Read lango 2 Camwiri 11 Bible Online

2 Camwiri 11 - lango bible

2 Camwiri 11

¹I kare ame oro geye agea, ame kare ame obakki maro ero iye lweny, Daudi ocawo Yoab, kun woto omiro mere, kede jo Icrael luŋ; gin te wot yako jo Ammon, ote daŋ mako boma me Rabba oko, Daudi onwoŋo odoŋ i Jerucalem.

²I nino moro acel otyeno, i kare ame Daudi oya i kabuto mere, te bedo wowota i wi ot abaka, en obolo waŋe i wi ot kuno te neno dako moro ame onwoŋo tye alwoko kome; dako-naca onwoŋo mwonya meicel.

³Daudi te cwayo lo moro me wot koŋ niaŋ i kom dako-nono. Lo moro te kobo ni, “Mannono gire Batceba nyaka a Eliam, dako a Uria, ame obedo dano me atekere a jo Kitti.”

⁴Daudi to oro okwena, ame te wot kwanye oko i kuno, ote kele baŋe, en te buto kede. Eka Batceba te dok tuŋe. I kare-nono dako onwoŋo pwod olwoko two dwe mere alwoka,

⁵Icennere dako oniaŋ ni eyac, en te cwayo kop baŋ Daudi ni yie tye.

⁶Daudi te cwayo kop baŋ Yoab ni, “Koŋ icwal Uria me Kitti bin baŋa.” Yoab daŋ te cwayo Uria baŋ Daudi.

⁷Kare ame Uria obino baŋe, Daudi open ye ka ce Yoab tye aber, kede karacel kede kite ame lwak tye kede, kede kite ame lweny tye ka wot kede.

⁸En doŋ te kobbi Uria, ni “Koŋ iwot iwe paco tuŋi.” Uria daŋ te ya oko lot abaka. Daudi te cwayo mot lubo yore.

⁹Cite Uria gire te buta i doggola me ot abaka kun buto karacel omiro adwoŋŋere luŋ; mom naka gire te tuno tuŋe.

¹⁰Kare ame okobbi Daudi ni, “Uria gire mom owoto tuŋe.” Daudi okobbi Uria ni, “Koŋ inen yin pwod idwogo adwoga i kannabor; piŋo kara mom iwoto tuŋi?”

¹¹Uria te kobbi Daudi ni, “Jo Icrael kede jo Juda tye teŋe i lweny, kun canduk a Rwot daŋ tye baŋgi kuno; adwoŋŋa Yoab kede omiro mere tye ka buta oko i bar; kara atwero wot nino tuŋa, ate wot cam, mate, kun abuto daŋ kede cega? Kite ame itye kede kwo-ni, dok kwoni daŋ pwod tye-ni, mom abino timo kodi tim man.”

¹²Daudi te kobbi Uria ni, “Tin koŋ doŋ ibed kan iwe iye, eka diki ate bino cwayi dok cen.” Uria te ri i Jerucalem i nino-nono kede orwo mere.

¹³Daudi olwoŋe, te wot cem kede, te pite daŋ i koŋo atek, cite en gire odok i kabuto mere baŋ omiro abaka; mom gire owoto tuŋe.

¹⁴Odiko mere, Daudi te coyo waraga baŋ Yoab, te miyo Uria tero.

¹⁵Kop ame en ocoo iyi waraga ene: “Ket Uria kan ame lweny tye alyet iye, eka yin ite dwogo giri oko cen me cobe neke oko.”

¹⁶Doŋ i kare ame Yoab tye ka guro boma, en te keto Uria kan ame en niaŋ ni okwor iye tek i lweny.

¹⁷Jo me boma-nono te kato lweny i kom Yoab, ote neko omiro a Daudi mogo oko; Uria ame obedo dano me Kitti daŋ ote neko oko.

¹⁸Yoab te cwayi Daudi kop kun titte kite ame lweny owoto kede;

¹⁹en okobbi akwena ame en ocwao ni, “Ka doŋ ityeko titti abaka kop ducu i kom lweny,

²⁰ka ce abaka yie owaŋ te penyi ni, ‘Piŋo kara omio iwoto wunu ceggi acega i boma me wot lweny iye? Wun onwoŋo mom iŋeo wunu ni gin twero celowu i wi cel malo?

²¹Ŋa ame rik obin oneko Abimeleki wot a Jerubecet? Mom dako moro keken en a rik obao twon anya kidi moro adit i wi cel malo te cele kede, ame te miyo en to i Tebej? Piŋo kara omio wun iwoto wunu aceggi acega i cel?’ Yin myero doŋ ikobbe ni, ‘Amironi Uria, dano me Kitti, daŋ oto oko’.”

²²Akwena-nono doŋ te wot titti Daudi kop ducu ame Yoab ore kede.

²³Akwena te kobbi Daudi ni, “Okwor olwenyo i komwa atek meicel, gin obino i komwa i dye bar, wan dok ote dwokogi i ŋwec naka i dogcelgi.

²⁴I kuno wegi atero te cako cecelo omironi kun obao aterogi i wi cel malo; mannono te miyo neko omironi mogo oko; amironi Uria daŋ ote neko oko.”

²⁵Daudi te kobbi akwena ni, “Myero iwot ikobbi Yoab ni, ‘Kur dok ibed paro gin ame otimere-nono, pien pala lweny gire mom yero, poto tuŋŋi kede tuŋŋi, yin myero imedde lweny i kom boma-nono, tuno waŋ ame imao oko.’ Cukoro cunye ba.”

²⁶Kare ame dako a Uria owinyo ni cware doŋ oneko oko, en okoko cware.

²⁷Ame en doŋ otyeko kare mere me kwero cola, Daudi te cwayo okwena, te wot kele doŋ i ode, te doŋ doko dako mere; dako-nono te nywale atin awobi. Cite gin ame onwoŋo Daudi otimo-nono mom oyomoro cuny Rwot.