŋo aleko lek ento ŋattoro mom te nwoŋere kadi acelloro ame romo gonnya tere. An abedo winyo kop i komi, ni yin ka iwinyo lekkoro itwero gonyo tere.”

¹⁶Yucepu te gamo dog Parao ni, “Amaa, mom an gira, Obaŋa gire en ame gonnyi Parao lekkere a yomoro cunye.”

¹⁷Parao te doŋ kobbi Yucepu ni, “An aleko ni onwoŋo acuŋ i ŋet kulo Nail,

¹⁸dok abiro ame ocwe a komgi apipira te ya i kulo Nail, ote bedo camo ogada.

¹⁹Dok ocele abiro daŋ te bino lubo yorgi, magi-nono onwoŋo omok, ojony ikokoro, ame kodi dokkono an yam mom ru aneno i Miciri luŋ.

²⁰Dok ame onwoŋo omok, dok ojony ikokoroni te camo dok abiro ocwe ca oko.

²¹Cite akadi i kare ame gin doŋ ocamo dok ocwe ca oko, mom tye ginnoro ame twero cimo ni gin ocamo dok ocwe oko, pien onwoŋo gin pwod ojony ikokoro, bala kite ame onwoŋo gin tye kede con. Ka mannono otum, an doŋ ate co oko i waŋ nino.

²²Nino dok te yuto waŋa oko, ate dok neno wit kal abiro ame doŋo i tyene acel keken, kun obeco meicel.

²³Dok ate neno wit kal ocele abiro arecoreco, ame lyeto yamo me oro onero oko, kun tye olot i ŋet en abeco mege ca.

²⁴Wit kal arecoreco te mwonyo wit kal abiro abeco ca oko. Aporo lek man baŋ otyet, cite ŋattoro mom onen ame romo gonyo tere.”

²⁵Yucepu te kobbi Parao ni, “Lek a Parao gire acel keken, Obaŋa onyuto baŋ Parao gin ame ebino tiyo.

²⁶Dok abiro abeco kede wit kal abiro abeco, gin ducu nyuto mwaka abiro, lekkono tye acel gire.

²⁷Aco dok abiro omok, ojony atekateka kede wit kal abiro ame yamo a lyet me oro onero oko, gin daŋ cimo mwaka abiro ame kec bino ri kede i lobo.

²⁸Doŋ ba, bino bedo gire kite ame atitti Parao, Obaŋa doŋ onyutti Parao oko gin ame ebino tiyo.

²⁹Pi mwakki abiro, cam bino cek abup meicel i lobo Miciri luŋ.

³⁰Cite i ŋe mannono, mwakki abiro ocele bino lubo ame kec bino bedo tye iye. Wi jo bino wil oko i kom cam abup ame rik ocekkigi i Miciri. Keccono bino balo lobo me Miciri meicel.

³¹Twon cam abup ame jo bino bedo kede-ni mom dok obino poyo kadi acel pi kec agwa ame bino lubo, pien keccono bino bedo alyet meicel.

³²Lek a Parao ame eleko iryo twal-li, nyuto ni Obaŋa en omoko kop man, dok Obaŋa bino miyo cobere i kare a mom bor.

³³Omio Parao myero nen ni eyero dano moro aryek, a wie tio me eket loo lobo Miciri luŋ.

³⁴Dok Parao myero ket odoŋe ame loo lobo, me gin ra acel me abic me cam ame bino cek i lobo Miciri, pi mwakki abiro ame cam bino cek iye abup.

³⁵Myero gin cok cam i mwakki ame cam bino cek iye abup-pi luŋ, ote gwoko i bomagi i te loc a Parao.

³⁶Cammono bino bedo me mono pi lobo man, me kuro mwakki abiro ame kec bino poto iye i Miciri, me kec kur nek jo i lobo-ni oko.”

³⁷Tam man Parao kede oticcere luŋ oneno ni ber.

