Read lango Agege 9 Bible Online

Agege 9 - lango bible

Agege 9

¹Obaŋa omio Nua kede awobe mege winyo kun kobo ni, “Nywal, imedde, ipon wunu lobo.

²Leyi ducu me tim kede winy a twarre malo bino lworowu i myelkom, karacel kede ginnoro luŋ ame lak alaka, kede en ame mol amola i wi lobo, kede rec luŋ me nam; gin luŋ otyeko miyogi i ciŋwu.

³Gin akwo luŋ ame woto, bino bedo me acamawu; acalo rik amiowu pot dek, amiowu doŋ jami ducu.

⁴Kadi amonnono, mom myero icam wunu riŋo ame remo pwod tye iye, pien remo en kwo mere.

⁵Ka ce oonyo remowu, an abino pido pire; abino pido pire baŋ lee moro keken kede baŋ dano. Ŋat ame okwanyo Olev. Lodo kwo a ŋat ocele, an daŋ abino mito kwo mere.

⁶Ŋattoro ducu ame oonyo remo a dano, obino miyo dano daŋ onyo remo mere, pien Obaŋa ocweo dano i callere ikome.

⁷Wun nywal, inya, imedde wunu i wi lobo.”

⁸Obaŋa dok te kobbi Nua karacel kede awobe mere ni,

⁹“Nen, an ikoma amoko cikerena kedwu karacel kede ikwaewu ame bino lubowu,

¹⁰kede ginnoro akwo luŋ ame tye baŋwu; winy a twarre malo, leyi me paco kede me tim, kede ginnoro ducu ame tye kede kwo ame idonyo karacel kedgi iyi yee.

¹¹Amoko doŋ cikerena kedwu, me mom dok medde tyeko jami ducu ame tye kede kom kun atyeko kede twon abwal pii. Pii mom dok bino medde poŋ, ame balo lobo luŋ.”

¹²Obaŋa dok te kobo ni, “Man en gin anyuto cikerena ame acikere kede kedwu, kede ginnoro akwo luŋ ame tye baŋwu. Cikere ame bino ri atwal pi lwagi jo me kare luŋ ame tye i nyim.

¹³Atyeko keto etaloka i pol ame bino nyuto cikerena kede lobo.

¹⁴Ka ce abino miyo polo wumere oko i pol, etaloka bino nen i pol,

¹⁵mannono bino poyo wia i cikerena ame tye i akina an kede wun, kede gin akwo ducu, kede ginnoro luŋ ame tye kede kom i lobo. Pii mom dok bino wukere ame romo tyeko lobo.

¹⁶Etaloka bino bedo i pol, ame ka an aneno abino poyo cikere ame bino bedo nakanaka i akina an kede gin akwo luŋ ame tye kede kom i wi lobo.”

¹⁷Obaŋa te kobbi Nua ni, “Man en gin a nyuto cikere ame amoko i akina an kede ginnoro luŋ ame kwo i wi lobo.”

¹⁸Itino a Nua ame oya iyi yee onwoŋo Cem, Kam kede Yafeci, Kam en ame rik obedo papa a Kanaan.

¹⁹I kom itino a Nua adek-ki en ame lwak luŋ me wi lobo oya i komgi.

²⁰Nua rik en ogeo bedo apur. En opito poto olok,

²¹te mato koŋo olokkere, te mer oko, eka te buto onoro i kema mere.

²²Kam, papa a Kanaan, te neno pappere onoro, eka te titti omego mere aryo ame onwoŋo tye oko.

²³Cem kede Yafecite kwanyo boŋo keto i wi gwokgi gin aryo luŋ, ote wot kun ojer i ŋegi, ote wumo papagi oko ame onwoŋo tye onoro; kun gin gigi mom oneno papagi onoro pien waŋgi onwoŋo oneno teŋe.

²⁴Ka Nua oco kun koŋo oket oko i kome, te niaŋ gin ame wode me cogo otimo i kome,

²⁵okobo ni, “Kanaan oceno oko; en bino bedo opii meicel i akina opii omego mere.”

²⁶Dok te kobo ni, “Ama Rwot, mi winyo koma Cem; mi Kanaan bed opii mere.

²⁷‘Obaŋa nyayi Yafeci kabedo, me en bed i kema a Cem; Kanaan bed daŋ opii mere.’ ”

²⁸A doŋ abwal pii ame ocorre i lobo ogik oko, Nua dok omedde ri i lobo pi mwakki mia adek kede pyerabic.

²⁹Mwaka a Nua luŋ ame ori kede i lobo te to, romo mia aboŋwen kede pyerabic nono.