Read lango 2 Camwiri 15 Bible Online

2 Camwiri 15 - lango bible

2 Camwiri 15

¹A doŋ man okato, Abicalom te nwoŋo gadigadi mere kede aguragura mere ame en ikome loo, kede ocirikale pyerabic ame woto kede kun telo yo.

²I kare-naca en te bedo ya kare luŋ idiko con woto cuŋ i ŋet yo i dogcel me boma. Ka ce dano moro obino ame mito wot neno abaka pi tero kop me pyemmere moro i nyime, Abicalom lwoŋo dano-nono te penye ni, “Yin kara iya i paco mene?” Dano-nono te kobbe ni, “Adwoŋ, an aya i akina jo Icrael, iyi atekere a ŋadi.”

³Abicalom kobbe ni, “Nen ba, kokoni tye kakare, cite mom tye ŋattoro ame abaka oketo me winyo koppi.”

⁴Abicalom dok te medo kop ni, “Kono kom onwoŋo an aŋol kop a jo Icrael! Kono jo ame tye i koko onyo pido i kom owotegi bino bota, an kono aŋolo kop a jo atira.”

⁵Doŋ kare i kare ka ce dano moro obino te ryebere i nyime, en cwalo ciŋe, make, te mote kun noto leme.

⁶En te bedo timo amannono baŋ jo luŋ ame bino baŋ abaka ni bin ŋol kopgi; mannono omio en oloo tam a jo apol me Icrael.

⁷Kare ame doŋ mwaka aŋwen okato oko, Abicalom okwao abaka ni, “Ti ma ber iweka awot acob kwoŋŋa ame yam akwoŋo baŋ Rwot, i Kebron.

⁸Pien i kare ame a tye i Gecur i Aram, rik abin akwoŋo ni, ‘Ka ce Rwot bino miya adok cen i Jerucalem, an abino woro Rwot’.”

⁹Abaka te kobbe ni, “Apee wot giri kede kuc.” En te ya wot naka i Kebron.

¹⁰Cite Abicalom te cwayo kwena i muŋ i akina atekere luŋ me Icrael kun kobbigi ni, “Ka ce iwinyo wunu apel okok, wun myero ikob wunu ni, ‘Abicalom doŋ odoko abaka oko i Kebron.’ ”

¹¹En rik te wot i Kebron i jo mia aryo ame en olwoŋo i Jerucalem me wot bedo acalo wele mere; jo-nono onwoŋo mom otye kede tammoro ocele, daŋ onwoŋo mom otye kede ŋeccoro i kom gin a timere.

¹²I kare ame Abicalom onwoŋo tye ka miyo mottere me yalo Obaŋa, en ocwao kwena i Gilo, wot lwoŋo Akitopel, ame obedo ami-tam a Daudi, ame en dano me Gilo. Yik me mayo loc a Daudi te bedo medde doko atek meicel kun wel jo Abicalom medde ameda.

¹³Dano moro te kelli Daudi kop kun kobbe ni, “Aman tam a jo luŋ doŋ tye i kom Abicalom.”

¹⁴Daudi te kobbi omiro mere luŋ ame rik onwoŋo tye baŋe i Jerucalem ni, “Ya wunu, me oŋwec, olwi wunu oko; naka mio yo moro bino loyowa oko me bwot i ciŋ Abicalom; ru wot wunu oyotoyot, naka mio en bino makowa i waŋayo, te timo gin arac i komwa, eka te rweyo jo i boma oko i pala lweny.”

¹⁵Omiro abaka te kobbe ni, “Nen ba, omironi doŋ tye ame oyikere oko me tiyo gin ame abaka bino moko.”

¹⁶Abaka doŋ te ya oko, kun woto karacel kede jo me ode luŋ. En oweko monnere ame aŋeca tomon, me gwoko paco.

¹⁷Abaka te wot kun jo luŋ lubo yore; gin te wot cuŋ koŋ i ot me agikki.

¹⁸Omiro mere luŋ te kato kun obeo i ŋete; jo Keret kede jo Pelet luŋ, kede jo mia abicel, ame gin luŋ obedo jo ame oya i turgi Gat te lube, gin daŋ ote kato anyim i nyim abaka.

