Read lango Agege 45 Bible Online

Agege 45 - lango bible

Agege 45

¹Yucepu onwoŋo mom doŋ romo diyo cunye i nyim lwak jo ame ocuŋ i laŋete: omio en oredo kun kobo ni “Mi jo luŋ ya oko i baŋa wot oko teŋe.” Mannono te miyo ŋattoro mom dok obedo tye i kare ame Yucepu nyutte kene baŋ omego mere.

²En ogeo kok atek meicel, ame jo Miciri kede jo i paco a Parao daŋ owinyo.

³Yucepu te doŋ kobbi omego mere ni, “An a Yucepu; pappa pwod tye kwo?” Omego mere te liŋ aliŋa pien koppere opoo komgi atek i nyime.

⁴Yucepu te kobbi omego mere ni, “Tim wunu ber inokka wunu aceggi.” Gin te nokke ceggi. Okobbigi ni, “An ominwu Yucepu ame yam icato wunu i Miciri-ni.

⁵Kur doŋ ibed wunu i waŋcunnyoro, onyo kede waŋ yiccoro i komwu kenwu kenwu pi cata kan, pien Obaŋa gire a rik ocwaa i nyimwu me alar kwo a joo

⁶Pien aman doŋ otyeko mwakki aryo, pwod dok odoŋ mwakki ocele abic ame jo mom bino pur kadi kayo ginnoro.

⁷Obaŋa ocwala i nyimwu me gwokowu wun jo ame bino doŋ i wi lobo, pi laro kwo a jo apol ame bino bwot.

⁸Pien mom wun en a rik icwaa wunu kan ento Obaŋa gire. Obaŋa doŋ omia adoko pappo baŋ Parao, an adwoŋ ame loo ode kede lobo mere luŋ.

⁹Wot wunu oyot, iru wunu dok baŋ papa, ikobbe wunu ni, ‘Wodi Yucepu okobo ni, Obaŋa doŋ otyeko keto me bedo aloc a jo Miciri luŋ ru doŋ bino baŋa kan.

¹⁰Ibin ibed cok keda kan i lobo me Gocen, yin karacel kede itinoni kede ikwai ducu, anaka limmi luŋ kede jamini ducu,

¹¹An abino piti kuno, pien mwakki me kec pwod odoŋ kany twal i nyim; me yin kede jo me paconi, kede gin ame itye kede luŋ, mom inen wunu can.’

¹²Wun doŋ ineno wunu i waŋwu, ominna Benjamin daŋ doŋ oneno i waŋe ni an en ame akop kedwu-nono ikokome.

¹³Wun doŋ myero iwot ititti wunu pappa kit kwogo ame an atye kede i Miciri, kede ginnoro luŋ ame doŋ ineno wunu. Wot wunu oyot, i ru kela wunu pappa kan.”

¹⁴Eka en te kwako ŋut ominnere Benjamin kun kok, ominnere Benjamin daŋ te kwako ŋute kun kok.

¹⁵Yucepu te noto lem omego mere luŋ kun kok, pig waŋe cwer i komgi, eka omego mere te cako kop kede.

¹⁶Kare ame kop man owinyere i ot a Parao ni, “Omego a Yucepu obino,” koppere oyomoro cuny Parao kede omiro mere atek meicel.

¹⁷Parao te kobbi Yucepu ni, “Cik omegoni ni, ‘Tim wunu kit man: twe yecwu i ŋe leyiwu, idok wunu i lobo me Kanaan,

¹⁸wot ikel wunu papawu kede jo me pacowu, ibin wunu baŋa; an abino miyowu jami abeco ame tye i lobo Miciri, ibino camo wunu cam abeco ame tye i lobo-ni.’

¹⁹Cikgi daŋ dok otim kit man, ‘Ter wunu daŋ gadigadi mogo i Miciri me loro itinowu kede monwu, me ikel wunu papawu, ibin wunu kan,

²⁰Kur ipar wunu pi jamiwu, pien jami abeco luŋ me Miciri bino bedo megwu’.”

²¹Awobe Icrael daŋ te tiyo kittono. Yucepu omiogi gadigadi kite ame abaka ocikogi kede, te daŋ miyogi ginnoro me dwoko lao iyo.

²²Te dok miyo ŋat acel acel boŋŋi abeco me aruka i nino adoŋo; cite Benjamin ote miyo cekel me ryal mia adek kede boŋŋi abeco me nino adoŋo.

²³Te cwayo baŋ pappere jami magi: kane apar ame oyeo jami abeco me Miciri, kede megi kane apar ame oyeo kal kede cam, kede dok cammogo ocele me dwoko lao iyo, pi papagi.

²⁴Yucepu te doŋ cwayo omego mere wot. A doŋ gin aya, Yucepu te cikogi ni, “Kur ida wunu i yo ba.”

²⁵Gin te ya oko i Miciri, dwogo baŋ papagi i Kanaan.

²⁶Gin te titte ni, “Yucepu pwod tye kwo, en aloc me Miciri luŋ.” Tipo kome te riŋo oko, pien onwoŋo mom ru oye kopgi.

²⁷Cite i kare ame gin doŋ otitte kop luŋ i kom Yucepu, kede kite ame ocikogi kede, kede dok ka oneno gadigadi ame Yucepu ocwao me tiŋe, tipo kom papagi doŋ te cako dwogo.

²⁸Icrael doŋ te kobo ni, “Doŋ otum, woda Yucepu kara pwod tye kwo; abino wot nene a mom ru ato.”