Read lango 2 Camwiri 12 Bible Online

2 Camwiri 12 - lango bible

2 Camwiri 12

¹Rwot rik te cwayo Natan baŋ Daudi. Natan obino baŋe te kobbe ni, “Yam tye jo moro aryo ame gin luŋ bedo i boma acel, acel onwoŋo alonyo, acel onwoŋo acan.

²Alonyo onwoŋo tye kede lwak rommi, dyegi kede dok apipim;

³cite acan onwoŋo mom tye kede ginnoro, kono ka akale romo keken, ame onwoŋo daŋ en owilo awila. En owilo te kelo tuŋe, te pito doŋo i ciŋe kun bedo karacel itino mere. Romo mere-nono onwoŋo camo ŋid cammere, mato pii i kopo mere, buto-gu i kore; onwoŋo doŋ tye acalo nyare.

⁴I kare moro welo moro te coro alonyo, alonyo mom te ye kwanyo lee moro i akina limmere me tedo welo mere; akaka mege en dok te wot omo romo acan-ca, en ame te neki welo mere.”

⁵Akemo te mako Daudi meicel i kom dano ame okobo kop i komenono, en te kobbi Natan ni, “Kite ame Rwot tye kede kwo-ni, kodi dano ame otimo timmono porre to!

⁶En myero cul waŋ gin ame etero-nono tyen aŋwen twal, pien otimo kittono kun kica mom daŋ mako.”

⁷Natan te kobbi Daudi, ni “Yin ibedo dano-nono. Rwot Obaŋa me Icrael okobo ni, ‘An ayeri me bedo abaka ame loo Icrael, alari i ciŋ Caulo;

⁸an ate lunyo miyi ot adwoŋŋi i ciŋi, mon adwoŋŋi daŋ amiogi luŋ baŋi, ate daŋ miyo jo Icrael kede jo Juda. Ka ce man onwoŋo pwod nok anoka baŋi onwoŋo pwod dok atwero meddi en apol a rom mannono.

⁹Piŋo kara yin doŋ icao kop a Rwot, ite timo tim arac i nyime? Koŋ inen yin ineko Uria dano me Kitti, i pala lweny, yin ite tero dako mere bedo cegi, kun yin imio pala lweny a jo Ammon oneke oko.

¹⁰Nen ba, aman pala romo mom doŋ bino rwenyo i odi, pien yin icaa, ikwanyo dako a Uria, dano me Kitti, me bedo cegi.’

¹¹Mannono omio Rwot okobo ni, ‘Nen ba, abino doŋ miyo timmogo areco bino i komi kun amio ya gire i odi; abino kwanyo monni oko i baŋi kun yin daŋ ineno, ate lunyo miyo baŋ awotti, en bino buto kede monni i waŋ ceŋ.

¹²Pien yin rik itimo man imun, cite an abino miyo man timere iwaŋ cen i nyim jo Icrael luŋ.’ ”

¹³Daudi te kobbi Natan ni, “An doŋ atyeko timo bal i kom Rwot.” Natan te kobbi Daudi ni, “Rwot doŋ otyeko jwayo balli oko; mom doŋ ibino to.

¹⁴Kadi bed amannono, pi tim man ame yin itimo, ame cimo atira ni yin doŋ icao giri Rwot oko, atin ame onywalo-nono bino to oko.”

¹⁵Natan te wot gire oko tuŋe. Rwot te goyo atin ame dako a Uria onywalo baŋ Daudi, two te mako oko.

¹⁶Daudi te bedo bako doge baŋ Rwot pi atinnono, te kanyo kec; odonyo icika mere te wot buto piny i dye ot naka piny oru.

¹⁷Adwoŋ ame loo ode obino te cuŋ i laŋete kun mito ni en ya malo; cite mom otwerre, naka en daŋ mom ocamo ginnoro karacel kedgi.

¹⁸I nino me abiro mere, atin te doŋ to oko. Omiro a Daudi te bedo kede lworo me titte ni atin doŋ otyeko to oko; pien gin onwoŋo okobo ni, “Koŋ inen i kare ame atin onwoŋo pwod kwo, wan okobo kede, cite mom oye winyo kopwa; kara wan dok otwero kobbe nino ni atin doŋ oto oko? Naka mio en twero timo ginnoro arac i kome kene.”

¹⁹Kare ame Daudi oneno ni omiro mere tye amuŋo kengi kengi, en oniaŋ ni atin doŋ oto oko; en te penyo omiro mere ni, “Atin doŋ otyeko to oko?” Gin te gamo ni, “Oto oko.”

²⁰Daudi doŋ te ya oko malo i dye ot, te lwoko kome, wiro kede moo, te loko ruk onwoŋo tye i kome oko. En oya te wot i ot a Rwot, te wore; oya i kuno te wot doŋ atira naka i ode. En openyo cem, ote miye camo.

²¹Omiro mere te penye ni, “Man dok kodi gin aŋo ame yin itimo nie? Ikoko atin kun ikanyo kec i kare ame en pwod tye kwo, cite i kare ame atin oto, yin ite ya malo cako cem.”

²²Daudi te kobo ni, “Kare ame onwoŋo atin pwod kwo, akoke kun daŋ akanyo kec; pien onwoŋo akobo ni, ‘Ŋa kara aŋeo ka Rwot onwoŋo mom twero tima kica, te weko atin bedo kwo?’

²³Cite aman en doŋ oto oko; ŋo ame omio dok amedde kanyo kec? Atwero dok miyo en dwogo cen? An en ame abino lube kuno, cite en mom dok bino dwogo cen baŋa.”

²⁴Daudi te doŋ cako kweyo cuny dako mere Batceba; en odonyo baŋe, te wot buto kede; Batceba te nywalo atin awobi, Daudi te cako nyiŋe Culeman, Rwot te bedo kede mar i kom atinnono.

²⁵Rwot te cwayo kop baŋ adwarpiny Natan, te wot cako nyiŋ atinnono ni Jedidia, pien Rwot omare.

²⁶I kare-nono Yoab te bedo lweny i kom Rabba, ame en boma a jo Ammon, en te mayo boma adwoŋ ame abakagi onwoŋo bedo iye.

²⁷Yoab te cwayo kwena baŋ Daudi kun kobo ni, “Atyeko lweny i kom Rabba, amao daŋ boma me pii oko,

²⁸Yin myero doŋ icok jo ame odoŋ luŋ karacel, me ibin igur boma-nono, imak oko; naka mio an en ame amako boma-nono, ote doŋ lwoŋo kede nyiŋa.”

²⁹Mannono te miyo Daudi coko lwakkere, te wot i Rabba, te wot lweny i kome, mako oko.

³⁰En te kwanyo tok kwogo abakagi me jabu oko i wie; pekkere onwoŋo romo ratili mia acel; gweŋŋoro me wel onwoŋo tye i yie. Tokkono ote keto i wi Daudi. Daudi te daŋ kelo jami ame oyako i boma-nono adwoŋ meicel.

³¹Dok te daŋ kelo jo me kuno, te ketogi i tic, kun otio kede ocumeno, cururu me nyonyo, lee me nyonyo, dok daŋ otio tic atek me goyo matafali. Daudi obedo timo kittono i kom boma a jo Ammon luŋ. En doŋ te dwogo cen i Jerucalem karacel kede lwakkere.