Read lango 2 Camwiri 23 Bible Online

2 Camwiri 23 - lango bible

2 Camwiri 23

¹Man en kop ame Daudi okobo me agikki. Daudi wot a Yece rik obedo dano ame Obaŋa omoi obedo twon lo moro adwoŋ, en ŋat a rik Obaŋa a Yakobo oyero me bedo abaka; en daŋ a rik obedo lo adiro i cako wer a jo Icrael. Daudi rik okobo ni,

²“Cuny Obaŋa mia akobo koppere, koppere gire tye I leba.

³Obaŋa a jo Icrael doŋ otyeko kobo kop oko, Agwok jo Icrael okobba ni. Ŋat ame loo jo kun terogi arorom, ame loo loccere kun lworo Obaŋa,

⁴rom aroma i ceŋ ame ryeny odiko ame polloro mom tye kede kot ame mio lum tu i lobo.

⁵Mannono mom kite ame ikwaena bino bedo kede i nyim Obaŋa? Pien en otyeko cikere keda i cikere ame perakino atwal, oyiko iye kop ducu aber ame ginnoro mom romo balo. En bino medde konya kun yomoro cunya i gin luŋ ame amito.

⁶Cite jo luŋ a mom woro Obaŋa calo okuto ame obolo oko; pien mom oromo kwanyogi ciŋ nono.

⁷Ŋat ame gudo komgi myero ti nyonyo onyo bol toŋ; gin luŋ obino wanogi oko kede mac.”

⁸Man en nyiŋ jo a Daudi ame rik onwoŋo tek meicel i lweny: Yocebbacebet, dano me Takemon, en rik obedo atel a jo adek. En rik obin olwenyo kom i toŋ keken i kom jo mia aboro, te daŋ nekogi luŋ awaŋe acel.

⁹I akina jo adekkaca, ŋat ame lube onwoŋo obedo Eleajar wot a Dodo, wot Akoki. En rik onwoŋo tye baŋ Daudi i kare ame gin oŋalo jo Piriciti ame ocokere karacel me lweny i kom jo Icrael. I kare ame jo Icrael olokere odok cen,

¹⁰en onyono piny atek acalo ico, te lweny i jo Piriciti tuno waŋ ame ciŋe ojony atek, kun ciŋe gire otwo atwoa i kom pala romo mere. Rwot te miyogi loyo jo Piriciti atek meicel i nino-nono. I kare ame Eleajar doŋ otyeko lweny oko, jo Icrael odok kuno me wot doŋ gonyo ka ruk i kom jo ame oneko.

¹¹Ŋat a rik lubo Eleajar obedo Camma wot Agee, dano me Arar. Jo Piriciti onwoŋo ocokere karacel i Leki, kan ame rik tye iye poto moro me ŋor. Jo Icrael rik te mukere oko i ŋwec i nyimgi.

¹²Cite en gire te doŋ i dye poto-nono kun gwoko, eka te neko jo Piriciti oko. Rwot te miye loyo jo Piriciti atek meicel i nino-nono.

¹³Ame kare me kac doŋ onwoŋo ceggi, jo adek i akina jo pyeradek adoŋo owoto baŋ Daudi i gorogoro kidi me Adullam, kun onwoŋo mony a jo Piriciti mogo oguro gonygi i luŋ me Repaim.

¹⁴I kare-nono onwoŋo Daudi tye i ka-pono mere ame egeno, kun mony a jo Piriciti mogo tye i Beterekem.

¹⁵Daudi onwoŋo tye kede mit adwoŋ meicel i cunye, omio en okobo ni, “Kono ŋattoro kom twero kella pii amata ame tye iyi akoŋ i dog cel me Beterekem.”

¹⁶Jo adek ca ame onwoŋo gin luŋ obedo jo atek meicel i lweny, ote yeco yogi kengi i dye gony a jo Piriciti, ote wot twomo pii iyi akoŋ i dog cel me Beterekem, ote tero baŋ Daudi. Cite Daudi mom te mato; en te lunyo onyo oko piny i nyim Rwot acalo koŋo olok me yalo Rwot,

¹⁷kun kobo ni, “Ama Rwot, mom gire atwero mato pii man! Ka ce amato, nwoŋo rom aroma ame amato remo a jo man adek ame ojalo kwogi, ote wot.” Mannono omio en gire mom omato pii-nono. Man en gin a rik jo adekkaca otimo.

¹⁸Abicai omin a Yoab wot a Jeruya rik obedo atel a jo pyeradek ca. En daŋ rik olwenyo kom i toŋ keken i kom jo mia adek, te neko oko luŋ; mannono te miyo nyiŋe cako rwo atek i akina jo pyeradek ca.

¹⁹En a doŋ rik obedo twon lo moro a ŋeye akato luŋ i kom jo pyeradek ca. En rik obedo atel wigi, cite en mom otuno i rwom a jo adek ocele ca.

²⁰Benaya wot a Yekoyadi, dano me Kabjeel, rik obedo twon alwennyoro a ŋeye meicel; en otimo gigi mogo ame pirgi dito meicel. En oneko itino awobe aryo, ame onwoŋo rik obedo twoni jo alwenyo meicel i Moab.

²¹Dok en rik odonyo piny i bur i kare me pee, te wot neko iye eŋatu. Dok oneko daŋ twon lo moro me Miciri ame neno onwoŋo ber atek. Dano-naca onwoŋo rik tye kede toŋŋere i ciŋe, cite Benaya te wot baŋe ka i lut keken, te wot yuto toŋŋere i ciŋe-naca oko, ocobe kede te neko oko.

²²Benaya wot a Yekoyadi otimo magi, omio en daŋ obedo twon lo moro a ŋeye meicel ame rom aroma i jo adek ocele ca.

²³En daŋ te bedo twon lo moro ame omio kwogo i akina jo pyeradek ca, cite en mom otuno i rwom a jo adek ocele ca. Daudi okete me loyo ocirikale ame gwoke.

²⁴Jo ocele ame onwoŋo tye i akina jo pyeradekkaca, nyingi ene: Acael omin a Yoab; Elkanan wot a Dodo me Beterekem;

²⁵Camma me Karod, Elika me Karod;

²⁶Kelec me Pelet; Ira wot a Ikec me Tekoa;

²⁷Abiejer me Anatot, Mebunai me Kuca;

²⁸Calmon me Akoki, Marai me Netopa;

²⁹Kaleb wot a Bana me Netopa, Ittai wot a Ribai, me Gibea i lobo a jo Benjamin;

³⁰Benaya me Piraton, Iddai ame oya i lula me Gaac;

³¹Abiolbon me Araba, Ajmawet me Bakurim;

³²Eliakaba me Calbon, awobe a Yacen, kede Yonacan;

³³Camma dano me Arar, Akiam wot a Carar me Arar;

³⁴Elipelet wot Akacbai me Maaka kede Eliam wot Akitopel me Gilo;

³⁵Kejro me Karmel, Parai me Arabi;

³⁶Igal wot a Natan me Joba, Bani me Gad;

³⁷Jelek a jo Ammon, Nakarai me Beerot, ame obedo amak jami lweny a Yoab wot a Jeruia;

³⁸Ira me Itri, Gareb me Itri;

³⁹Uria ame obedo dano me atekere a jo Kitti gin luŋ jo pyeradek wie abiro.