Read lango Agege 47 Bible Online

Agege 47 - lango bible

Agege 47

¹Yucepu te wot titti Parao ni, “Pappa kede omegona, karacel i limgi luŋ, gin doŋ obino oko i lobo Kanaan; aman doŋ gin tye i Gocen.”

²En otero jo abic i akina omego mere, onyutogi baŋ Parao.

³Parao openyogi ni, “Wun itio wunu tic aŋo?” Gin ogamo ni, “Wan omironi wan okwat gire bala kwariwa.”

⁴Gin dok te kobbi Parao ni, “Wan doŋ obino me bedo i lobo-ni pien kan ame omironi myero kwa iye limgi mom tye; kec doŋ onwoŋo okur atek meicel i Kanaan, aman doŋ timwa ber, iwek wan omironi obed i Gocen.”

⁵Parao te kobbi Yucepu ni, “Pappi kede omegoni doŋ obino baŋi.

⁶Lobo Miciri tye i ciŋi, ket pappi kede omegoni bed i lobo aber akato luŋ; migi obed i Gocen. Ka ce iŋeo jo moro i akinagi ame ryek, migi obed jo ame gwoko limma.”

⁷Yucepu dok te kelo pappere i nyim Parao, Yakobo te lammi Parao winyo.

⁸Parao te penyo Yakobo ni, “Yin ce doŋ iri i lobo mwakki adi?”

⁹Yakobo ogamo ni, “An doŋ a perakino i lobo mwakki mia acel i pyeradek, mwakana luŋ ame abedo kede kwo i lobo pwod nok dok daŋ opoŋ i can; mom rom i mwakki ame kwarina ori kede i lobo kun oloŋo piny.”

¹⁰Yakobo te lammi Parao winyo, te ya oko i nyim Parao.

¹¹Yucepu te miyo pappere kede omego mere kabedo i lobo Miciri, kan ame ber meicel kato kan ocele, i Ramecec, kite ame Parao ociko, kun miogi lobogi

¹²Yucepu te poko cam baŋ pappere, omego mere, kede jo me ot a pappere, kun lubo wel jo ame gin tye kede.

¹³I kare-nono onwoŋo cam doŋ mom i lobo luŋ, kec onwoŋo doŋ okur atek meicel, man omio kec onyono jo luŋ me Miciri kede me Kanaan.

¹⁴Yucepu ocoko lim luŋ ame tye i Miciri kede i Kanaan, ame jo obedo wilo i cam, te tero luŋ baŋ Parao.

¹⁵Kare ame lim doŋ otum oko i ciŋ jo Miciri kede Kanaan, jo Miciri luŋ te ciro baŋ Yucepu, te kobbe ni, “Miwa cam; wan otwero to niŋo kun yin inenowa? Pien limwa doŋ otum oko.”

¹⁶Yucepu te gamo ni, “Miwa wunu lim akwo me an aluny miyowu cam, ka centewu doŋ otum oko.”

¹⁷Gin te cako kelo lim akwo baŋ Yucepu, Yucepu te lunyo miyogi cam pi aguraguragi, rommigi, dokgi kede kanegi. Yucepu te miyogi cam i mwakanono, pi limgi luŋ aluŋa.

¹⁸A doŋ mwaka-nono otum, gin dok odwogo baŋe i mwaka a lubo mannono, ote kobbe ni, “Adwoŋwa, wan mom doŋ otwero munŋi kopporo kadi acel, limwa acalo cente doŋ otum oko iweŋ, limwa akwo daŋ doŋ odoko me adwoŋwa oko, ginnoro ame doŋ odoŋ i ciŋwa mom tye kadi acel kono ka komwa kede lobowa.

¹⁹Wan karacel i lobowa myero oto kun yin itye inenowa anena? Yin myero i wilwa i cam karacel kede lobowa daŋ, wan giwa oye bedo opii a Parao. Miwa koti me kur oto ento obed kwo; me lobo kur doŋ nono.”

²⁰Mannono omio Yucepu owilo lobo me Miciri luŋ obedo mea Parao, pien jo Miciri luŋ ocato pottigi oko, pi kec ame onwoŋo rik okur atek. Lobo luŋ te doko doŋ mea Parao.

²¹Jo luŋ doŋ te doko opii, cakere i ŋet lobo tuŋ cel tuno kede tuŋ ocele.

²²Lobo olamdog keken en a rik odoŋ a mom owilo, pien olamdog rik onwoŋo tye i camgi ame Parao en ame mio; gin obedo camo gin ame Parao miogi nono, en omio mom ote cato lobogi.

²³Yucepu dok te kobbi jo ni, “Nen, i kare ni an doŋ awilowu kede lobowu ducu pi Parao. Aman doŋ gam wunu koti icoo wunu.

²⁴I kare me kac, ibino wunu miyo acel me abic me gin ocek baŋ Parao, aŋwen me abic bino bedo megwu, me koti me acoa i pottiwu, kede me acamawu, wun karacel i jo me udiwu kede itinowu.”

²⁵Gin te gamo ni, “Adwoŋ, doŋ ilaro kwowa oko, berwa en a doŋ myero nen i nyimi, wan giwa doŋ obino bedo opii a Parao.”

²⁶Yucepu omio man odoko cik i lobo Miciri naka atot onyoni, Parao pwod tero acel me abic me ginnoro luŋ ocek. Lobo olamdog keken en ame mom odoko mea Parao.

²⁷Icrael obedo i lobo Miciri, i lobo me Gocen, limmere omedde, onya apol meicel kuno.

²⁸En obedo kuno mwakki apar wie abiro, mannono omio mwakki a Yakobo luŋ, ame en ori kede i lobo, oromo mia acel kede pyeraŋwen wie abiro.

²⁹A doŋ kare me to Icrael ceggi, olwoŋo wode Yucepu te kobbe ni, “Ka doŋ berra onen i nyimi, rwak ciŋi i te amurana wek icikere me bedo i gen kede ateni i koma. Kur iyika a Miciri,

³⁰ento imia abut karacel kede kwarina; tiŋ koma oko i Miciri iwot iyika kan ame oyikogi iye.” Yucepu te gamo ni, “Abino tiyo kit ame ikobo-nono”

³¹Icrael dok te kobo ni, “Aco doŋ kwoŋ ba.” Yucepu te kwoŋ, eka Icrael te kulo wie piny i wi tanda mere.