Read lango 2 Camwiri 21 Bible Online

2 Camwiri 21 - lango bible

2 Camwiri 21

¹I kare ame Daudi tye i loc kec obedo tye pi mwakki adek twal ame okolle akola. Mannono rik te miyo Daudi penyo Rwot pire. Rwot te kobbe ni, “Bal me onyo remo tye i wi Caulo kede jo me ode, pien gin oneko jo Gibeon.”

²Mannono te miyo abaka Daudi lwoŋo jo Gibeon. Jo Gibeon onwoŋo rik mom obedo jo Icrael, cite gin onwoŋo obedo jo Amor odoŋŋege ame jo Icrael rik onwoŋo ocikere me mom timo ginnoro i komgi. Cite Caulo pi mittere adwoŋ me gwoko jo Icrael kede Juda omio onekogi oko,

³Daudi okobbi jo Gibeon ni, “Gin aŋo amyero atim pirwu? Abino culo kwor meremo i yore aŋo, me ilam wunu gum i kom jo a Rwot?”

⁴Jo Gibeon te gamo ni, “Kop ame tye i akinawa kede Caulo onyo kede jo ode mom obedo gin amito ryal onyo jabu, dok daŋ wan mom myero onek dano moro me Icrael.” Daudi dok te penyogi ni, “Kara doŋ imito wunu ni atim gin aŋo pirwu?”

⁵Gin te gamo ni, “Caulo rik otimowa lit kun mito tyekowa luŋ ame dano moro kadi acel mom odoŋ iyi Icrael.

⁶Doŋ pi mannono ba, yin myero imiwa awobe mere abiro me owot odegi i nyim Rwot i Gibeon i wi kidi a Rwot.” Abaka te gamo ni, “Abino miyogi baŋwu.”

⁷Cite abaka opo pi kwoŋ ame rik ekwoŋo gin kede Yonacan wot a Caulo i nyim Rwot, omio en oweko Mepibocet wot a Yonacan odoŋ.

⁸Abaka Daudi rik te kwanyo awobe aryo ame gin obedo itino a Rijpa nyaka Aya, ame en rik onywalo baŋ Caulo nyiŋgi Armoni kede Mepibocet. Dok te kwanyo awobe abic ame gin obedo itino a Merab nyaka a Caulo, ame en rik onywalo baŋ Adriel, wot a Barjillai ame obedo dano me Mekola.

⁹Abaka te miyo jonnono i ciŋ jo Gibeon; gin te deyogi oko i kidi i nyim Rwot. Gin abiro luŋ oto karacel. Onekogi i nino ame rik ogeo iye kac, i kare ame ocako kayo iye cayiri.

¹⁰Rijpa nyaka Aya te kwanyo boŋo kwero cola wot peto i wi kidi kuno pire, en te bedo kuno cakere i kare ame kec ocakkere acaka tuno naka i kare ame kot ocwe i polo, ocorre i komgi. En rik mom oye winyo moro ogudo komgi dyeceŋ, akadi lee moro me tim dyewor.

¹¹Kare ame Daudi owinyo gin ame Rijpa dako aŋeca a Caulo otio,

¹²en owoto te wot omo cogo kom Caulo kede mea wode Yonacan i baŋ jo Jabec-gilead. Jo Jabec-gilead rik akwalo kom Caulogi i dye boma me Bet-can kan ame onwoŋo rik jo Piriciti oŋabogi iye i nino ame gin oneko iye Caulo i kidi me Gilboa.

¹³Daudi te kwanyo cogo kom Caulo kede mea wode Yonacan, te daŋ coko cogo kom jo abiro ame onwoŋo odeo.

¹⁴Daudi te yiko cogo kom Caulo kede Yonacan i lyel a Kic papa a Caulo, ame onwoŋo tye i Cela i lobo a jo Benjamin. Ginnoro luŋ ame rik abaka ociko, jo otio. I ŋe mannono Rwot doŋ te ye kwac a jo pi lobogi.

¹⁵Lweny ocele rik te erre i akina jo Piriciti kede jo Icrael. Daudi te wot i jo mere, ote wot lweny i kom jo Piriciti. Daudi te lweny atek meicel i lweny kuno.

¹⁶Twon lo moro ame en dano acel ame oya iyi atekere a jo a komgi pek, ame nyiŋe Icbi-benob, ame onwoŋo tye i toŋ mola ame pekkere romo ratili aboŋwen kede nucu, dok ame onwoŋo tye i pala mere me romo anyen i pyere, te mito neko Daudi oko.

¹⁷Cite Abicai wot a Jeruya te bino konye oko. En olwenyo i dano me Piriciti-nono te neko oko. Jo a Daudi te ciko Daudi kun okwoŋo akwoŋa ni Daudi mom dok bino medo wot kedgi i lweny, pien naka bino miyo en ame obedo tara me Icrael to oko.

¹⁸A doŋ man otum oko, lweny dok te ere i kom jo Piriciti i Gob. Cibecai dano me Kuca te neko twon lo moro ame en dano acel ame oya iyi atekere a jo a komgi pek a nyiŋe Cap.

¹⁹Lweny ocele dok te ere i kom jo Piriciti i Gob, ame Elkanan wot a Jair-oregim ame obedo dano me Beterekem te neko iye Goliac dano me Gat, ame rik bol toŋŋere mito rom aroma i yat cweyo boŋo.

²⁰Lweny ocele rik dok te bedo tye i Gat, kan ame rik tye iye twon lo moro odoŋo malo kun kome pek. Anyira ciŋe onwoŋo tye kanyape i ciŋe acel acel, anyira tyene daŋ kanyape i tyene acel acel, gin luŋ doŋ te bedo pyeraryo wie aŋwen. En rik dano ame oya iyi atekere a jo ame komgi pek.

²¹Kare ame en rik obino, en ocako ŋalo jo Icrael, Yonacan wot a Cemei omin a Daudi te neke oko.

²²Daudi kede jo mere te neko jo a komgi pek aŋwen, ame gin obedo jo ame oya iyi atekere a jo ame komgi pek me Gat.