Read lango 2 Camwiri 24 Bible Online

2 Camwiri 24 - lango bible

2 Camwiri 24

¹Akemo rik dok te mako Rwot i kom jo Icrael, omio te cupo Daudi i komgi. Rwot okobbi Daudi ni, “Wot ikwan wel jo Icrael kede me a jo Juda.”

²Abaka te kobbi Yoab ame obedo atel wi monnyere ni, “Wot wunu i akina atekere luŋ me Icrael, me iwot ikwan wunu wei jo, cakere i Gad tuno kede naka i Beer-ceba. Amito ŋeyo wel jo ducu.”

³Cite Yoab te gamo ni, “Adwoŋ, Rwot Obaŋa-ni myero med wel jo ame tye-ni tyen mia acel ocele, kun yin pwod ikwo ame twero neno kede waŋi. Kara pino yin abaka imito kwano wel jo?”

⁴Cite abaka te diyo Yoab kede otellere me winyo koppere; gin te ya i nyim abaka oko, me wot kwano wei jo Icrael.

⁵Gin oŋolo kulo Jordan ote cako kwano wel jo i Aroer, kede i boma ame tye i dye luŋ, ame otikere kede Gad. I kuno gin te dok tutuŋ Jajer,

⁶ote kato naka i Gilead, kede Kadec, i lobo a jo Kitti. Gin te kato i Dan, eka i Dan kuno gin te wirre wot Cidon.

⁷Gin te wot tuno i cel atek me Turo naka i boma luŋ ame onwoŋo obedo mea jo Kivi kede mea jo Kanaan, eka ote kato doŋ naka i Negeb me Juda, kun obeo i Beer-ceba.

⁸I kare ame gin doŋ otyeko bebea i lobo luŋ, gin doŋ te dok cen i Jerucalem, i ŋe dwete aboŋwen kede nino pyeraryo nono.

⁹Yoab te doŋ titti abaka wel jo ame okwano. Wel jo ame romo lweny iyi Icrael onwoŋo oromo tutumia mia aboro, eka me Juda te bedo tutumia mia abic.

¹⁰Kare ame Daudi doŋ otyeko kwano wel jo oko, cunye dok te cako waŋ. En te kobbi Rwot ni, “Atimo bal a mom kobere i gin ame atimo. Tim doŋ ber, ama Rwot, ikwany balla oko, an amironi; pien atimo tim me miŋo meicel.”

¹¹Kare ame Daudi oya odiko, Rwot okobbi Gad adwarpiny, ame onwoŋo obedo aranpiny a Daudi, ni,

¹²“Wot ikobbi Daudi ni, ‘Amie tam adek ame en myero eyer acel i akinagi, me atim.’ ”

¹³Gad te wot baŋ Daudi, te titte gin ame Rwot okobo; openye ni, “Imito ni kec en a myero pot i loboni te ri pi mwakki adek? Onyo yin en a myero ibed ŋwec aŋweca pi dwete adek kun iriŋo okworri? Onyo imito ni too edeke en a myero pot i loboni pi nino adek? Aco yin koŋ doŋ itam ite titta kop ame myero adwok baŋ Rwot.”

¹⁴Daudi te kobbi Gad ni, “Atye doŋ i twon cannoro adwoŋ meicel; cite mom aye ni dano en a myero ket can i koma. Rwot gire en a myero ket can i komwa, pien en obedo akica meicel.”

¹⁵Rwot te cwayo too edeke i kom jo Icrael geye odiko tuno kede naka i kare ame rik eciko. Lwak jo aromo tutumia abiro te to, cakere i Dan tuno kede naka i Beer-ceba.

¹⁶Kare ame amalaika a Rwot oryeo ciŋe me balo Jerucalem, Rwot oloko tammere oko me keto can i kom jo, omio te kobbi amalaika ame onwoŋo aneko jo ni, “Wek doŋ bedi! Oromo doŋ.” Amalaika onwoŋo tye i ŋet laro dino kal Arauna, dano me Jebuc.

¹⁷Kare ame Daudi oneno amalaika ame oneko jo, en okobbi Rwot ni, “An gire en ame atimo bal, atimo gin arac. Kara jo man do tye ane no can nono. Tim ber iluny goya an keken kede jo me oda.”

¹⁸I nino-nono ikome Gad owoto baŋ Daudi te wot kobbe ni, “Wot malo kuca, me iwot ican keno lam me yalo Rwot i laro dino kal Arauna.”

¹⁹Daudi owinyo gin ame Rwot omio Gad okobbe, te wot kuno.

²⁰Kare ame Arauna obolo waŋe, oneno abaka kede omiro mere tye abino baŋe. Arauna owoto baŋe, te wot ryebere piny i nyime wore,

²¹Eka te penyo abaka ni, “Adwoŋŋa abaka, kara ibino kan piŋo ba?” Daudi te gamo ni, “Abino wilo laro dino kaili, me acan iye keno lam me yalo Rwot, me too edeke ya oko i kom jo.”

²²Arauna te gamo kop abaka ni, “Yin giri kwany gin ame yii amito keken me iyal i Rwot; nen twoni me yalo Rwot i mot awaŋa ene, apwod me dino kal kede lodi me ŋut twoni itwero tic kedgi akaka yen.”

²³Arauna te miyo jami-nono luŋ baŋ abaka kun kobo ni, “Rwot Obaŋani myero yie bed ayom i kom motti.”

²⁴Cite abaka Daudi te gamo ni, “Mom amannono gire, an myero acul lim pirgi. An mom abino yalo Rwot Obaŋana kede mot a mom aculo ginnoro pire.” Abaka te wilo laro dino kal kede twoni, i cekel pyerabic me ryal.

²⁵Daudi te cano keno lam me yalo Rwot kuno, eka te waŋo iye mot awaŋa kede mot kweyo cuny. Rwot doŋ te gamo kwaccere te miyo too edeke gik oko iyi Icrael.