Read lango Agege 8 Bible Online

Agege 8 - lango bible

Agege 8

¹Obaŋa te po ni Nua karacel kede leyi ducu me tim, kede leyi ducu me paco, ame onwoŋo tye karacel kede iyi yee. Obaŋa omio yamo okodo i lobo eka pii te ero dwono oko.

²Pii atut ame tye piny, kede kan otutuca i polo, te cegere oko, kot ame onwoŋo corre i polo te cok oko,

³pii i lobo te medde dwono. I agikki me nino mia acel kede pyerabic, pii onwoŋo doŋ owaye odok piny.

⁴I dwe me abiro, nino mere apar wie abiro, yee te gem oko i wi kidi adwoŋ me Ararat.

⁵Pii omedde dwono naka i dwe me apar. I dwe me apar, wi kiddi aboco mege te cako nen oko.

⁶Kare ame nino pyeraŋwen doŋ akato, Nua oyabo waŋ dirica a rik etuco i yee,

⁷te cwayo agak oko. Agak te bedo twarre kun wirre tuŋŋi i tuŋŋi tuno waŋ ame pii otwo oko i wi lobo.

⁸Nua dok te cwayo amam me wot neno ka pii odwono oko i wi lobo.

⁹Ento amam mom te nwoŋo kakannoro ame etwero cibo iye tyene, te dok gire oko iyi yee baŋ Nua; pien onwoŋo pii pwod tye okwaŋ i wi lobo luŋ. Nua te ryeyo ciŋe, make dwoke iyi yee baŋe.

¹⁰Nua dok te kuro nino pyeraŋwen ocele, te cwayo amam oko doki iyi yee.

¹¹Amam te dok baŋe a doŋ piny oyuto, kun otiŋo pot jeituni adyaka i doge. Mannono omio Nua oniaŋ ni pii doŋ odwono oko i wi lobo.

¹²Nua dok te medo kuro pi nino abiro ocele, te dok cwayo amam, cite naka mom omedo i dwogo baŋe atwal.

¹³I mwaka me mia abicel kede acel me dit a Nua, i dwe me agege, nino dwe acel, onwoŋo pii doŋ otyeko dwono oko i wi lobo. Nua te cako puto wi yee oko, te neno piny, oneno wi lobo doŋ otwo oko.

¹⁴I dwe me aryo, nino dwe pyeraryo wie abiro, ame onwoŋo lobo doŋ otwo oko,

¹⁵Obaŋa okobbi Nua ni,

¹⁶“Ya doŋ iyi yee oko, yin kede cegi kede awobeni kede mongi.

¹⁷Kel jami ducu ame kwo ame tye baŋi, winy, leyi me paco kede ginnoro ducu ame lak alaka i lobo, me gin nya, medde, dok onywal ocorre apipim i wi lobo.”

¹⁸Mannono te miyo Nua donyo oko kede awobe mere, kede dako mere, kede mon awobe mere;

¹⁹kede leyi ducu, kede ginnoro luŋ ame lak alaka, kede winy luŋ. Gin jami nono luŋ ame woto i wi lobo, te ya oko iyi yee, ote ciro donyo oko kun olubere eponegi.

²⁰Nua te cano keno me miyo lam baŋ Rwot eka te yero leyi kede winy ame ocamo, te waŋogi i kom keno me lam, yalo Rwot.

²¹Ka Rwot oŋweo gin a ŋwece kur, okobo i cunye kene ni, “Mom dok abino medo ceno lobo pi dano ame tammere ogom oko i rac cakere i tino mere; mom dok abino medo neko gin akwo luŋ kite ame doŋ atyeko timo.

²²Ka lobo pwod bino bedo tye, kare me coc kede kare me kac, kare me koyo kede kare me lyeto, kare me oro kede kare me iporo, dyeceŋ kede dyewor mom bino gik.”