Read lango Agege 43 Bible Online

Agege 43 - lango bible

Agege 43

¹Kare ame kec doŋ okur atek i lobo,

²kun daŋ doŋ gin ocamo kal a rik okelo i Miciri otum oko papagi okobbigi ni, “Dok wunu i Miciri iwot iwilliwa wunu cammoro aduno.”

³Juda te dok iye ni, “Dano ca rik ocikowa atek ni, ‘Pe ibino wunu neno waŋa ka ominwu atidi mom tye karacel kedwu.’

⁴Doŋ ka iye ni ominwa wot karacel kedwa, wan obino wot;

⁵cite ka ce yin ikwero oko, wan giwa mom obino wot, pien dano ca rik ocikowa ni, ‘Pe ibino neno wunu waŋa ka ce ominwu atidi mom tye karacel kedwu.’ ”

⁶Icrael te kobo ni, “Kara itima wunu arac aman piŋo, me kobbi wunu dano-naca ni ominwu ocele tye?”

⁷Gin te kobbe ni, “Dano ca openyowa i peny apol meicel, i komwa kede i kom atekerewa, kun penyowa ni, ‘Papawu pwod tye kwo? Ominwu ocele tye?’ Wan giwa odokke i pennyere. Wan rik otwero ŋeyo ni en bino kobo ni, ‘Kel ominwu?’ ”

⁸Juda te kobbi pappere Icrael ni, “Ye awobi-ni wot keda, me wan oya owoti, me kur oto ento obed kwo, wan karacel kede yin kede itinowa,

⁹An amiye me gwoke, yin ibino penya pire. Ka ce an mom abino dwoggo en baŋi ate kete i ciŋi, ballere luŋ bino bedo i wia.

¹⁰Pien kono onwoŋo mom wan dok ogal, kono nyo doŋ odok kuno iryo.”

¹¹Papagi Icrael te kobbigi ni, “Myero doŋ bed amannono ba, tim wunu kit man: terri wunu dano-nono nyig yennogo ame iyero wunu me mot, rwak iyi icaowu moo yat ecoma aduno kede moo kic daŋ aduno, odok kede murra, kede nyig yen ocele apapat.

¹²Ter wunu daŋ lim abup aromo wilo iryo kun idwoko wunu daŋ lim a rik gin orwako i dog caowu, pien kare ocele rik wigi owil awila,

¹³Ya iwot wunu doki baŋ dano-naca, iter ominwu daŋ.

¹⁴Obaŋa Won Twer Ducu myero miwu winyo i nyim dano-naca me gony ominwu ocele ca dwog karacel kede Benjamin. Ka ce atinna oto, nwoŋo an daŋ doŋ ato!”

¹⁵Gin te ya wot i Miciri kun otero mot, lim abup a romo wil iryo, kede Benjamin. Gin te wot cuŋ i nyim Yucepu.

¹⁶Ka Yucepu oneno ni Benjamin tye i akinagi, okobbi akan jami mere me ot ni, “Kel jonnono i ot, ite neko lee moro iyiki, pien gin bino cam karacel keda dyeceŋ.”

¹⁷Dano-nono te timo gin ame ocike tiyo; okelo jonnono i ot a Yucepu.

¹⁸Kare ame oterogi i ot a Yucepu, lworo omakogi atek, gin te kobo ni, “Man kop me lim a rik ket i dog icayiwa i kare ame ogeo bino kan, en omio okelowa kan, me enwoŋ kop i komwa, ete makowa doko opii mere kede mayo kanewa luŋ oko.”

¹⁹Koppono te miyogi wot baŋ akan jami me ot a Yucepu, ote wot kop kede i doggola.

²⁰Gin ote kobbe ni, “Adwoŋ, wan rik obino kan pi wilo cam tyen me agege,

²¹ento kare ame wan otuno kan ame obuto iye, ogonyo dog cayiwa ote nwoŋo limwa luŋ tye ame moro mom orwenyo i dog icao a ŋat acel acel, oman daŋ tye odwoggo luŋ.

²²Okelo daŋ dok lim ocele me wilo cam. Pe oŋeo.”

²³En te gamo ni, “We wunu giwu ame cunywu opye, kur ibed wunu kede lworo moro; gwok onyo Obaŋawu kede Obaŋa a papawu en oketo lim iyi icayiwu. An gira rik agamo limwu.” En te kelo Cimeon baŋgi.

²⁴Dano-nono te terogi i ot a Yucepu te miyogi pii me lwoko tyengi, te daŋ miyo kanegi cam.

²⁵Gin te yiko motgi me amia baŋ Yucepu ka bino dwogo baŋgi otyeno, pien gin onwoŋo owinyo ni gin ocam kuno.

²⁶Kare ame Yucepu odwogo paco, gin otero motgi baŋe ote ryebere piny i nyime.

²⁷Yucepu te penyogi ka ce gin otye aber, kun daŋ medo ni, “Papawu, adwoŋ oti a rik ikobo wunu ca tye aber? Pwod kwo?”

²⁸Gin te gamo ni, “Amironi ame papawa tye aber, pwod kwo.” Gin te kulo wigi piny, ote ryebere piny i nyime.

²⁹En te tiŋo waŋe neno ominnere Benjamin, atin tottere, te penyogi ni, “Man ominwu me cogo arik ititta wunu pire-nie? Obaŋa omii winyo atinna!”

³⁰Yucepu te ru wot oyotoyot oko, pien cunye onwoŋo tye i kom ominnere meicel. Owoto te wot yenyo kan ame myero ekok iye, te donyo iyi icika mere wot kok iye.

³¹Ologo waŋe te dwogo baŋgi. Odio cunye te kobo ni, “Tok doŋ cam.”

³²Ote toko cammere pat, me omego mere daŋ pat, kede mea a jo Miciri a rik cemo kede daŋ otoko megi pat, pien jo Miciri rik mom cemo i jo Eburania; pien mano me kwer baŋ jo Miciri.

³³Gin te bedo piny i nyime kun olubere i ditogi me anywalli; gin te bedo nenne kengi kengi kun owuro.

³⁴Ote pokkigi cam kun otoko i meja a Yucepu, ento mea Benjamin ote toko adwoŋ okato me owote mere oko tyen abic twal. Gin rik ote bedo i Yucepu i yomcuny kun omatte.