Read lango 2 Camwiri 17 Bible Online

2 Camwiri 17 - lango bible

2 Camwiri 17

¹Akitopel te dok kobbi abaka ni, “Wek ayer jo tutumia apar wie aryo dyewor-ri, me awot aryem yo Daudi iwor amanni.

²Abino tuno baŋe nwoŋo en pwod ool dok wie daŋ pwod ocuŋ oko. Lworo bino babaŋo en oko, eka jo mere luŋ te ŋwec oko. An doŋ abino neko ka abaka keken,

³ate dwogo jo mere luŋ baŋi bala atera ame otero baŋ cware. Dano acel keken ame yin imito neko, jo doŋ te bedo gire kede kuc.”

⁴Tammere-nono te yomoro cuny Abicalom kede odoŋe luŋ me Icrael.

⁵Abicalom te kobo ni, “Koŋ dok ilwoŋ wunu Kucai dano me Arki, me owiny wunu dok koppere.”

⁶Kare ame Kucai otuno, Abicelom okobbe ni, “Man en tam ame Akitopel omiowa, itamo ni myero oti kede? Aco ka pe ber, yin kobbi.”

⁷Kucai te kobbi Abicalom ni, “Tam ame tin Akitopel omio-ni mom ber.”

⁸Te dok medde kobo ni, “Yin iŋeo aber ni pappi kede jo ame tye baŋe ca, gin obedo jo ame tek meicel i lweny, dok daŋ gin obedo jo ager calo ŋuu ame omako itino mere tim. Dok pappi en ŋat a tye i ŋec adwoŋ meicel i kom lweny; en mom twero buto karacel i lwak dyewor.

⁹Aman ca en doŋ tye opono oko i burroro onyo i kabedo moro apat. Doŋ ba, ka ce Daudi bino neko jo moro i lweny me agege, ŋat ame bino winyo keken, bino kobo ni, ‘Oneko jo Abicalom.’

¹⁰Man bino miyo kadi ŋat atek i lweny, ame cunye ocwiny calo cuny eŋato, bino doko ŋat ame lwor; pien jo Icrael luŋ ŋeo ni pappi obedo twon lo moro atek meicel, dok jo ame tye baŋe obedo jo atek i lweny.

¹¹Doŋ tam ame an amio ene, ni myero jo Icrael luŋ, cakere i Dan naka i Beer-ceba cokere baŋi, kun doŋ opol acalo kwoyo me dog nam, dok myero yin ikomi iwot kedgi i lweny.

¹²Mannono bino miyo wan onwoŋo Daudi kannoro keken ame en tye iye, wan ote corre i kome karacel calo toyo ame corre piny i lobo. Mannono bino miyo en karacel kede jo luŋ ame tye baŋe, moro mom bino bwot.

¹³Ka ce en odonyo i boma moro, jo Icrael bino kelo toli, ote wayo kede cel me bomanono reto piny kun mom oweko gweŋŋoro acel doŋ kuno.”

¹⁴Abicalom karacel kede jo Icrael ducu te kobo ni, “Tam a Kucai ber kato me Akitopel oko.” Pien Rwot onwoŋo omoko oko ni mom obino lubo tam aber ame Akitopel omio, me Rwot mi Abicalom en a luny poto i can.

¹⁵Abicai te kobbi Jadok kede Abiatar, ame gin luŋ obedo olamdog, ni, “Akitopel omio tam baŋ Abicalom kede baŋ odoŋe me Icrael kit man, ento an amio tamma kit man.”

¹⁶Aman wun doŋ myero icwal wunu kwena oyot baŋ Daudi kun ikobbe wunu ni, “Tin myero kur ibut i dog kulo tunŋi, myero ikanyakino idokoro tuŋ ca; me kur nek abaka oko karacel kede jo luŋ ame tye baŋe!”

¹⁷Yonacan kede Akimac onwoŋo obedo i En-rogel kun okuro kop, pien gin onwoŋo otye i lworo ni kur myero nengi ka odonyo i boma. Atin nyako moro onwoŋo tye ame bedo tero kop baŋgi, eka gin te wot titti Daudi.

¹⁸Awobi moro rik te nenogi oko, te wot titti Abicalom. Man omio gin aryo luŋ ote ru lwi, yutte oyotoyot, ote wot i ot a lo moro ame tye i Bakurim. Dano-nono onwoŋo tye kede bur pii i dyekallere, gin te wot lutte iyi bur piinono.

¹⁹Dako a lonnono te wot kwanyo awum wi pii te wot wumo i wi bur pii oko, te moyo kal iye, ame ŋattoro mom romo neno.

²⁰Kare ame omiro Abicalom obino i ottono, gin openyo dako ni, “Akimac kede Yonacan kono?” Dako te gamo ni, “Jonnono odokoro loka tuŋ ca oko.” Kare ame gin oyenyogi kwe, gin odok cen i Jerucalem.

²¹Kare ame gin doŋ odok oko, Yonacan-gi te doŋ yitto oko iyi akoŋ, ote wot tito kop luŋ baŋ Daudi. Gin otitte gin ame onwoŋo Akitopel oyiko me timo i kome kun kobbe ni, “Ru ya oko iwot iŋol kulo idokoro tuŋ ca, pien Akitopel otyeko miyo tam kit man.”

²²Daudi kede jo mere te doŋ cako ŋolo kulo Jordan. I kare ame piny ru onwoŋo gin luŋ doŋ odokoro tuŋ ca oko.

²³Kare ame Akitopel oneno ni mom olubo tammere, otweo kom bedo i kom kana mere, te ya dok oko tuŋe, i boma me turgi. I kare ame en doŋ otyeko yiko jami mere ducu aber, odeye, te to daŋ oko. Rik ote yike i lyel a pappere.

²⁴I kare ame Abicalom karacel kede jo mere tye aŋolo kulo Jordan, onwoŋo Daudi otuno oko i Makanaim.

²⁵I kare-nono onwoŋo Abicalom oketo Amaca obedo atel mony akaka Yoab. Amaca onwoŋo obedo wot a lo moro ame nyiŋe Itra, dano me Icmael, ame onwoŋo onyomo Abigal nyaka a Nakac, am in a Jeruia, totta Yoab.

²⁶Jo Icrael kede Abicalom te wot guro gonygi lobo Gilead.

²⁷Kare ame Daudi doŋ otuno i Makanaim, Cobi wot a Nakac, ame onwoŋo oya i boma me Rabba, i lobo a jo Ammon, kede Makir wot a Ammiel ame onwoŋo oya i Lo-debar, kede Barjillai dano me Gilead, ame onwoŋo oya i Rogelim.

²⁸Gin okelo gi-buto, wali lwok, kede guli; ote kelo daŋ giacama; ŋano, cayiri, moko bel ocelo, oraŋa, ŋor,

²⁹moo kic, cak awac, rommi, kede cak dyaŋ opoto. Gin onwoŋo oŋeo ni Daudi kede jo mere kec bino neko, oryo pii bino cirogi dok obino ol iwot i tim.