Read lango 2 Camwiri 1 Bible Online

2 Camwiri 1 - lango bible

2 Camwiri 1

¹Kare ame Caulo doŋ oto oko, ame Daudi doŋ oloo jo Amalek, te dwogo tyeko nino aryo i Ciklag.

²Orwo mere lo moro te bino ame oya i gony a Caulo, kun boŋo mere oyeyeca, dok daŋ ojujuko wie kede lobo. Kare ame en otuno baŋ Daudi, en oryebere piny i nyime pi wore,

³Daudi te penye ni, “Yin kara iya i kwene ba?” En te dok iye ni, “An kom abwot abwota i gony a jo Icrael.”

⁴Daudi dok te penye ni, “Koŋ doŋ ititta gin ame otimere kuno; obedo ni ŋo ba?” En te gamo ni, “Monywa ogweo ŋwec oko i lweny, cite oneko daŋ jo apol meicel; Caulo kede wode Yonacan daŋ oto oko.”

⁵Daudi dok te penyo awobi-nono ni, “Kara yin iŋeo niŋo ni Caulo kede wode Yonacan oto oko?”

⁶Awobi-nono te gamo ni, “An onwoŋo atye i wi kidi me Gilboa, ate neno Caulo kun tye ojeŋere i kom toŋŋere, kun gadigadi lweny kede wegi aguragura ame aryemo yore doŋ ceggi acega.

⁷Kare ame Caulo obolo waŋe i ŋee, en onena, te lwoŋa. An ate gamo ni, ‘An ene.’

⁸En te penya ni, ‘Kara yin iŋa?’ An ate gamo ni, ‘An a dano me Amalek.’

⁹En te kobba ni, ‘Tim ber ibin idopa oko, pien rem ociro oko kun kwona pwod tye.’

¹⁰Mannono te miya wot doppe oko, pien onwoŋo doŋ aniaŋ ni mom twero kwo, kite ame onwoŋo doŋ otyeko rette piny oko-ni. An doŋ ate kwanyo tokkere me kwogo ame onwoŋo tye iwie, kede ogul ame tye i bade, en akelogi baŋi kan, adwoŋŋa?”

¹¹Daudi te mako boŋŋi mere, te yeyeco oko; jo a rik tye baŋe, te daŋ timo kittono.

¹²Gin te kumo kun okok, dok daŋ ori kec pi Caulo, kede wode Yonacan, tuno naka otyeno kede pi jo Icrael, ame gin obedo lwak a Rwot, pien jo apol meicel i akinagi onwoŋo oneko oko i lweny.

¹³Daudi te dok penyo awobi ame okelle kop ni, “Yin kara iya ikwene ba?” En te gamo ni, “An atin arokkoro ame bedo i akinawu, ame abedo dano me Amalek.”

¹⁴Daudi te kobbe ni, “Piŋo yin mom ibedo kede lworo me ryeyo ciŋi neko ŋat ame Rwot oyero?”

¹⁵Daudi te lwoŋo ŋat acel i akina awobe mere, te kobbe ni, “Nek lo-nu oko.” Awobinono te cobe, te neke oko.

¹⁶Daudi te kobbi ato ni, “Remoni bed giri i wii; pien yin iŋolo kop i komi keni, pi kobo ni, ‘Atyeko neko ŋat ame Rwot owiro kede moo’.”

¹⁷Daudi te cako wero wer man kun koko kede Caulo kede wode Yonacan,

¹⁸dok daŋ te ciko ni myero pwony kede jo Juda. Kop man ote coyo i buk a Yacar. Werrere-nono woto kit man:

¹⁹“Ama wun jo Icrael, kwogowu oneko i wi kidi malo! Twoni jo atek meicel doŋ obuto oko piny!

²⁰“Myero kur tit pire i Gat, myero daŋ kur lal koppere i dye boma me Acikelon, me anyira me Piriciti kur lel, kede anyira a jo a mom woro Obaŋa daŋ kur lel,

²¹Obaŋa myero kur mi kot kede toyo gud kidi me Gilboa pii a tye piny i te lobo daŋ kur kato oko, Pien kwot a jo atek opoto piny kuno i lewic, kwot a Caulo doŋ okwor atek, mom oweo i moo.

²²“Akud atero a Yonacan onwoŋo lyet calo mac apoka, pala lweny a Caulo yam onwoŋo gwa meicel, gin luŋ yam mom dwogo nono aboŋo remo i komgi, dwol twoni jo atek yam mom rwenyo i komgi.

²³“Caulo kede Yanacan yam twon jo moro ba! kite ame yam amarogi kede! Gin yam onywako kwo karacel, tuno naka i to, Jo mere yam dwir kato cur oko, dok otek okato eŋatu oko.

²⁴“Mon me Icrael, kok wunu Caulo! ame yam omiowu irukere wunu meicel i dok odeo rukwu kede jabu.

²⁵“Twoni co atek i lweny obuto oko piny, i dye lweny ba! “Yonacan oneko, obuto piny i wi kidi malo.

²⁶Cunya owaŋ meicel piri, ominna Yonacan; onwoŋo yam iyomoro cunya meicel; kite onwoŋo imara kede, koba tek, kato kite a man mar kede jabu.

²⁷“Twoni co atek i lweny obuto oko piny ba! Jami lwenygi te doŋ kun oket atata!”