Read lango 2 Camwiri 19 Bible Online

2 Camwiri 19 - lango bible

2 Camwiri 19

¹Yoab rik te winyo ni abaka Daudi tye akoko wode Abicalom, kun kumo atek meicel pire.

²Man omio i nino-nono yomcuny me locgi olokere odoko kumo baŋ mony a Daudi luŋ, pien lwak onwoŋo owinyo ni abaka tye akoko wode.

³Jo te libere aliba me dok i boma, kun olibere acalo jo ame olwi alwia i lweny.

⁴Abaka owumo wie oko te kok i dwon aloŋo ni, “Oidoi, woda doi! Ama woda Abicalom! Ama woda Abicalom!”

⁵Yoab te wot donyo i ot baŋ abaka te kobbe ni, “Tin imio lewic omako omironi luŋ ame olaro kwoni, kede kwo itinoni awobe kede anyira, karacel kede kwo a monni ducu.

⁶Yin kare imaro jo ame dagi, ite lunyo dago jo ame mari. Man tin doŋ inyuto giri kannaler ni odoŋe kede omironi luŋ mom kara iparo giri pirgi kadi acel. Aneno oko ni kono woki Abicalom tye kwo kun wan luŋ oto, kono cunyi yom a mom kobere.

⁷Doŋ aman ba, myero iwot idwoggo cuny joni, ikob kedi i kica. Ka ce yin mom iwoto, an akwoŋo akwoŋa i nyiŋ Rwot ni, diki odiko, dano moro acel i akina jo-ni mom dok bino nwoŋo tye baŋi. Man doŋ bino bedo twon cannoro adwoŋ meicel ame bino timere i komi ame kato kit cannoro luŋ a yam otimere i komi cakere i kare me tinoni tuno kede naka tin.”

⁸Abaka te ya wot bedo i ŋet dogcel me boma. Jo mere luŋ te winyo ni en onwoŋo tye obedo i dogcel, gin luŋ ote, bino baŋe kuno. Jo Icrael onwoŋo oriŋo gigi oko luŋ, kun ŋat acel acel dok paco mere.

⁹Atekere me Icrael luŋ onwoŋo doŋ ocako laro kop kengi kengi i kabedo ducu kun okobo ni, “Abaka Daudi en ame rik olarowa i ciŋ okworwa. En a daŋ rik olarowa i ciŋ jo Piriciti. Aco aman en oriŋo oko i lobowa pi riŋo Abicalom.

¹⁰Dok en Abicalom ame rik wan owiro kede moo ni bed abakawa, otyeko neko oko i lweny. Kara doŋ aman ŋo ame geŋowa poro kop me dwoggo abaka Daudi?”

¹¹Gin ame jo Icrael obedo laro i akinagi te winyere baŋ abaka Daudi; omio en te cwayo kop baŋ olamdog, Jadok kede Abiatar kun kobbigi ni, “Kobbi wunu odoŋe a jo Juda ni, Piŋo kara wun idoŋ wunu cen me timo ginnoro me dwoggo abaka cen i ode? Aco kop a jo Icrael be doŋ otyeko tuno oko baŋ abaka.

¹²Wun en ibedo wunu wat abaka aceggi, wun ibedo wunu cogo mere kede riŋo kome ame inywako wunu remo; piŋo kara wun en ame dok idoŋ wunu cen me dwoko abaka cen?”

¹³Daudi te tittigi daŋ me kobbi Amaca ni, “Yin mom ibedo wat abaka ame inywako wunu kede remo? En okwoŋo akwoŋa ni, ‘Rwot Obaŋa mere myero mi ginnoro timere i koma ka ce mom eketi ibedo a lo mony akaka Yoab.’ ”

¹⁴Abaka Daudi rik te loyo tam a jo Juda luŋ, gin luŋ ote bedo i cuny acel. Lwak luŋ te doŋ cwayo kop baŋ abaka kun okobo ni, “Dwog giri oŋ, yin karacel kede omironi luŋ.”

¹⁵Mannono te miyo abaka cako dwogo cen naka i Jordan, jo Juda ame oya i Gilgal te wot rwatte kede kuno. Gin onwoŋo obino me bino omo abaka dwoko cen naka loka Jordan.

¹⁶I kare acellono daŋ, Cemei wot a Gera, ame obedo dano me Benjamin, ame oya i Bakurim, owoto oyotoyot karacel i jo Juda i Jordan me wot rwatte abaka Daudi.

¹⁷En obino i jo Benjamin ame romo tutumia acel. Jiba ame obedo amiro a jo me ot a Caulo, obino daŋ awobe mere apar wie abic kede omiro mere pyeraryo; gin luŋ oyutte oyotoyot, ote wot i Jordan naka i nyim Daudi.

¹⁸Gin oŋolo kulo Jordan i kan acecep, me wot omo jo abaka, kede pi tiyo ginnoro luŋ ame abaka bino mito ni gin oti. I kare ame abaka rik doŋ onwoŋo tye ayikere me ŋolo kulo Jordan, Cemei wot a Gera owoto te wot rette i nyime.

¹⁹En te kobbi abaka ni, “Timma ber adwoŋŋa, kur ikan balla i cunyi, kur daŋ ipo i ginnoro luŋ ame atimo arac i komi i kare ame iya i Jerucalem. Kur ikangi luŋ i cunyi, ama adwoŋŋa.

