Read lango 2 Camwiri 18 Bible Online

2 Camwiri 18 - lango bible

2 Camwiri 18

¹Abaka Daudi rik te kelo jo mere luŋ karacel, te popokogi i dul apapat, en ame tye iye jo tutumia kede en ame tye iye jo mia, kun keto daŋ otelgi.

²En omio acel me adek obedo i te loc a Yoab, acel me adek i te loc Abicai wot a Jeruia omin a Yoab, kede acel me adek i te loc Ittai me Gat. Abaka te kobo baŋ lwak ni, “An daŋ abino wot kedwu.”

³Cite lwak te gamo ni, “Yin gire mom ibino wot. Ka ce wan oriŋo onyo gin oneko nucu jowa, oko, gin gire mom bino paro wok. Yin irom kede jo tutumia apar ame tye i akinawa. Pi mannono ba, yin myero idoŋ i boma kan, kun icwalliwa ka kony.”

⁴Abaka te kobbigi ni, “An abino timo gin ame wun ineno wunu ni ber.” Daudi doŋ te cuŋ i ŋet dogcel kun monnyere ciro kato mia mia kede tutumia tutumia.

⁵En te ciko Yoab kede Abicai kede Ittai ni, “Amito i tim wunu ber pira, kur itim wunu ginnoro i kom woda Abicalom.” Jo luŋ owinyo kare ame Daudi ci ko otel magi luŋ pi Abicalom.

⁶Mony a Daudi te doŋ ciro wot i tim me wot lweny i kom jo Icrael. Gin te lweny kedgi i buŋ me Epraim.

⁷Mony a Daudi te loyo jo Icrael oko kuno. Lweny obedo arac meicel i nino-nono, oneko iye jo ame romo tutumia pyeraryo twal.

⁸Lweny onwoŋo olal oromo lobo-nono luŋ. Jo ame buŋ en oneko obedo adwoŋ akato jo ame oneko i pala lweny.

⁹Abicalom te rwatte atura i jo a Daudi. En onwoŋo tye i wi kana mere, kana mere te coro te kworo ame oculle acula, wi Abicalom te moko oko i akina jaŋ kworo, te doŋ kannono kun alyero alyera i dye yamo ata. Kana ame onwoŋo obedo i wie-ni omedde mere kede ŋwec anyim.

¹⁰Dano moro onene te titti Yoab ni, “Aneno Abicalom kun tye alyero alyera i akina jaŋ kworo kuca.”

¹¹Yoab te gamo kop a danonono, kun penye ni, “Ikop nino? Inene ateteni? Piŋo mom ilebo alyer ireto piny? Yomcunnyere kono omio ami cekel me ryal apar kede del tweyo pyer.”

¹²Cite dano-nono te gamo ni, “Kadi bed onwoŋo imia cekel me ryal tutumia, onwoŋo mom aromo ryeyo ciŋa i kom wot abaka. Wan luŋ onwoŋo owinyo ka abaka cikowu wun luŋ, yin kede Abicai kede Ittai ni, ‘Tim wunu ber pira, kur itim wunu ginnoro i kom woda Abicalom.’

¹³Kono onwoŋo an akwero bedo i woro i gin abaka ociko, ate neko Abicalom, abaka kono owinyo koppere oko; pien mom tye ginnoro ame mom abaka winyo. Yin ikomi kono iteno ciŋi iye oko.”

¹⁴Yoab te kobo ni, “Kop kedi abalo kare-nono.” Yoab te kwanyo toŋi adek, te tutuco kede etao Abicalom. Abicalom onwoŋo tye alyero i akina jaŋ kworo kun pwod kwo.

¹⁵Awobe apar ame onwoŋo mako jami lwenye a Yoab te cokere i kom Abicalom dopo gigi oko.

¹⁶Yoab doŋ te kuto apel me juko monnyere, gin doŋ te dwoggo oko cen i ryemo yo jo Icrael.

¹⁷Gin okwanyo kom Abicalom ote bolo i burroro atut, ame onwoŋo tye i buŋ, ote coko gweŋe yido i kome. Jo Icrael luŋ te ŋwec oko, kun ŋat acel acel dok paco mere.

