Read lango Agege 6 Bible Online

Agege 6 - lango bible

Agege 6

¹Kare ame dano ocako medde i lobo, kun daŋ onywalo anyira,

²awobe Obaŋa ocako neno ni anyira a dano beco. Gin ocako yero mogo i akinagi, ote nyomo me bedo mongi.

³Rwot te kobo ni, “Cunya mom bino ri i kom dano nakanaka, pien en obedo kom nono, ento en bino ri pi mwaka mia acel kede pyeraryo keken.”

⁴Jo Nepili onwoŋo tye i lobo i kare-nono; icennere doki, i kare ame awobe Obaŋa odonyo baŋ anyira a dano, te nywalligi itino, onwoŋo gin daŋ tye. Magi gin twoni jo otego me kare-naca, ame nyingi rwo meicel.

⁵Rwot te neno ni bal ajo dwoŋ i lobo, dok pargi ducu me cuny opoŋ ka i paro pi timo gin arac keken.

⁶Cuny Rwot mom te bedo ayom pi tiyo dano i lobo, te cwero cunye meicel.

⁷Rwot te kobo ni, “Abino jwero dano ame rik aketo i lobo oko; dano kede leyi kede gin ame lak alaka, kede winy ame twarre malo; pien cunya doŋ mom yom pi ketogi.”

⁸Cite Rwot te pwoyo Nua.

⁹Man ikwae a Nua. Nua rik onwoŋo obedo dano a kite atira, ame ballere moro mom i akina jo me kare mere; Nua obedo tiyo gin ame Obaŋa mito.

¹⁰Nua rik tye kede awobe adek: Cem, Kam, kede Yafeci.

¹¹Lobo onwoŋo doŋ oballe oko i nyim Obaŋa, lobo onwoŋo olunyo poŋ i byemi.

¹²Obaŋa te neno lobo, onwoŋo doŋ oballe oko, pien ginnoro ducu ame onwoŋo tye kede kom onwoŋo oballe oko i kite ame gin bedo kede i lobo.

¹³Obaŋa te kobbi Nua ni, “Doŋ atyeko moko oko me tyeko ginnoro ducu ame tye kede kom, karacel kede lobo daŋ; pien lobo doŋ opoŋ i byemi pirgi.

¹⁴Paa yeeni adwoŋ i yat gofer, pok icika i yie, ite mwono yie kede yo ŋec ducu kede odok.

¹⁵Man en kite ame myero iti kede: bor a yee myero bed yadi mia acel kede pyerabic, eka borrere me malo te bedo futi pyeraŋwen wie kany.

¹⁶Tuc wan dirica i ye kun iweko malo odoŋ futi acel kede nucu. Ket doggola i laŋet yee, eka ite poko yie adek, kabedo i pinnyere, kabedo me aryo mere kede kabedo me adekkere.

¹⁷Pien abino coro abwal pii adwoŋ meicel i lobo, me tyek ginnoro ducu i te polo, ame tye kede kom, ame tye kede weo me kwo, me gin luŋ ame tye i lobo, to oko.

¹⁸Ento an abino cikere kedi; ibino donyo i yee, yin karacel kede itinoni kede dakoni, kede mon itinoni.

¹⁹Dok daŋ i kom ginnoro ducu ame tye kede kwo, ame tye kede kom, kwany aryo aryo i kom epone acel acel, ite cwayogi i yee, me gin bed kwo karacel kedi; twon kede mine.

²⁰Winy acalo eponegi tye, leyi acalo oponegi tye, gin ame lak alaka piny acalo eponegi tye, gin bino bino baŋi aryo aryo i kom epone acel acel, me gi bed kwo,

²¹Dok ter daŋ epone cam ducu ame ocamo, ite gwoko; mannono bino konyowu karacel kede gin, me acamawu.”

²²Nua daŋ te timo kittono; otio ginnoro ducu ame Obaŋa ocike tiyo.