Read lango Agege 42 Bible Online

Agege 42 - lango bible

Agege 42

¹Ka Yakobo owinyo ni kal tye i Miciri, okobbi awobe mere ni, “Piŋo kara ibedo wunu nenne anena kenwu kenwu?”

²Eka te kobbigi ni, “Nen, an awinyo ni kal tye i Miciri, wotu iwilliwa wunu kal i kuno, me obed wunu kwo, kec kur nekwa oko.”

³Omego a Yucepu apar te wot i Miciri me wot wilo kal.

⁴Benjamin, omin a Yucepu, Yakobo mom ocwalo owoto karacel omego mere, pien obedo i lworo ni ginnoro arac dok twero timere i kome.

⁵Awobe Icrael te wot kittono karacel i jo ocele ame daŋ onwoŋo awot kuno, pien kec onwoŋo rik oromo lobo me Kanaan luŋ.

⁶I kare-nono onwoŋo Yucepu odoko aloc i lobo me Miciri; en a rik cato kal baŋ jo me lobo-nono. I kare-nono omego a Yucepu daŋ te bino, gin ote onyere piny i nyime aryeba cuny, kun nyimgi gudo lobo.

⁷Yucepu oneno omego mere, te ru ŋeyogi oko, cite te terogi koŋ bala orok, kun kobo kedgi agwa, penyogi ni, “Kara wun iya wunu i kwene?” Gin ogamo ni, “Wan oya i lobo me Kanaan, obino wilo cam.”

⁸Yucepu rik te ŋeyo omego mere kittono, cite gin naka mom oŋee.

⁹Yucepu te po lek ame rik oleko i komgi, eka te kobbigi ni, “Wun orot piny, ibino wunu neno kannoro a tye nono i lobo-ni!”

¹⁰Gin ogamo ni, “Amaa adwoŋwa, mom amannono gire, wan omironi obino giwa wilo cam.

¹¹Wan ducu obedo itino a dano acel, yiwa daŋ gire cil, wan mom orot piny.”

¹²Yucepu te kobbigi ni, “Pe gire, wun ibino wunu me neno kannoro a tye nono i lobe-ni.”

¹³Gin dok te gamo ni, “Adwoŋ, wan gire wan omironi, wan onwoŋo otye wan omego apar wie aryo, wan luŋ obedo itino a dano acel ame tye i lobo Kanaan; awobi atidi odoŋ paco baŋ papawa, acel en ame doŋ mom tye.”

¹⁴Yucepu te kobbigi ni, “An kara akobo kakare, wun ibedo wunu orot piny.

¹⁵Pi mannono, myero koŋ nen ni onenowu aber kit man: Acalo Parao tye kwo-ni, wun mom ibino ya wunu i kan ka ce ominwu me cogo mom obino kan.

¹⁶Wun myero icwal wunu dano moro acel i akinawu me wot kel ominwu-naca, kun nwoŋo wun it ye wunu i buc kan, me koŋ mok ka ce wun ikobo wunu kop ateni. Ka ce man mom otimere, acalo Parao pwod kwo-ni, nwoŋo kara wun orot piny ateteni,”

¹⁷Gin luŋ ote ketogi i ot kol pi nino adek.

¹⁸A doŋ nino adek otum, Yucepu okobbigi ni, “Tim wunu kit man me ikwo wunu, pien an alworo Obaŋa.

¹⁹Ka ce wun jo ame yiwu cil ateni, wek wunu dano acel doŋ i buc kan, jo ocele wot ter kal baŋ jo odoŋ paco, me largi i kec,

²⁰Gin jonnono wot kel ominwu atidi baŋa kan; mannono bino nyuto ni wun kara onwoŋo ikobo wunu kop ateni, bino miyo ibwot wunu i to.” Gin daŋ te timo amannono.

²¹Gin te ero kop kengi kengi ni, “Me ateni, myero oye ni kop oloowa pi ominwa, can ame obino i komwa-ni tye pire, pien kare a rik en bako doge baŋwa, wan oneno can i cunye, ote kwero winyo oko.”

²²Reuben te kobbigi ni, “Rik mom akwenyorowu ni mom itim wunu balloro i kom atin ca? Ento wun ite kwero wunu oko, mannono en omio apido remo mere i komwa-ni.”

²³Gin gigi mom oniaŋ ni Yucepu tye awinyo kopgi-nono, pien dano ame agonyo lebgi en onwoŋo tye i akinagi.

²⁴Kare ame Yucepu oya oko i baŋgi, okok, te dok baŋgi bedo kedgi. Omako Cimeon i akinagi te tweyo i nyimgi.

²⁵Yucepu te ciko ni pik kal poŋ iyi icaogi luŋ dok daŋ dwok lim a ŋat acel acel iyi cao mere, myero daŋ migi ginnoro me dwoko lao i yo. Magi-nono luŋ ote timo pirgi.

²⁶Gin te tweyo kal i ŋe kanegi, ote doŋ wot gigi.

²⁷Kare ame ŋat acel oyabo dog icao mere kan ame gin obuto iye, me emi kana mere cam, en oneno lim tye oketo i dog icao mere.

²⁸En te kobbi omego mere ni, “Limma odwoko tye iyi cao, tye iye kan!” Gin ka owinyo, cunygi opoto meicel, ŋat acel acel te lokere baŋ awottere a kome amyel amyela, kun kobo ni, “Obaŋa kara otimowa aman piŋo ba?”

²⁹Kare ame gin odwogo baŋ papagi Yakobo i lobo me Kanaan, gin otitte gin ducu ame otimere i komgi, kun okobo ni,

³⁰“Dano ame obedo adwoŋ me lobo ca obedo kop kedwa i gero, olokowa odoko orot piny.

³¹Cite wan otitte ni, ‘Wan giwa obedo jo ame yiwa cil, wan mom obedo orot piny kadi acel;

³²wan onwoŋo otye wan omego apar wie aryo ame papawa acel i lobo Kanaan.’

³³Eka dano-nono ame en adwoŋ a loo lobo-nu te kobbiwa ni, ‘Man en gin ame bino miyo an aniaŋ ni wun ibedo wunu jo ame yiwu cil ateni, wun wek wunu ominwu acel kan, ter wunu kal me koŋ iwot ilar wunu jo me paco i kec.

³⁴Wot ikelu ominwu atidi baŋa kan, mannono bino miyo aŋeo ni wun kara mom orot piny, ento wun jo a yiwu cil, ate doŋ bino miyowu ominwu, dok ibino wunu doŋ cato wil i lobo man.’ ”

³⁵Kare ame gin aonyo kal iyi caogi, ŋat acel acel onwoŋo lim ame rik eboo i dog icao mere; kare ame gin karacel kede papagi oneno lim ame oboo, lworo omakogi.

³⁶Papagi Yakobo te kobo ni, “Ityeko wunu itinona oko do! Yecupu doŋ pe, Cimeon daŋ doŋ pe, dok imito tero wunu Benjamin; man luŋ cannere maka.”

³⁷Reuben okobbi pappere ni, “Ibino neko itino awobena aryo-ni ka ce ineno ni an mom adwoggo en baŋi.”

³⁸Yakobo ogamo kun kwero oko ni, “Woda gire mom bino wot karacel kedwu, pien ominnere doŋ oto oko, en kene a doŋ odoŋ. Ka ce ginnoro arac dok bino timere i wotwu-ni, ibino tero wunu lwar wia i lyel i twon cannoro a mom kobere.”