Read lango 2 Camwiri 13 Bible Online

2 Camwiri 13 - lango bible

2 Camwiri 13

¹Abicalom wot a Daudi onwoŋo rik tye kede aminnere ame mwonya meicel, nyiŋe Tamali; wot a Daudi ocele a nyiŋe Amunon rik te cako bedo kede mit i kome.

²Mit adwoŋ meicel ame onwoŋo en tye kede i kom aminnere Tamali omio en oŋoye oko i kabuto ni kome lit; pien Tamali onwoŋo rik mom ru oŋeye kede lo moro, ame mio buto kede bedo tek meicel baŋ Amunon.

³Cite Amunon onwoŋo rik tye kede awottere ame nyiŋe Jonadab, wot a Cimea, ame obedo omin a Daudi. Jonadab onwoŋo obedo lo moro ame ryek meicel.

⁴En openyo Amunon ni, “Ama wot abaka piŋo kara yin nino ducu odiko, inen calo dano a kome mom yot? Piŋo kara mom ikobba?” Amunon te kobbe ni, “Mit en ame odia i kom Tamali, ame obedo amin ominna Abicalom.”

⁵Jonadab te kobbe ni, “Yin myero ibut oko piny i wi tandani ite bedo acalo ŋat a kome lit; doŋ ka pappi obino, me bino neni, yin myero ikobbe ni, ‘Mi aminna Tamali bin mia ogati moro me acama, en bin yik cammono baŋa kan, ate camo kun en omako i ciŋe.

⁶Amunon te daŋ buta piny, te bedo acalo ŋat a kome lit. Kare ame abaka obino me nene, Amunon okwao pappere ni, “Tim ber imi aminna Tamali bin teda capattoro baŋa kan, me acam kun en mako i ciŋe.”

⁷Daudi te cwayo kop baŋ Tamali kun kobo ni, “Wot i ot ominni Amunon, iwot iyike ginnoro me acama kuno.”

⁸Mannono te miyo Tamali daŋ te wot naka i ot ominnere Amunon, kan ame onwoŋo en obuto iye. Tamali te juko moko, te tedo kede capat baŋe kuno. En otedo ogati,

⁹te toko tero baŋe, cite en gire te kwero camo oko. Amunon te kobbe ni, “Koŋ imi jo luŋ ya oko i baŋa, owot oko.” Jo daŋ te ya gigi oko i baŋe.

¹⁰Amunon te doŋ kobbi Tamali ni, “Aco kella doŋ cam tyelo kan, me acam kun yin imako i ciŋi.” Tamali te tero capat ame etedonono naka iyi cika tyelo baŋ ominnere Amunon.

¹¹Cite i kare ame en doŋ okelo baŋe aceggi, me en cam, Amunon oyoro ciŋe te kobbe ni, “Biye, abut kedi aminna.”

¹²Tamali te kobbe ni, “Pe amannono ominna, kur imaka tetek; pien kodi tim man mom gire timere iyi Icrael. Kur itim tim me miŋe-ni ba ominna.”

¹³Kara an abino yeyo kodi lewicci adok kede tuŋ kwene ba? Nen, yin daŋ ibino bedo ŋat acel i akina omiŋo ame tye i Icrael. Tim ber ipeny abaka pira, aniaŋ ni en gire bino miya baŋi.’ ”

¹⁴Cite Amunon mom oye winyo koppere kadi acel; kite acalo en onwoŋo tek kato Tamali oko, omake tetek, te buto kede.

¹⁵Amunon dok te cako doŋ dago Tamali atek meicel; kite ame en odage kede kato kite ame onwoŋo en rik koŋ okwoŋo mare kede oko. Amunon te kobo ni, “Aco doŋ cuny ya, iwot oko.”

¹⁶Cite Tamali te gamo ni, “Pe amannono ominna; pien tim man arac, me cwaya oko tetek, rac kato en ame doŋ itimo oko i koma.” Cite Amunon mom oye winyo koppere kadi acel.

¹⁷En olwoŋo awobi mere ame onwoŋo tio baŋe, te kobbe ni, “Cwa dako-ni i nyima teŋe, ite cego doggola oko.”

¹⁸I kare-nono onwoŋo en oruko twon gomici moro abor naka piny kun daŋ bade boco, pien mannono en kit ruk a rik anyira abaka a mom ru oŋeye kede co ruko. Mannono daŋ te miyo amiro Amunon cwaye oko, te cego doggola oko.

