Read lango 2 Camwiri 2 Bible Online

2 Camwiri 2 - lango bible

2 Camwiri 2

¹I kare ame man doŋ otum, Daudi te penyo Rwot ni “Awot abed i boma moro me Juda?” Rwot te kobbe ni, “Ee, woti.” Daudi dok te penyo ni, “Awot i boma mene?” Rwot te kobbe ni, “Wot i Kebron.”

²Mannono te miyo Daudi wot malo kuno karacel i monne aryo, Akinoam me Jejreel, kede Abigail ame rik koŋ obedo dako a lyel Nabal me Karmel.

³Daudi otero daŋ jo mere ame rik onwoŋo tye baŋe, kun tero ŋat acel acel kede jo me ode; gin te bedo i paco moro ame tye i Kebron.

⁴Jo me Juda te bino kuno, te wiro Daudi kede moo me bedo abaka a jo me ot a Juda. Kare ame Daudi owinyo ni jo me Jabec, i Gilead, en a rik oyiko Caulo.

⁵Daudi ocwao okwena baŋgi kun kobbigi ni, “Rwot myero miwu winyo, pien inyuto wunu woro i kom adwoŋwu. Caulo, iyike wunu!

⁶Aman myero Rwot doŋ nyut marrere a mom lokere kede gen i komwu! An daŋ abino timowu ber pi gin ame itimo wunu.

⁷Aman doŋ ba, myero imi ciŋwu bed iwac, ibed wunu jo atek, pien adwoŋwu Caulo doŋ oto oko; jo me ot a Juda doŋ owira kede moo me bedo abakagi.”

⁸Abuneri wot a Neri, ame onwoŋo obedo atel wi mony a Caulo, onwoŋo otero Ic-bocet wot a Caulo oko owoto kede naka loka i Makanaim.

⁹Eka i kuno, te ke te me bedo abaka ame loo Gilead, jo Acur, Jejreel, Epraim, kede Benjamin, naka Icrael luŋ.

¹⁰Ic-bocet wot a Caulo, onwoŋo rik mwaka me dittere doŋ oromo pyeraŋwen, i kare ame en doko abaka ame loo Icrael, en rik te loc pi mwakki aryo. Cite atekere a Juda onwoŋo gigi lubo Daudi.

¹¹Kare ame Daudi rik obedo kede abaka ame loo atekere a Juda i Kebron, onwoŋo oromo mwakki abiro kede dwete kanyape.

¹²Abuneri wot a Neri kede omiro Ic-bocet wot a Caulo te wot i Gibeon kun oya i Makanaim.

¹³Eka Yoab wot a Cerua kede omiro a Daudi te daŋ wot rwatte kedgi kuno, ote obedo oko piny ŋat acel i ŋete eka ŋat ocele daŋ te bedo i ŋet atapara tuŋ ocele.

¹⁴Abuneri te kobbi Yoab ni, “Mi awobe atino ya malo, me otuk i nyimwa.” Yoab te gamo ni, “Migi oya malo do.”

¹⁵Gin te ya malo, ote kato tuŋ ca kun okwanogi, jo apar wie aryo te kato pi Benjamin kede Ic-bocet wot a Caulo, kede jo apar wie aryo i amiro a Daudi.

¹⁶Ŋat acel acel te mako wi akwottere, te cobo akwottere-nono oko i laŋete kede pala lweny, eka gin aryo luŋ ote rette piny awaŋe acel. Mannono te miyo cako nyiŋ kabedo-nono ni Poto ame onekere iye ame tye i Gibeon.

¹⁷Lweny rik te bedo agwa meicel i nino-nono; omiro a Daudi te loyo Abuneri oko, karacel kede jo Icrael.

¹⁸Awobe a Cerua adek onwoŋo tye kuno, Yoab, Abicai, kede Acael. Acael onwoŋo dwir atek calo amor me tim.

¹⁹En rik te ryemo yo Abuneri atek; i kare ame en oryemo yore-nono, mom gire ogak kadi acel, tuŋ cem onyo tuŋ cam.

²⁰Abuneri te lokere neno ŋee, te kobbe ni, “Man yin, Acael?” En te gamo ni, “An ennono do.”

²¹Abuneri te kobbe ni, “Aco koŋ doŋ igak tuŋ cem onyo tuŋ cam, me imak ŋat acel i akina awobe, ima jami mere oko.” Cite Acael mom te ye gak kadi acel i lubo yo Abuneri.

²²Abuneri te dok medo kobbi Acael ni, “Wek lubo yora bedi, gak oko teŋe; piŋo kara omio imito ni aneki? Abino tiŋo waŋa malo me neno ominni Yoab i yore aŋo ba?”

²³Cite en gire te kwero oko; mannono te miyo Abuneri cobo yie pelo apela kun cobo i ecipet me toŋŋere. Acael te rette piny kuno, te daŋ to oko kannono. Doŋ ŋat acel acel ame otuno kan ame onwoŋo en oto iye, koŋ cuŋ oko mot.

²⁴Eka Yoab kede Abicai te ryemo yo Abuneri. I kare ame ceŋ doŋ onwoŋo ceggi acega i poto, gin te tuno i tur me Amma, ame onwoŋo tye i nyim Gia, i yo ame woto dok i tim me Gibeon.

²⁵Jo me Benjamin te cokere karacel baŋ Abuneri, ote ribere oko acalo mony acel, gin te cuŋ karacel malo i wi turroro.

²⁶Abuneri te redo baŋ Yoab ni, “Myero wan obed lweny nakanaka bo? Mom iŋeo ni agiki mere bedo arac meicel? Ibino kara juko joni awene, me owek ryemo omegogi?”

²⁷Yoab te kobbe ni, “Acalo Obaŋa tye kow-ni, kono mom ikobo, kono jona gire omedde ryemo yo omegogi naka odiko.”

²⁸Mannono te miyo Yoab kuto apel, jo luŋ te cuŋ oko; mom dok ote medde ryemo yo jo Icrael akadi lweny kedgi.

²⁹Abuneri kede jo mere luŋ te wot dyeworrono benebene, kun obeo i dye Araba, ote ŋolo Jordan, gin te bedo wot otyeno nono luŋ, ote tuno naka i Makanaim.

³⁰Yoab te dok cen i ryemo yo Abuneri; eka ikare ame en doŋ ocoko jo luŋ karacel, en te nwoŋo ni omiro a Daudi apar wie aboŋwen mom tye, medo i kom Acael.

³¹Cite jo a Daudi onwoŋo oneko jo Abuneri mia adek kede pyerabicel, ame gin obedo jo Benjamin.

³²Yoab kede jo mere te tiŋo kom Acael, ote wot yiko i lyel a pappere ame onwoŋo tye i Beterekem. Gin doŋ te bedo wot dyewor benebene, piny te wot ruyigi i Kebron.