Read lango Agege 44 Bible Online

Agege 44 - lango bible

Agege 44

¹Yucepu ociko akan jami me ot ni, “Pik cam adwoŋ, poŋ icao a jonnono, ame gin twero yeyo; dok daŋ ket lim a ŋat acel acel i dog icao mere.

²Ket daŋ ikopona me ryal i dog icao awobi atidi, karacel i limmere me wilo kal.” En otio kit ame Yucepu okobbe kede.

³Odiko ame piny doŋ oru oko, olwoko jonnono owoto i kanegi.

⁴Kare ame gin doŋ oya i boma cite mom ru owoto abor wok, Yucepu okobbi akan jami mere ni, “Lub doŋ yo jo-nu, ka imakogi, kobbigi ni, ‘Piŋo kara iculo wunu gin aber kede gin arac? Piŋo ikwalo wunu ikopo ryalla oko?

⁵Mannono mom en ikopo ame rwotta tio kede me mat? Ikopo tyettere daŋ mom ennono? I timo wunu rac me timo wunu gin acalo man.’ ”

⁶Kare ame omakogi iyo, okobbigi koppono.

⁷Gin ogamo doge ni, “Ŋo omio adwonwa okobo kodi kop man? Wan omironi pe otwero timo tim acalo man!

⁸Koŋ inen lim ame rik wan onwoŋo i dog icaowa, rik obin odwogo baŋi i Kanaan twal; wan dok otwero kwalo ryal onyo jabu i ot adwoŋŋi niŋo?

⁹Adwoŋ, ka ce ibino nwoŋo tye baŋ amironi moro iyi akinawa kan, myero en to, dok wan daŋ obino bedo opiini.”

¹⁰En ogamo ni, “Wek wunu koŋ doŋ bed kit ame ikobo wunu-nono: ŋat ame abino nwoŋo baŋe, en bino bedo opiina, ento jo ocele balloro gire bino bedo mom i wigi.”

¹¹Oyotoyot ŋat acel acel te ru cibo cao mere piny, te daŋ ru yabo doge.

¹²En te cako yenyo ikopo kun cako i kom awobi adwoŋ dwogo kede piny naka i kom awobi atidi, cite te nwoŋo ikopo i dog icao a Benjamin,

¹³Gin te yeyeco boŋnigi, ote tweyo yecgi i ŋe kanegi, ote dok cen i boma.

¹⁴Ka Juda kede omego mere odok cen i ot a Yucepu, gin oŋuke kuno, ote ony ducu ryebere i nyime.

¹⁵Yucepu te kobbigi ni, “Piŋo kara itimo wunu kodi tim acalo man? Mom iŋeo wunu ni dano acalo an-ni ŋeo tyet?”

¹⁶Juda te gamo ni, “Amaa, adwoŋ, kara wan otwero dok kobbi ŋo ba? Gin aŋo ame dok otwero kobo? Otwero kwanyo kop i komwa niŋo? Amaa adwoŋwa, Obaŋa gire doŋ otyeko nwoŋo bal oko i komwa wan omironi, wan luŋ doŋ opiini karacel i ŋat ame onwoŋo ikopo iyi icao mere.”

¹⁷Cite Yucepu te gamo ni, “An gira mom atwero timo amannono kadi acel! Ŋat ame onwoŋo ikopo baŋe, en ame bino bedo opiina, ento wun giwu wot baŋ papawu i kuc.”

¹⁸Juda owoto baŋ Yucepu te kobbe ni, “Adwoŋ, tim ber iye an amironi akob kedi kopporo anonok, cunyi kur waŋ i koma an amironi atek ateka, pien yin i cal i Parao ikome.

¹⁹Adwoŋŋa rik obin openyowa ni, ‘Papawu tye, onyo ominwu?’

²⁰Wan ote gamo dogi ni, ‘Papawa tye doŋ oti oko, ominwa daŋ tye obedo atinnere me cogo, ame en onywalo i tio mere; ominnere me toto yam oto oko, en doŋ odoŋ kene, dok pappere mare.’

²¹Rik yin ite kobbiwa ni, ‘Wot ikele wunu baŋa me anene.’

²²Cite wan ote kobbi ni, ‘Awobi atidi ca mom twero ya i ŋet pappere, ka opokere i pappere, pappere to oko.’

²³Ento yin rik ite kobbiwa ni, ‘Ka ce ominwu atidi mom obino kan karacel kedwu, mom dok ibino neno wunu waŋa.’

²⁴Kare ame wan odok paco baŋ papawa ame en amironi, wan otitte kop ame yin ikobo, adwoŋ.

²⁵Kare ame papawa okobbiwa ni, ‘Wot dok iwilla wunu cam aduno’,

²⁶wan okobbe ni, ‘Wan giwa mom odok. Ka iye ominwa atidi owoto karacel kedwa, wan obino dok pien mom obino neno wan dano ca ka ominwa atidi mom tye i akinawa.’

²⁷Amironi papawa te kobbiwa ni, ‘Wun iŋeo wunu ni dakona onywalo itino awobe aryo;

²⁸acel oto oko, an yam doŋ akobo ni, Ateteni lee tim yam doŋ okikilo gire oko, mom dok abino nene atwal.

²⁹Ka dok ikwanyo wunu man oko i baŋa, eka ginnoro arac te timere i kome, ibino tero wunu lwar wia i lyel i twon cannoro a mom kobere.’

³⁰Kwo mere ocuŋ i kom atin awobi-ni, doŋ ka ce abino dok baŋ amironi pappa aboŋo atin awobi-ni i akinawa,

³¹ka bino neno ni en mom tye i akinawa, en bino to oko, wan obino tero lwar wi papawa i lyel i twon cannoro a mom kobere.

³²An rik ate miye baŋ pappa me gwoko atin man, kun akobbe ni, ‘Ka ce an mom abino dwoggo en baŋi, ballere bino bedo i wia i nyim pappa pi kare me kwona luŋ.’

³³Adwoŋ, man en gin omio akwai, tim ber iye an amironi adoŋ kaka awobi man, me an abed opiini; me atin man luny dok paco karacel kede omego mere.

³⁴Pien atwero dok baŋ pappa paco niŋo ka atin awobi-ni mom tye?”