Read lango Agege 49 Bible Online

Agege 49 - lango bible

Agege 49

¹Yakobo olwoŋo itino awobe mere te kobbigi ni, “Cokere wunu karacel, me ati tiwu gin ame bino timere i komwu i kare ame tye i nyim.

²“Cokere wunu iwiny wunu, wun awo be a Yakobo, winy wunu kop a papawu Icrael.

³Yin Reuben ibedo atin kaona, yin itekona, i nyig tekona me agege, yin iloo pi wakere kede pi twer.

⁴Pi corre bala pii, mom ibino loyo pien yin iyito naka i wi kabuto a pappi; itimo-gu tim me kir iye, iyito kom i wi tandana!

⁵Cimeon kede Levi gin omego; pala lwenygi en a bino bedo gi-lwenygi.

⁶Tipona, kur iribere kedgi i cokeregi, yin cunya daŋ, kur inotte kedgi; pien akemogi omio oneko jo apol meicel, dok daŋ oŋoŋolo-glu odone a twoni me akaka.

⁷Akemogi-nono cen oko, pien gwa; akemogi oceno oko, pien ger! Abino popokogi i akina jo a Yakobo, abino keketogi atata i akina jo Icrael.

⁸Juda, yin omegoni bino paki; ciŋi bino bedo i ŋut okworri; itino a pappi bino ryebere piny i nyimi.

⁹Juda obedo atin eŋatu; atinna, iya mwodo lee, ite yito malo. En onyoŋo piny, obuto calo eŋatu, acalo min eŋatu, na kara a cunye tek me tuge?

¹⁰Abiro me loc mom bino ya i baŋ Juda, abiro loc mom bino ya i akina tyene, ituno ka wonnere bino tuno; en ame rok luŋ bino winyo koppere.

¹¹En tweo atin kana mere i kom olok, atin twonnere tweo i kom olok aberrere, atin twonnere tweo i kom olok aberrere, en lwoko rukkere i kono olok.

¹²Kono olok bino miyo waŋe bok pee, cak bino miyo lake doko tar kia.

¹³Jabulon bino bedo i dog nam, en bino doko ka dokoro a mele, wan lobo mere bino bedo Cidon twal.

¹⁴Icakar en kana atek, buto i akina anok rommi;

¹⁵oneno ka weo-nono ber, lobo mere daŋ ber; omio en onyogere me tino yec, odoko opii ame odio i tic atek.

¹⁶Dan bino ŋolo kop i kom jo mere acalo ŋat acel i akina atekere me Icrael.

¹⁷Dan bino bedo twol i ŋet yo, codocodo i dye yo, en bino toŋo opuny aguragura, kun mio ŋat obedo i wie rette ataro,

¹⁸Akuro lari giri, ama Rwot.

¹⁹Oyak jo bino yako Gad, cite Gad daŋ bino ryemogi, te yakogi.

²⁰Acer bino camo moo, en bino kelo cam ame mit oporre pi aloc.

²¹Naputali obedo min atil ame otwaro, en kobo kop amit.

²²Yucepu en jaŋ yat onyak, en jaŋ yat onyak meicel i ŋet akoŋ, jaŋe jany lak i cel.

²³Wegi atero oromo kede romo agwa meicel, gin ocelo en dok daŋ ololle meicel,

²⁴ento akud atero mere ocuŋ gire mot ikiŋ, omio ciŋe odoko amit oko, pi ciŋ Twon Ateko a Yakobo, pi nyiŋ akwat rommi, ame Kidi Icrael,

²⁵pi Obaŋa a pappi ame bino konyi pi Obaŋa Won Twer Ducu ame, bino winyo. Winyo ame ya i polo, winyo ame ya i kut atut oyabere i te lobo, winyo ame ya i tuno kede winyo ame ya i yic.

²⁶Winyo a pappi dwoŋ, loo winyo a kiddi ame parakino nakanaka oko, kede jami abeco a tye i wi tur a ri nakanaka. Gin luŋ bed i wi Yucepu, kede i tur nyime, en ŋat a rik opokere oko i akina omego mere,

²⁷Benjamin obedo epet ager, camo lee ame oneko odiko, otyeno poko lim ame omao.”

²⁸Magi-nono gin atekere Icrael apar wie aryo; kop ame papagi okobbigi ennono, i kare ame lammigi winyo, kun lammi ŋat acel acel gummere otike.

²⁹Yakobo te doŋ cikogi ni, “An doŋ adok nywako kabedo i kwarina, myero iwot iyika wunu baŋ kwarina i gorogoro ame tye i poto a Epron, dano me Kitti,

³⁰i gorogoro a tye i Makpela tuŋ kide me Mamre, i lobo me Kanaan, a rik Iburaim owilo karacel kede poto, i baŋ Epron, dano me Kitti, te doko mere me yik.

³¹Rik oyiko Iburaim kede dako mere Cara kuno. Icaka kede dako mere Lebeka daŋ oyiko kuno, an daŋ ayiko Lea kuno.

³²Poto-nono kede gorogoro a tye iye yam owilo i baŋ jo Kitti.”

³³Kare a Yakobo otyeko ciko awobe mere odolo tyene malo i tanda te omo cunye tyen me agikki mere, te to oko; owoto onywako kabedo i kwari mere.