Read lango 2 Camwiri 3 Bible Online

2 Camwiri 3 - lango bible

2 Camwiri 3

¹Lweny rik te ri kare alac meicel i akina jo me ot a Caulo kede jo me ot a Daudi; Daudi te bedo medde ameda ibedo atek kun jo me ot a Caulo mede ameda idoko agoro.

²Daudi rik te nywalo awobe magi i Kebron: wode me kao rik te bedo Amunon ame tottere rik Akinoam me Jejreel;

³awobi olube te bedo Kileab, ame obedo wot a Abigail, ame koŋ obedo dako a lyel Nabal me Karmel; wode me adekkere te bedo Abicalom, ame tottere onwoŋo Maaka nyaka a Talmai, abaka me Gecur;

⁴wode me anwennere te bedo Adonia ame tottere obedo Kagit; me abiccere te bedo Cepatia, ame tottere obedo Abiatal;

⁵eka me kanyape te bedo Itream, ame tottere obedo Elga, dako a Daudi. Itino awobe-ni luŋ Daudi onywalogi i Kebron.

⁶I kare ame lweny onwoŋo pwod tye i akina jo me ot a Caulo kede jo me ot a Daudi, Abuneri onwoŋo tye awot medde bedo lo ateka meicel i akina jo a Caulo,

⁷Nino moro acel Ic-bocet, wot a Caulo, openyo Abuneri ni piŋo obuto aŋeca, ame onwoŋo obedo ci-pappere Caulo, a nyiŋe Ricpa, nyaka Aya.

⁸Akemo te mako Abuneri meicel pi peny a Ic-bocet, omio te kobbe ni, “Yin itamo ni an abedo wi gwok bo i ot a Juda? I kare-ni luŋ an abedo kede woro baŋ jo me ot a Caulo ame obedo pappi, kede baŋ omego mere, naka baŋ owote mere, dok mom amiowu i ciŋ Daudi; ento yin tin icako kelo kop i koma pi dako.

⁹Obaŋa myero mi ginnoro tima, ka ce mom acobo gin a yam Rwot okwono pire baŋ Daudi,

¹⁰me kwanyo loc oko i ot a Caulo, te miyo kom me loc baŋ Daudi, me loyo Icrael kede Juda, cakere i Dan tuno kede i Beer-ceba.”

¹¹Ic-bocet onwoŋo mom dok twero kobbe kopporo kadi acel, pien onwoŋo lwore.

¹²Abuneri te cwayo kwena baŋ Daudi i Kebron kun kobo ni, “Ŋa kara ame bi no loyo lobo man? Yin myero iye cikere keda me an akonyi, ami Icrael luŋ dwog i te locci.”

¹³Daudi te kobo ni, “Mannono gire ber, an gire abino cikere kedi, cite i kare ame ibino nena myero inen ni ikelo Mikal nyaka a Caulo baŋa, en omio ite nena.”

¹⁴Daudi te cwayo okwena baŋ Ic-bocet wot a Caulo kun kobbe ni, “Mia cega Mikal ame rik anyomo i del kom co a jo Piriciti mia acel.”

¹⁵Mannono te miyo Ic-bocet cwayo jo wot game oko i baŋ cware Palutiel wot a Laaie.

¹⁶Cite cware Palutiel rik daŋ te wot kede karacel kun kok naka Bakurim. Abuneri te kobbe ni, “Yin doŋ myero inen ni idok cen.” En doŋ te dok oko cen.

¹⁷Abuneri rik te poro kop odoŋe me Icrael, kun kobbigi ni, “I kare okato wun ibedo mito wunu Daudi ni myero bed abakawu,

¹⁸Aman doŋ myero itim wunu, pien Rwot doŋ otyeko kwon baŋ Daudi kun kobo ni, ‘Abino miyo amirona Daudi en ame laro jona i ciŋ jo Piriciti kede i ciŋ okworgi luŋ’.”

¹⁹Abuneri dok te kop i jo Benjamin, eka te doŋ wot i Kebron me wot kobbi Daudi ginnoro luŋ ame jo Benjamin kede jo Icrael oye timo.

