Read lango 2 Camwiri 14 Bible Online

2 Camwiri 14 - lango bible

2 Camwiri 14

¹Yoab wot a Jeruya rik te niaŋ oko ni abaka doŋ ocako paro pi Abicalom.

²Yoab te cwayo kwena i Tekoa, ote wot kelo dako moro i kuno ame onwoŋo ryek atek, en te kobbe ni, “Por bedo acalo dano moro ame tye i twon kumo moro adwoŋ meicel, ruk boŋo me cola i komi; kur daŋ iwirre kede moo moro. Myero ibed kom acalo dako moro ame okumo pi dano mere oto pi kare alac meicel.

³Wot kittono i nyim abaka, iwot ikobbe kit man.” Yoab doŋ te cako porre kop ame emito ni en wot kobbi.

⁴Kare ame dako me Tekoa-nono owoto baŋ abaka, en oryebere, te buto piny aryeba cuny i nyim abaka, te woro abaka, kun kobbe ni, “Konya ba, Ama abaka.”

⁵Abaka te penye ni, “Peko aŋo ame itye kede?” En te gamo ni, “An abedo dako to, adwoŋŋa, cwara oto oko.

⁶Nen ba, an onwoŋo atye kede awobe aryo, doŋ nino moro acel gin te cako da kengi i poto, kun ŋattoro ame dwekgi mom tye; aŋat acel te goyo awottere neko oko.

⁷Aman dok wattina luŋ owiro wigi i koma kun okobba ni, ‘Miwa wodi ame oneko ominnere ca me wan daŋ oneke oko pi kwo ominnere ame en oneko’. Aco mannono bino miyo gin oneko ŋat a kono le jami oko, ame en doŋ tol acel keken ame alego kede; cwara daŋ te doŋ nono aboŋo nyiŋe, akadi ŋattoro mere moro ame odoŋ i wi lobo.”

⁸Abaka te kobbi dako-nono ni, “Aco yin doŋ dok giri paco tuŋi, an abino cwayo cik ame mako kop i komi.”

⁹Dako me Tekoa-nono te dok kobbi abaka ni, “Ama adwoŋŋa, abaka, bal me ginnoro luŋ ame ibino timo, myero bed gire i wia kede i wi jo me doggola a pappa; balloro myero gire kur gud abaka kede kom me loccere.”

¹⁰Abaka te gamo ni, “Ka ce ŋattoro otemo yelli, myero ikelle baŋa: abino miyo caco kakari atwal.”

¹¹Dakonono dok te kobo ni, “Ama adwoŋŋa, abaka, tim ber ikwon i nyiŋ Rwot Obaŋani, me wek lo aculo kwor meremo owek doŋ culo kwor kede remo, me kur nek woda.” Abaka te gamo ni, “Kite a Rwot tye kwo-ni, yer acelloro keken i wi atinni mom bino poto piny.”

¹²Dako te dok kobo ni, “Ama adwoŋŋa, abaka, tima ber doŋ akobbi kopporo acel keken.” Daudi te gamo ni, “Aco kobbi.”

¹³Dako-nono te kobbe ni, “Adwoŋ, kara piŋo yin dok ibedo kede tam me timo kodi timono i kom jo a Rwot? Pien kop ame ikobonono, mio abaka ŋolo kop i kome kene, ka ce abaka mom twero ye ŋat ame en oryemo dwogo paco.

¹⁴Wan luŋ gire obino to oko, wan orom aroma kede pii ame ony piny, ame mom dok romo twomere, cite Obaŋa gire mom bino kwanyo kwo a ŋat ame yenyo yo, me wek dano ame oryemo kur bed ŋat ame oryemo atwal.

¹⁵Doŋ ba, adwoŋŋa, an abino me kobo kop man baŋi, pien jo obedo miya bedo ŋat a lwor; an aŋecani ate tamo ni myero abin atit kop man baŋi, gwok onyo itwero ye timo gin ame akwai iye.

¹⁶Pien abaka bino winyo, te lara i ciŋ ŋat ame mito nekowa oko, an kede woda, me ekwanywa oko i lobo ame Obaŋawa omio baŋ jo mere me bedo megi.

