Read lango Agege 7 Bible Online

Agege 7 - lango bible

Agege 7

¹Rwot te kobbi Nua ni, “Dony doŋ i yee, yin karacel kede jo me odi ducu, pien atyeko doŋ neno ni yin kiteni atira i nyima i akina jo me kare man.

²Ter leyi ame ocamo abiro abiro, twonnere kede mine; kede leyi a mom ocamo aryo aryo, twonnere kede mine.

³Ter daŋ winy ame twarre malo abiro abiro, co kede mon me gwoko eponegi bed kwo i lobo ducu.

⁴Pien odoŋ doŋ nino abiro, abino miyo kot cwe i lobo pi nino pyeraŋwen, dyeceŋ kede dyewor; ginnoro luŋ ame kwo ame rik atio, abino rweyogi oko i lobo.”

⁵Nua te tiyo ginnoro luŋ ame Obaŋa ocike tiyo.

⁶I kare ame twon abwal pii ocorre i lobo, Nua onwoŋo doŋ oromo mwaka mia abicel me dittere.

⁷Eka Nua kede dako mere, kede awobe mere te donyo i yee me bwot i twon abwal pii,

⁸Leyi ducu ame ocamo kede a mom ocamo, kede winy, kede gin ame lak alaka piny,

⁹gin ducu odonyo iyi yee karacel kede Nua, kun odonyo aryo aryo, en ico kede en a dako, kite ame Obaŋa rik ociko kede Nua.

¹⁰I ŋe nino abiro, twon abwal pii te corre i lobo.

¹¹I mwaka me mia abicel me dit a Nua, i dwe me aryo, nino dwe apar wie abiro, i nino-nono waŋ pii atut luŋ ame tye piny te tutuca oko, polo daŋ te tutuca oko.

¹²Kot te corre i lobo nino pyeraŋwen, dyeceŋ kede dyewor benebene.

¹³I nino-nono ikome, Nua kede awobe mere Cem, Kam kede Yafeci, kede dako mere en Nua, karacel kede mon awobe mere adek, odonyo iyi yee,

¹⁴gin karacel kede leyi ducu me tim acalo eponegi tye, kede leyi ducu me paco acalo eponegi tye, kede ginnoro luŋ ame lak alaka acalo eponegi tye, kede winy ducu acalo eponegi tye, winy ducu ame papat.

¹⁵Kom ducu ametye kede weo me kwo odonyo iyi yee aryo aryo karacel kede Nua.

¹⁶Co kede mon me kit ginnoro ducu ame odonyo iyi yee, odonyo i kite ame Obaŋa ociko kede Nua; eka Rwot tecegogi oko iyiyee.

¹⁷Twon abwal pii te bedo corre i lobo pi nino pyeraŋwen. Pii omedde poŋ, te tiŋo yee malo ame bor abora kede lobo.

¹⁸Pii te cerre, te medde poŋ adwoŋ meicel i lobo; eka yee te bedo lyero alyera i wii pii.

¹⁹Pii te cerre atek meicel i lobo, ame te wumo kiddi adoŋo ducu ame tye piny i te polo.

²⁰Pii te medde cerre malo i wi kiddi adoŋo kun kato kiddi adoŋo yadi abiro kede nucu twal.

²¹Ginnoro ducu ame onwoŋo tye kede kom, ame onwoŋo woto i lobo te to oko: winy, leyi me paco kede leyi me tim, kede ginnoro ducu ame nya corre i lobo, karacel kede dano daŋ, gin ducu oto oko.

²²Ginnoro ducu ame onwoŋo tye kede kwo, ame bedo i wi tela oto oko.

²³Obaŋa orweo ginnoro ducu ame tye kede kwo, ame onwoŋo tye i lobo, dano, kede leyi, gin ame lak alaka kede winy ame twarre malo; gin luŋ orweogi oko i lobo. Nua keken kede jo ame rik tye kede iyi yee en ame odoŋ.

²⁴Pii te ri i lobo pi nino mia acel kede pyerabic twal.