¹⁹Abaka te penyo Ittai, dano me Gat ni, “Piŋo kara yin daŋ iwot kedwa? Yin dok cen iwot ibed wun abaka, pien yin giri arok, dok daŋ yin ariŋ ayela ame oŋweco aŋweca i lobo mere.

²⁰Yin pwod en ibino aworo awora ora-ni, ŋo ame mio yin dok icako loŋo piny keda kun daŋ an mom aŋeo kan ame awot iye? Yin dok cen, ter daŋ omegoni, Rwot myero nyut marrere a mom lokere kede gennere i komi.”

²¹Cite Ittai te kobbi abaka ni, “Kite a Rwot tye kede kwo-ni, dok yin adwoŋŋa, abaka, daŋ itye kwo-ni, kan ame yin adwoŋŋa, abaka bino bedo iye, ka ito onyo ikwo, an amironi daŋ abino bedo kuno.”

²²Daudi te kobbi Ittai ni, “Aco doŋ wot ikat anyim.” Ittai dano me Gat te kato anyim karacel kede jo mere luŋ anaka itinogi kede mongi.

²³Jo luŋ te mwoco koko oko i dwon aloŋo i kare ame jo a Daudi ciro bea baŋgi, abaka te wot ŋolo luŋ me Kidron, jo luŋ te ciro kato tutuŋ tim.

²⁴Abiatar obino, Jadok daŋ dok te bino, kun bino karacel jo Levi ame odyelo canduk me cikere Obaŋa; gin te cibo canduk cikere Obaŋa piny, tuno ka jo luŋ doŋ oya oko i boma.

²⁵Abaka te kobbi Jadok ni, “Dwok canduk me cikere Obaŋa cen i boma. Ka ce Rwot opwoa, en pwod dok bino miya adwogo cen, ate dok neno naka kan ame en bedo iye.

²⁶Cite ka en okobo ni, An doŋ cunya mom yom i komi, nen ba, an gira doŋ ene, en gire myero tim i koma gin ame en oneno ni ber baŋe.”

²⁷Abaka te dok kobbi Jadok alamdog ni, “Aco yin doŋ dok cen kede kuc, yin kede Abiatar, karacel kede itino awobewu aryo, wodi Akimac, kede Yonacan wot Abiatar.

²⁸Nen ba, an pwod abino wot bedo i dog kulo ame tye i ŋet tim, kun akuro kop i baŋwu.”

²⁹Mannono te miyo Jadok kede Abiatar dyelo canduk Obaŋa dwoko cen naka i Jerucalem; gin daŋ doŋ te bedo kuno.

³⁰Cite Daudi te wot malo i wi kidi me Jeituni kun kok, tyene nono, dok daŋ owumo wie oko. Jo luŋ ame onwoŋo tye baŋe te daŋ wumo wigi oko, ote medde i wotgi kun gin luŋ okoko.

³¹Eka ote miyo Daudi ŋeyo ni Akitopel daŋ onwoŋo tye i akina jo ame oyiko kop i kome kede Abicalom. Daudi te kobo ni, “Ama Rwot, tim ber ilok ryeko ame Akitopel mio odok ŋat amiŋo.”

³²Kare ame Daudi otuno i wi kidi kan ame oworo iye Obaŋa, nen ba, Kucai dano me Arki te bino rwatte kede kun oyeyeco boŋo i kome oko, onyo kwoyo i wie,

³³Daudi te kobo ni, “Ka ce imedde wot keda, ibino doko twon yeccoro apek meicel baŋa.

³⁴Ento ka idok cen i boma, ite wot kobbi Abicalom ni, ‘An doŋ abino bedo gira amironi kite ame rik koŋ abedo kede amiro a pappi, aman doŋ an megi, mannono bi no miyo ilo tam Akitopel pira.’

³⁵Jadok kede Abiatar ame gin olamdog biŋo nwoŋo tye kuno. Yin myero itittigi ginnoro luŋ ame iwinyo i paco abaka.

³⁶Nen ba, itinogi awobe aryo daŋ tye baŋgi kuno, Akimac wot a Jadok kede Yonacan wot Abiatar; itwero oro awobe-nono me kela kop ducu ame iwinyo.”

³⁷Mannono te miyo Kucai ame obedo awot a Daudi bino i boma i kare ame Abicalom onwoŋo doŋ adonyo i Jerucalem.