¹⁷An amironi, onwoŋo atamo ni kop ame yin adwoŋŋa ibino kobo, bino miya awe; pien yin irom aroma kede amalaika Obaŋa, ipoko gin arac kede gin aber. Rwot Obaŋani, ogwoki, obed kedi!”

¹⁸Abaka te kobbi dako-nono ni, “Tim ber ikob kop ateni i kop ame apenyi iye-ni.” Dako te gamo ni, “Ama adwoŋŋa abaka, penya?”

¹⁹Abaka te penye ni, “Yoab daŋ oribere kedi i kop man ducu?” En te gamo ni, “Adwoŋŋa, abaka, kite ame itye kede kwo-ni, an mom dok atwero witi kop i kom kop ame ipenyo. Amironi Yoab en ame okobo gin ame myero abin ati kede gin ame myero akobbi.

²⁰Amironi Yoab otimo man wek ekel alokaloka i kop ame otimere. Cite ryeko adwoŋŋa rom aroma i ryeko amalaika Obaŋa, en ŋeo jami luŋ ame timere i wi lobo.”

²¹Abaka doŋ te kobbi Yoab ni, “Nen ba, an doŋ aye timo gin ame imito. Wot iom atin Abicalom idwogo paco.”

²²Yoab te ryebere buta piny, aryeba cuny, te woro abaka, te daŋ lamme winyo. Yoab te kobo ni, “Tin doŋ amironi oŋeo ni ipwoe, pien iye winyo kwaccere.”

²³Yoab te doŋ ya wot naka i Gecur, te wot kelo Abicalom i Jerucalem.

²⁴Abaka te kobo ni, “En myero koŋ bed kene i ode; en myero kur bin i nyima.” Mannono te miyo Abicalom bedo i ode en kene, mom daŋ te wot i nyim abaka.

²⁵I kare-nono onwoŋo mom tye ŋattoro iyi Icrael luŋ ame opwoo ni kome ber a kato kom Abicalom; Abicalom onwoŋo ber odoco, geye kom i tyene tuno kede anaka i wie malo.

²⁶Ka ce abaka en a rik olyelo yer wie, en pimo i mijan kun tio i kidi ame abaka omoko ni ti kede; doŋ rik ka onwoŋo yer wie olot atek ame wonnere daŋ winyo ni pek, ka opimo, pekkere romo ratili abic. En rik lyelo wie iyi agikki mwaka acel acel.

²⁷En onwoŋo tye awobe adek kede nyako acel ame nyiŋe Tamali. Tamali daŋ rik onwoŋo twon nyako moro aber meicel.

²⁸Abicalom rik te bedo mwaka aryo twal kun mom tuno i nyim abaka kadi acel.

²⁹Icennere en te cwayo kwena baŋ Yoab, me wot tere i nyim abaka, cite Yoab mom gire te bino baŋe. En dok te medo cwayo kop tyen me aryo, cite Yoab mom daŋ dok te bino.

³⁰Abicalom doŋ te kobbi omiro mere ni, “Wot iwaŋ wunu poto a Yoab oko, pien tye gire ceggi acega kede mega, aman cayiri tye iye.” Omiro mere te daŋ wot wawaŋo poto-nono oko.

³¹Yoab te wot baŋ Abicalom, te donyo naka baŋe i ot, eka te penye ni, “Piŋo kara omironi owaŋo potona?”

³²Abicalom te gamo doge ni, “Koŋ inen, an abedo cwayo kwena baŋi ni myero ibin baŋa kan me acwai baŋ abaka iwot ipenye ni, ‘Ŋo kara omio an aya i Gecur oko ate bino kan? Mom onwoŋo gire twero bedo ber an rik ibedo kuno.’ ” Abicalom dok te medo ni, “Aman doŋ amito ni imia awot i nyim abaka; ka ce balloro tye i koma, en myero neka oko.”

³³Mannono te miyo Yoab wot baŋ abaka te wot titte koppono, abaka te lwoŋo Abicalom. Abicalom te bino baŋ abaka, te ryebere piny i nyime, abaka te mote kun noto leme.