¹⁹Tamali te juko wie kede buru, te yeyeco ruk i kome oko, okwako wie, te wot kun akoko.

²⁰Ominnere Abicalom te penye ni, “Ominni Amunon ce obuto kedi? Aco doŋ lin giri, aminna; en obedo ominni; kur doŋ ibed i parroro i gin a en otimo.” Mannono te miyo Tamali bedo kene aboŋo cware i ot ominnere Abicalom.

²¹Kare ame abaka Daudi owinyo kop magi ducu, akemo omako meicel.

²²Cite Abicalom mom te kobo kopporo baŋ Amunon, kadi aber onyo arac; pien Abicalom onwoŋo doŋ ocako dago ominnere Amunon pi buto aminnere Tamali tetek.

²³Kare ame mwaka aryo doŋ okato, Abicalom obedo i jo ame mworo yer i kom rommi i Baal-kajor, ame ceggi kede Epraim; en olwoŋo awobe abaka luŋ me wot kuno.

²⁴Abicalom owoto baŋ abaka, te wot kobbe ni, “Nen ba adwoŋ, an amironi atye kede omwor yer rommina. Tim ber, yin abaka karacel kede omironi, ibin wunu kuno.”

²⁵Cite abaka te kobbe ni, “Pe amannono atinna, ka wan luŋ owoto, obino miyi peko.” Abicalom te medo diye atek, cite en mom te ye wot, ento te lunyo lamme ka winyo.

²⁶Abicalom te dok medo kwayo ni, “Tim ber, ka yin mom iwot, imi ominna Amunon doŋ wot kedwa.” Abaka te penye ni, “Kara omio yin imito ni en wot kedwu kono?”

²⁷Cite Abicalom te medo diye, omio en te miyo Amunon kede awobe abaka luŋ wot karacel kede.

²⁸Abicalom te ciko omiro mere ni, “Nenu ka Amunon omato koŋo ame cunye doŋ yom; ka akobbiwu ni, ‘Cobe wunu’, kur ilwor wunu, neke wunu oko; wun ti wunu gin ame aciko. Di wunu cunywu, bed wunu atek.”

²⁹Omiro Abicalom te timo Amunon kite ame Abicalom ocikogi kede. Awobe abaka luŋ te ya oko malo, ŋat acel acel te yito i wi kana mere ŋwec oko.

³⁰Ame gin mom ru otuno paco, kop te tuno baŋ Daudi oko, ni “Abicalom oneko awobe abaka luŋ, ame moro i akinagi mom obwot.”

³¹Abaka oya malo, te yeyeoo ruk i ko me oko, te buto piny i lobo; awobe mere ame onwoŋo tye baŋe kuno, te daŋ yeyeco ruk i komgi oko.

³²Cite Jonadab, wot a Cimea ame obedo ominna Daudi, te kobo ni, “Adwoŋŋa myero kur tam ni doŋ otyeko neko awobe mere luŋ, pien Amunon gire keken en ame oto. Man en gin ame onwoŋo Abicalom oyiko con, cakere i kare ame Amunon obuto aminnere Tamali tetek.

³³Doŋ ba, adwoŋŋa abaka, myero kur dok ibed paro ni awobe ni luŋ doŋ oto oko; pien Amunon gire kene en ame oto.”

³⁴Abicalom te ŋwec gire oko. Awobi ame onwoŋo tye akuro piny te tiŋo waŋe malo, te neno jo apol meicel tye aciro abino i tutuŋ yo ame woto Koronaim, ame tye i ŋet kidi.

³⁵Jonadab te kobbi abaka ni, “Gin ame amironi okobo, ocobere gire oko, awobeni obino doŋ oko.”

³⁶Oyotoyot ame en doŋ otyeko kop, awobe abaka te tuno oko; gin luŋ ote mwoco koko oko. Abaka karacel kede omiro mere luŋ te daŋ kok atek meicel.

³⁷Abicalom te riŋo naka baŋ Talmai wot Amikud, ame abaka me Gecur, Daudi te bedo kumo pi wode pi kare alac meicel.

³⁸Mannono kite ame Abicalom oriŋo kede i Gecur, te wot bedo kuno pi mwakki ame romo adek.

³⁹Icennere abaka te cako bedo kede mit me wot baŋ wode Abicalom; pien cunye onwoŋo doŋ okwe oko pi Amunon, kite ame onwoŋo doŋ oto kede oko-ni.