Read lango 2 Camwiri 10 Bible Online

2 Camwiri 10 - lango bible

2 Camwiri 10

¹Ame man doŋ otum oko, abaka a jo Ammon te to oko, wode Kanun te doko abaka, leyo kakare.

²Daudi te kobo ni, “An abino bedo aber wan i Kanun wot a Nakac, kite ame yam pappere daŋ obedo keda aber.” Daudi te cwayo omiro mere baŋe me wot kweyo cunye; omiro a Daudi te wot i lobo a jo Ammon.

³Ento odoŋe a jo Ammon te kobo baŋ adwoŋgi Kanun ni, “Yin itamo ni Daudi ocwao okwena me kweyo cunyi ateni, me miyo pappi kwogo. Daudi mom ocwao omiro mere me bino roto kede ŋiŋio bomawa, me wek ema oko?”

⁴Mannono te miyo Kanun mako omiro a Daudi, te lyelo yer tikgi tun cel oko, daŋ te ŋoŋolo boŋŋigi oko i kwon dudgi, eka te doŋ cwayogi wot.

⁵I kare ame kop man owinyere baŋ Daudi, en ocwao jo me wot rwatte kedgi, pien lewic onwoŋo omako omiro merenono meicel. Abaka okobbigi ni, “Koŋ doŋ ibed wunu i Jeriko, tuno waŋ ame yer tikwu olot, eka ite doŋ dwogo wunu.”

⁶Kare ame jo Ammon oneno ni nyingi doŋ ŋwe aŋwea baŋ Daudi, gin ocwao okwena me wot paŋo jo lweny me Curia ame bedo Bet-rekob kede jo Curia ame bedo Joba, ote paŋo cirikale awot i tyengi pyeraryo, abaka me Maaka kede jo mere tutumia acel, kede jo me Tob tutumia apar wie aryo.

⁷Kare ame Daudi owinyo kop man, en ocwao Yoab kede monyere luŋ ame onwoŋo tek meicel i lweny.

⁸Jo Ammon te dorre wot oko, ote wot ryeye i tyeŋ me lweny i nyim dogcel me donyo i boma. Aco jo Curia me Joba kede me Rekob, kede jo Tob, kede jo me Maaka onwoŋo tye gigi kengi i bar kannaler.

⁹Kare ame Yoab oneno ni mony tye i nyime kede i ŋee, en okwanyo ocirikale mogo me Icrael abeco meicel, te canogi i, nyim jo Curia.

¹⁰Jo odoŋŋere luŋ te miyogi i ciŋ ominnere Abicai, ame te canogi i nyim jo Ammon.

¹¹En te kobbi ominnere ni, “Ka ce ineno ni jo Curia amito loya oko, yin myero ibin ikonya; cite ka an abino neno ni jo Ammon amito loyi oko, an abino bino me konyi.

¹²Yin myero ka ibed ame cunyi nwaŋ, me onyut cowa pi rokwa kede pi boma Obaŋawa; Rwot gire myero otim gin ame en oneno ni ber baŋe.”

¹³Yoab karacel i jo ame onwoŋo tye baŋe te doŋ wot anyim me wot lweny i kom jo Curia; jo Curia te mukere oko i ŋwec i nyimgi.

¹⁴Kare ame jo Ammon oneno ni jo Curia oriŋo oko, gin daŋ ote mukere gigi oko i ŋwec i nyim Abicai, ote donyo oko iyi boma. Yoab te dwogo doŋ oko cen i ka lweny i kom jo Ammon, te wot i Jerucalem.

¹⁵Cite i kare ame jo Curia oneno ni jo Icrael oloogi oko, gin luŋ ote cokere karacel.

¹⁶Abaka Adadejer te cwayo okwena wot kelo jo Curia ame onwoŋo tye loka i ŋe kulo Eufrate; gin rik te wot Kelam kun Cobak, atel wi mony abaka Adadejer, en ame telo nyimgi.

¹⁷I kare ame kop man owinyere baŋ Daudi, en ocoko jo Icrael luŋ karacel, te wot ŋolo kulo Jordan, te wot Kelam. Jo Curia te canne kuno, i tyen i nyime, me lweny kede; lweny daŋ te doŋ ere oko.

¹⁸Jo Curia te dok mukere oko i ŋwec i nyim jo Icrael; Daudi te neko jo Curia mia abiro ame riŋo i gadigadi kede wegi aguragura tutumia pyeraŋwen, te cobo daŋ Cobak, atel wi monygi oko, ame te to daŋ oko kuno.

¹⁹Kare ame obakki luŋ ame onwoŋo tye doŋ i te loc abaka Adadejer oneno jo Icrael ologi oko, gin doŋ te cako poro kop me bedo i kuc i jo Icrael. Gin doŋ te bedo ite locgi. Mannono te miyo jo Curia bedo i lworo me medde konyo jo Ammon.