²⁰An aniaŋ ni atimo bal, man en gin omio tin an en ageo bino baŋi me bino joli i akina jo luŋ me ot a Yucepu.”

²¹Abicai wot a Jeruya te gamo ni, “Cimei gire myero nek oko, pien en rik oceno ŋat ame Rwot oyero.”

²²Cite Daudi te kobo ni, “Alaro kara ŋo kedwu ba, wun itino a Jeruya, ame omio tin idoko wunu calo okworra-ni? Tin myero dok nek dano me Icrael? Pien an mom ru aŋeo bo ni an doŋ tin abaka me Icrael?”

²³Abaka Daudi te doŋ kobbi Cimei ni, “Yin gire mom ibino to.” En te kwon akwoŋa baŋ Cemei me moko koppere.

²⁴Mepibocet, akwar Caulo te daŋ bino me bino jolo abaka. En obino kun mom olwoko tyene, oweko yer tike iyak ata mom daŋ olwoko boŋŋi mere, cakere i kare ame abaka Daudi oriŋo iye tuno ka en odwogo cen i kuc.

²⁵Doŋ i kare ame en oya i Jerucalem me bino rwatte abaka, abaka openye ni, “Mepibocet we! Kara piŋo rik mom iwoto keda?”

²⁶En te gamo ni, “Adwoŋ, kite ame iŋeo kede ni an amironi an aŋwalo, amirona en obola i mac. An akobbe ni, ‘Tweya kom i wi kana, me ayit i wi kana awot wan abaka.’

²⁷En okobo kop me goba i koma i nyimi, yin adwoŋŋa, aco kun yin icalo amalaika Obaŋa baŋa. Yin giri myero doŋ itim gin ame yin ineno ni ber.

²⁸Pien jo me ot a pappa luŋ onwoŋo myero yin abaka inek luŋ, cite yin dok ilunyo keta an i akina jo ame cemo i mejani. An mom dok atye kede ginnoro ocele ame myero ayik kede nyiŋa baŋi yin abaka.”

²⁹Abaka Daudi te gamo ni, “Piŋo pwod dok imedde titta kop i komi? An doŋ atyeko moko oko ni, yin kede Jiba, ibino poko wunu potti a Caulo ame tye luŋ i akinawu.”

³⁰Mepibocet te gamo ni, “Wek en gire ter luŋ, kite ame yin doŋ ityeko dwogo oko paco i kuc-ci.”

³¹Barijillai dano me Gilead daŋ obino kun oya i Rogelin me bino omo abaka tero loka Jordan.

³²Barjillai rik doŋ onwoŋo twon lo moro ame oti meicel, mwaka me dittere onwoŋo doŋ tye pyeraboro. I kare ame abaka onwoŋo tye i Makanaim, en omio abaka cam, pien en rik obedo twon lo moro ame alonyo meicel.

³³Abaka okobbe ni, “Biye iwot keda i Jerucalem, an abino wot gwoki tuŋa kuno.”

³⁴Cite Barjillai te gamo ni, “Adwoŋ, kara pwod dok adoŋ i mwaka adi me bedo kwo, ame mio dok awoto kedi i Jerucalem?

³⁵Mwaka me ditta doŋ oromo pyeraboro twal, mom doŋ tye ginnoro ame twero kayo leba. Ginnoro luŋ ame acamo onyo amato, moro mom tye ame kao leba. Winyo wer a jo wero daŋ doŋ loa-gu oko. Mom myero dok awot kuno me wot miyi peko nono.

³⁶An abino Iwoki anonok keken, ateri loka Jordan. Ŋo kara ame mio yin dok iromo cula kede twon mot ame rom mannono.

³⁷Tim ber iwek an adok paco me awot ato iŋet lyel a pappa kede mea totta. Nen, amirona Kiman ene; itwero wot kede, me iwot itim baŋe gin ame yin ineno ni ber.”

³⁸Abaka Daudi te gamo ni, “Kimam bi no wot loka karacel keda; abiŋo timo baŋe gin ame yin ineno ni ber. Dok daŋ ginnoro keken ame yin imito ni atim piri, abino timo.”

³⁹Daudi kede jo mere luŋ te ŋolo kulo Jordan. En te moto Barjillai kun noto leme, te lamme gum. Barjillai te doŋ dok tuŋe,

⁴⁰Abaka te wot naka Gilgal kun Kimam doŋ woto karacel kede; jo Juda luŋ karacel kede nucu a jo Icrael otere naka kuno.

⁴¹Jo Icrael luŋ te wot baŋ abaka Daudi, ote kobbe ni, “Adwoŋ, kara piŋo omio omegowa ame gin jo Juda, okwali ote ŋolo kedi kulo Jordan, yin karacel kede jo me odi kede joni luŋ?”

⁴²Jo me Juda te gamo ni, “Wan otimo mannono, pien abaka obedo watwa ame ceggi meicel. Piŋo kara omio akemo omakowu i kop man? En owilliwa cam bo, onyo ca omiowa mottoro?”

⁴³Jo Icrael dok te gamo ni, “I kom abaka wan otye i dul aromo apar twal, i kom Daudi daŋ wan giwa oloowu oko. Piŋo kara omio wun icaowa wunu? Wan mom en arik ocako poro kop me dwogo abakawa paco?” Cite kop a jo Juda te bedo agwa akato kop a jo Icrael.