³⁸Parao te kobbi omiro mere ni, “Otwero nwoŋo wunu dano ocele acalo man, ame tye i cuny Obaŋa acalo en?”

³⁹Parao te kobbi Yucepu ni, “Kite acalo Obaŋa doŋ onyutti kop man luŋ, mom dok tye dano moro aryek, a wie tio bala yin.

⁴⁰Yin en a doŋ ibino loyo oda, karacel kede jona luŋ, gin luŋ bino tiyo gin ame iciko, an abino loyi pi kom loc ame abedo iye keken.”

⁴¹Parao dok te kobbi Yucepu ni, “Nen ba, doŋ atyeko ketti me loyo lobo Miciri luŋ.”

⁴²Parao te woto atemmere oko i nyako ciŋe, te rwako i mea Yucepu, te miye ruko boŋŋi camanini abeco, te rwako nyor me jabu abeco i ŋute.

⁴³Parao te miye ŋwec i gadigadi me aryo kun jo wo i redo i nyime ni, “Rum conwu!” Mannono kite ame okette kede me loyo lobo Miciri luŋ.

⁴⁴Parao dok te medde kobbi Yucepu ni, “An Parao, mom tye dano moro ame bino tiŋo ciŋe onyo tyene i lobo Miciri luŋ ka ce yin mom iye.”

⁴⁵Parao te cako nyiŋ Yucepu ni Japenat-panea, te miye nyomo Acinaci nyaka a Potipera ame onwoŋo alamdog me On. Yucepu te loyo lobo me Miciri.

⁴⁶Mwaka me dit a Yucepu onwoŋo doŋ oromo pyeradek nono i kare ame en donyo i tic a Parao, abaka me Miciri. Yucepu oya oko i nyim Parao te wot loŋo lobo me Miciri luŋ,

⁴⁷Cam rik te cek i lobo abup meicel pi mwakki abiro,

⁴⁸rik daŋ ote coko cam luŋ ame ocek i lobo Miciri pi mwakki abiro-nu, ote kano i dere me mono i boma luŋ. I boma acel acel rik okano iye cam ame oya i potti luŋ a ceggi ceggi kede.

⁴⁹Yucepu te kano cam abup meicel i dere me mono. Cam te bedo-adwoŋ bala kwoyo me dog nam, ame omio ote weko pimo oko pien onwoŋo doŋ mom pimer.

⁵⁰Ame mwaka me kec mom ru oromo, Yucepu onwoŋo doŋ tye itino awobe aryo ame Acinaci nyaka a Potipera alamdog me On onywalo.

⁵¹Yucepu ocako nyiŋ atinnere me kao ni Manace, kun kobo ni, “Pien Obaŋa doŋ omio wia owil oko i kom can ducu kede i kom ot a pappa.”

⁵²Atin me aryo te cako nyiŋe ni Epraim, kun kobo ni, “Pien Obaŋa omia anywal i lobo ame aneno can iye.”

⁵³Kare ame mwakki a rik cam ocek iye abup wok-k i otum oko,

⁵⁴mwakki me kec te doŋ cakere, kite ame Yucepu rik okobo kede. Kec te diyo jo me lobo luŋ, cite i Miciri luŋ cam onwoŋo tye.

⁵⁵A doŋ cam otum oko i lobo Miciri luŋ pi kec ame onwoŋo doŋ okur, jo te cako koko baŋ Parao. Parao te kobbi jo Miciri ni, “Wot wunu baŋ Yucepu itimu gin ame en bino kobbiwu.”

⁵⁶Kare ame kec doŋ odio jo luŋ me Miciri, Yucepu te cako yabo dog dere me mono luŋ, te cato kal baŋ jo Miciri, pien kec onwoŋo doŋ okur atek meicel i lobo Miciri.

⁵⁷Jo me lobo ocele luŋ te cako ciro i Miciri baŋ Yucepu pi wilo kal, pien kec onwoŋo doŋ okur atek meicel i lobo ducu.