Read lango 2 Camwiri 22 Bible Online

2 Camwiri 22 - lango bible

2 Camwiri 22

¹Man en wer ame Daudi owero baŋ Rwot i kare ame Rwot olare i ciŋ okworrere luŋ kede i ciŋ Caulo,

²En owero kit man: “Rwot en obedo ka larrena atek meicel.

³Obaŋana en tek kato kidi twon kidi atek meicel ka alaro baŋe ginnoro mom doŋ guda. En geno koma calo kwot; en ka-larrena atek meicel ame ariŋo alaro. En a gire lara, en a daŋ gwoka, en lara i timmogo me byemi.

⁴An gira acwalo dwona baŋi yin Rwot, yin en a myero paki, yin ame ilara i ciŋ okworra.

⁵“Pien biamwonyi me to onwoŋo doŋ ogura oko dyere, biamwonyi me to onwoŋo doŋ ocorre oko i koma.

⁶Tol me Ceol onwoŋo doŋ olida ame ka weo pe, kun owic ata daŋ doŋ tye oterre oko i nyima.

⁷“An gira rik acwalo dwona baŋ Rwot i kare ame atye i peko, an gira acwalo dwona baŋ Obaŋana. En owinyo dwona i ode, kokona owinyere i yite.

⁸“I kare-nono lobo oyenere te wirre, acakki te polo daŋ oyeŋere kun myel ikikir pien akemo onwoŋo omako Rwot,

⁹Yito oduny malo kun donyo i wume, twon maccoro alyet te donyo i doge kede lodi mac okur atek.

¹⁰Odio polo odwoko piny, en te binopiny; kun piny col icuc i te tyene piny.

¹¹En otwarre obino piny kun obedo i ŋe okerubi; yamo te ru riŋo kede oko piny.

¹²En te miyo piny acol wume oko ipuk; eka pol apek obedo pii keken te doko kema mere.

¹³Tuŋ nyime onwoŋo ler alera, kun lodi mac okur ya iye.

¹⁴Dwon Rwot te mwoc i polo, dwon Ŋat Amalo Meicel te winyere.

¹⁵Obao atero mere, okworrere te ket atata; omio lutkot owil, co te ket i ŋwec.

¹⁶Pii i dye nam opokere, tere te nen; acakki me te lobo te doŋ olaŋara, i kare ame Rwot juko okworrere, kun weo me wume kuto komgi.

¹⁷“Rwot ocwao bade i polo te mako ciŋa, en te waya oko i twon pii moro atut.

¹⁸En te lara oko i ciŋ jo atek ame daga, i ciŋ okwor ame onwoŋo mom aromo loyo.

¹⁹I kare ame atye kede can, gin ocako lweny i koma, ento Rwot gire te gwoka.

²⁰Rwot olara, okela kan alac, pien cunye onwoŋo yom i koma.

²¹“Rwot omia mot me pwoya a rom aroma i kitena atira, omia winyo pien yia gire ler.

²²An abedo gira lubo gin a Rwot mito; mom ru atimo ginnoro arac ame poka kede Obaŋana.

²³Pien gin ame en ociko luŋ tye i nyima, dok daŋ mom ru akwero lubo icwillere moro.

²⁴En oneno ni an a mom i balloro, agwokere gira i timo gin arac.

²⁵Mannono omio Rwot oneno ni kitena atira, pien en oneno ni an yia gire ter.

²⁶“Yin i Rwot ame inyutte keni baŋ jo a genne ni yin igenne dok daŋ inyutte keni baŋ jo a yigi ler ni yin yi ler.

²⁷Jo a kitegi beco, yin inyutte baŋgi ni iber, eka baŋ jo a yigi col ite nyutte baŋgi ni itek.

²⁸Yin giri ilaro jo a mwolle i nyimi, ento iciko waŋi i kom wegi abwone me iwagi idwogogi piny.

²⁹“Yin giri ibedo tarana ame menya, ama Rwot, Obaŋana gire en amenyo piny acol ame tye iye.

³⁰Yin en imia teko me loyo okworra kadi ocokere me lweny keda; Obaŋana gire en a mia teko me pye kalo cel.

³¹Gin ame Obaŋa-ni timo ber meicel; gin a Rwot ociko cobere kakare. En tye acalo kwot ame geno kom jo luŋ ame riŋo laro baŋe.

³²“Ŋa kara ame dok obedo Obaŋa, mom Rwot keken? Ŋa ame dok tek calo kidi, mom Obaŋawa keken?

³³Obaŋa-ni en ame obedo ka-larrena ame ageno, en a mia awoto i kuc.

³⁴En mio tyena bedo calo tyen atil, en mia acuŋ atek i wi kiddi malo.

³⁵En a pwonya i kite me lweny ame mio atwero telo akud atero me mola.

³⁶Yin doŋ ityeko miya kwot me larre, kony ame imia omio adoko twon lo moro adwoŋ,

³⁷Imio kakara obedo alac, omio tyena mom ocer.

³⁸Aryemo okworra ate nekogi oko, akumo i komgi aboŋo weo naka ka gin otum,

³⁹Aonyogi luŋ piny ame mom dok oromo ya co oradde atata i te tyena piny.

⁴⁰Pien yin imia teko me lweny, imia aloo okworra oko.

⁴¹Imio okworra omukere oko i nyima ote lokka ŋegi; joamedaga doŋ atyeko okol weŋ.

⁴²Otemo yenyo ŋat a myero konygi, cite mom onen, okok-gu baŋ Rwot, cite mom ogamo dwongi.

⁴³Aŋinyogi apwot calo apua, ajejebogi odoco calo coto ame onyonyono i dye yo.

⁴⁴“Yin en a rik ilara i baŋ jo ojem ite gwoka acalo aloc i wi rok apapat; jo a yam mom aŋeo doŋ tye i te locca.

⁴⁵Rok ocele bino ryebere piny i nyima, ka owinyo kop i koma, ocako wora.

⁴⁶Gin luŋ oonyo tonigi piny, ote wotte i ka-ponogi i myelkom.

⁴⁷“Rwot akwo ame en kidi atek me larrena myero pwo! Obaŋana en a gire lara. Myero rab pi dittere!

⁴⁸Obaŋana en omia aculo kworra; en omio rok luŋ odok piny i te locca,

⁴⁹dok okwanya oko i ciŋ okworra. Yin en a rik itiŋa malo i wi okworra yin a rik ilara i ciŋ obyemi.

⁵⁰“Man omio an gira abino pwoyi akina orok, dok abino wero wer me pako nyiŋi ama Rwot.

⁵¹Obaŋa gire mio twon loc adwoŋ meicel baŋ abaka mere; en nyuto mar a mom lokere baŋ ŋat a en oyero, baŋ Daudi kede baŋ ikwae waŋ i waŋ.”