Read lango Agege 46 Bible Online

Agege 46 - lango bible

Agege 46

¹Icrael te cako wot kun tero jami mere luŋ a rik etye kede. Obino i Beer-ceba omio iye gi-tum me yalo Obaŋa a pappere Icaka.

²Obaŋa te kop Icrael i lek kun lwoŋe ni, “Yakobo, Yakobo.” En te gamo ni, “An ene.”

³Okobbe ni, “An Obaŋa, Obaŋa a pappi, kur ilwor wot i Miciri, pien abino miyo idoko rok adwoŋ kuno.

⁴Abino wot kedi naka i Miciri, dok daŋ abino dwoggo yin; ciŋ Yucepu bino wumo waŋi.”

⁵Yakobo te doŋ ya wot oko i Beer-ceba, kun awobe mere tiŋe kede gadigadi a rik Parao ocwao me tiŋe, karacel kede itino atino, kede mon,

⁶Gin otero limgi kede jamigi luŋ a rik gin onwoŋo i lobo me Kanaan, owoto kede i Miciri; gin otero Yakobo kede itino mere kede ikwae ducu.

⁷Awobe me re kede awobe awobe mere, kede anyira mere, kede anyira awobe mere. Itino mere kede ikwae, gin luŋ rik oterogi i Miciri.

⁸Man nyiŋ ikwae Icrael a rik owoto i Miciri, Yakobo kede awobe mere: atin a Yakobo me kao, Reuben.

⁹Itino a Reuben ene: Kanok, Pallu, Kejeron, kede Karmi.

¹⁰Itino a Cimeon ene: Jemeul, Jamin, Okad, Jakin, Jokar kede dok Caul, ame obedo awobi a dako me Kanaan.

¹¹Itino a Levi ene: Gercon, Kokat, kede Merari.

¹²Itino a Juda ene: Er, Onan Cela, Perej, kede Jera (ento Er kede Onan te to oko i Kanaan). Itino a Perej ene: Kejeron kede Kamul.

¹³Itino Icakar ene: Tola, Puwa, Iob, kede Cimeon.

¹⁴Itino a Jabulon ene: Cered, Elon, kede Jaleel.

¹⁵Magi-nono gin itino awobe ame Lea onywalo baŋ Yakobo i Paddan-aram karacel i nyare Dina; wel itino awobe kede anyira onwoŋo romo pyeradek wie adek.

¹⁶Itino a Gad ene: Jipion, Kaggi, Cuni, Ejibon Eri, Arodi, kede Areli.

¹⁷Itino Acer ene: Imuna, Icva, Icvi, Beria kede amingi Cera. Itino a Beria ene: Keber kede Malkiel.

¹⁸Magi itino a Jilpa, aŋeca ame Laban rik omio baŋ nyare Lea. En onywali Yakobo itino apar wie abicel.

¹⁹Itino a Lakeri dako a Yakobo ene: Yucepu kede Benjamin.

²⁰Yucepu onywalo Manace kede Epraim i lobo me Miciri, ame Acinaci nyaka a Potipera alamdog me On onywalo.

²¹Itino a Benjamin ene: Bela, Beker, Acibel, Gera, Naaman, Eki, Roc, Muppim, Kuppim kede Arud.

²²Magi-nono gin itino ame Lakeri onywalo baŋ Yakobo; itino awobe luŋ apar wie aŋwen.

²³Wot a Dan obedo Kucim.

²⁴Itino a Naputali ene: Jajeel, Guni, Jejer kede Cillem.

²⁵Magi gin itino ame Bila onywalo baŋ Yakobo, aŋeca ame Laban rik omio nyare Lakeri. Itino awobe luŋ rik gin abiro.

²⁶Jo ot a Yakobo luŋ ame rik en owoto kedgi i Miciri, a rik itino mere kede ikwae ikokome, kun mom okwano iye mon itino awobe a Yakobo, gin luŋ rik oromo pyerabicel wie abicel.

²⁷Itino awobe ame rik Yucepu onywalo i Miciri rik tye aryo. Jo ot a Yakobo a rik owoto i Miciri luŋ rik doŋ oromo pyerabiro.

²⁸Yakobo ocwao Juda i nyim, baŋ Yucepu, me nyuttigi yo awoto Gocen; gin te tuno i Gocen.

²⁹Yucepu te yiko gadigadi mere me wot rwatte i pappere i Gocen, eka te wot nyutte kene baŋ pappere, te kwako ŋute pi kare alalac kun kok.

³⁰Icrael okobbi Yucepu ni, “To gire doŋ bin, pien doŋ aneno waŋi, aniaŋ doŋ ni kara pwod itye kwo.”

³¹Yucepu te kobbi omego mere kede jo me ot a pappere ni, “Adok, awot titti Parao, abino kobbe ni, ‘Omegona kede jo me ot a pappa a rik tye i lobo Kanaan, doŋ otyeko bino baŋa.

³²Jonono gin okwat, pien yam gin gigi okwat cakere con, dok aman daŋ gin obino i limgi kede jamigi luŋ.’

³³Ka Parao bino lwoŋowu, te penyowu ni, ‘Wun itio wunu tic aŋo?’

³⁴Wun myero idokke wunu ni, ‘Omironi okwat cakere con i kare me tinowa tuno kede atot onyoni, wan karacel kede kwariwa.’ Man bino miyo ibedo wunu i Gocen; pien jo ame okwat luŋ obedo me kwer baŋ jo Miciri.”