¹⁸I kare ame Abicalom pwod kwo, en onwoŋo ogero ginnoro ame ocuŋ calo pagi me po pire i luŋ ame olwoŋo ni Luŋ abaka, pien onwoŋo en okobo ni, “An mom atye kede woda moro ame twero miyo jo medde poyo nyiŋa.” En te cako nyiŋ pagi me po pire-nono kede nyiŋe, omio naka atot tin pwod olwoŋo pagi mere-nono ni Abicalom.

¹⁹Akimac wot a Jadok te kobbi Yoab ni, “Wek ariŋ ater kop man aber-ri baŋ abaka, me awot akobbe ni Rwot doŋ olarre oko i ciŋ okworrere.”

²⁰Yoab te gamo ni, “Pe gire; tin mom ibino tero kopporo baŋ abaka. Ibino tero nino ocele, cite mom tin, pien wot abaka oto oko.”

²¹En Yoab te kobbi amiro mere ame onwoŋo obedo dano me Eciopia ni, “Yin wot ikobbi abaka gin ame ineno otimere.” Dano-nono te ryebere piny i nyime, te cako ŋwec oko.

²²Akimac wot a Jadok te dok medo penyo Yoab ni, “Gin atimere myero timere, ye wek an daŋ ariŋ alub dano ca.” Yoab te kobbe ni, “Piŋo kara cunyi apupuka meicel me wot atinna. Nen ba, mom tye mottoro ame ibino nwoŋo iye.”

²³Akimac dok te medo kobo ni, “Gin a timere myero gire timere, an myero awotti.” Yoab te doŋ kobbe ni, “Aco ŋweci.” En te cako ŋwec oko kun lubo yo bar ame dok i luŋ me Jordan, en te lanyo dano me Eciopia oko i ŋwec.

²⁴Ame Akima otuno, onwoŋo Daudi tye obedo piny i dyere me dogcel ame woto i boma, i dyere me dogcel i yie kede en i oko mere. Akurpiny onwoŋo tye malo i wi ot ame tye i wi apama me dogcel. Akurpiny te tiŋo waŋe neno dano moro ame tye ariŋo en kede iyo.

²⁵Akurpiny olwoŋo abaka te kobbi abaka. Abaka te ko bo ni, “Ka en tye kene, tye amut ame en okelo.” Akimac te medde anyim ame doŋ ceggi acega i boma.

²⁶Akurpiny te dok neno dano ocele kun daŋ tye ariŋo en kene, en te redo baŋ ŋat akuro dogcel kun kobbe ni, “Neno koŋ dano ocele dok tye ariŋo en kene.” Abaka Daudi te gamo ni, “Mannono daŋ tye kede amut ame en okelo.”

²⁷Akurpiny te kobo ni, “Lo otelo yo ca ŋweco bala Akimac wot a Jadok.” Abaka te kobo ni, “Akimac dano aber, en okelo amut aber.”

²⁸Akimac te redo kun kobbi abaka ni, “Jami ducu owoto aber.” En te ryebere piny i nyim abaka kun nyime gudo lobo, te kobo ni, “Pwoo Rwot Obaŋani, ame omio yin abaka iloo jo ame onwoŋo ojem i komi.”

²⁹Abaka Daudi te penye ni, “Woda Abicalom tye aber?” Akimac te kobo ni, “Kare ame Yoab ora an amironi, awinyo twon wo adwoŋ meicel, cite mom aŋeo ŋo ame otimere.”

³⁰Abaka te kobbe ni, “Aco koŋ doŋ bin icuŋ kan.” En te wot cuŋ kan ame onyutte.

³¹Dano me Eciopia te tuno, en te kobo ni, “An akelo amut aber baŋ adwoŋŋa abaka! Rwot tin doŋ otyeko lari oko i ciŋ jo luŋ ame onwoŋo ojem i komi.”

³²Abaka te penyo dano me Eciopia ni, “Woda Abicalom tye aber?” Dano me Eciopia-nono te gamo ni, “Kono gin ame otimere i kom Abicalom timere i kom okworri luŋ kede jo luŋ ame jem i komi.”

³³Cuny abaka te poto ni luc; te ya yitto oko malo iyi icika ot ame tye i wi apama i dogcel malo, te wot kok kuno. Kare ame en tye akok, okobo ni, “Oidoi, ama woda Abicalom! Woda Abicalom doi! Kono onwoŋo an en alunyo to akaka woda! Woda Abicalom doi!”