²⁰Abuneri te wot i jo pyeraryo baŋ Daudi i Kebron, Daudi te yiko arama pi Abuneri karacel kede jo ame onwoŋo tye baŋe,

²¹Abuneri te kobo baŋ Daudi ni, “An doŋ aya awot, abino wot coko jo Icrael luŋ karacel akelo baŋi yin adwoŋŋa, Daudi. Gin bino cikere kedi me bedo abakagi. Mannono bino miyo doŋ iloo ginnoro luŋ ame onwoŋo cunyi mito.” Daudi doŋ te cwayo Abuneri wot; en te wot gire i kuc.

²²Icennere omiro a Daudi karacel kede Yoab te dwogo kun oya i ka yako rok ocele, ame okelo jami apol meicel a gin oyako. Ento Abuneri onwoŋo mom tye baŋ Daudi i Kebron, pien onwoŋo Daudi ocwao Abuneri owoto gire oko kun omie owoto gire i kuc.

²³I kare ame Yoab karacel kede mony a rik tye baŋe odwogo, jo te kobbi Yoab ni, “Abuneri wot a Neri obino baŋ abaka, eka abaka te weke wot kun daŋ mie gire woto kede kuc.”

²⁴Yoab te wot baŋ abaka, te kobbe ni, “Gin aŋo kara ame yin itimo? Koŋ inen, Abuneri obino baŋi; piŋo kara yin dok iweko en owoto? Aman en doŋ owoto gire oko.

²⁵Yin iŋeo ni Abuneri wot a Neri obino baŋi me bino bwoli, me eŋe kite ame yin iwiwira kede tuŋŋi kede tunni, kede ginnoro luŋ ame yin itio.”

²⁶Kare ame Yoab doŋ oya i nyim Daudi, en ocwao jo me wot omo Abuneri; gin te dwogo en cen i ŋet bur pii me Cira, ento Daudi onwoŋo mom oŋeo ginnoro iye.

²⁷I kare ame Abuneri odwogo i Kebron, Yoab otere teŋe i ŋet cel me wot kop kede i muŋ. En te wot cobo yie oko kuno, te neke oko, pi remo ominnere Acael.

²⁸I kare ame Daudi owinyo kop man icennere, en okobo ni, “An karacel kede locca mom gire obino bedo kede balloro nakanaka i nyim Rwot pi remo Abuneri wot a Neri.

²⁹Remo mere gire myero dok i wi Yoab, kede i wi jo me ot a pappere luŋ; ŋattoro myero kur rweny i ot a Yoab ame two remo omako, onyo dobo, onyo ame abwoc, onyo ame oneko i pala lweny, onyo ame kec en oneko, man myero bed timere i ode kare ducu.”

³⁰Yoab kede ominnere Abicai te neko Abuneri oko kittono, pien onwoŋo rik oneko omingi i lweny ame obedo i Gibeon.

³¹Daudi te kobbi Yoab kede jo luŋ ame rik onwoŋo tye baŋ Yoab ni, “Yeyeco wunu boŋŋiwu oko, ruk wunu boŋŋi me cola, me ikok wunu Abuneri.” Abaka Daudi te wot kun lubo canduk ame oketo iye kom ato.

³²Gin te yiko kom Abuneri i Kebron; abaka Daudi te mwoco koko oko i dog lyel Abuneri, jo luŋ daŋ te kok oko.

³³Abaka Daudi okoko Abuneri kun kobo ni, “Piŋo kara Abuneri oto calo lo amiŋ?

³⁴Koŋ inen ciŋi-gu mom gire otweo, tyeni daŋ mom gire otweo kede jegere; nen yin giri ito calo lo ame poto i nyim otim tim areco.” Jo luŋ dok te medde kok pi Abuneri.

³⁵Jo luŋ te wot baŋ Daudi me cuko cunye ni myero en ocam cem kun cen mom ru opoto, cite Daudi te kwoŋ akwoŋa kun kobo ni, “Obaŋa myero mii ginnoro timere i koma, ka ce abilo ogati onyo ginnoro keken kun cen mom ru opoto.”

³⁶Jo luŋ oneno gin ame otimere-nono, te daŋ yomoro cunygi; kite ame ginnoro luŋ ame abaka timo yomoro kede cuny jo luŋ.

³⁷Mannono omio jo luŋ oniaŋ i nino-nono ni abaka gire onwoŋo mom omito ni nek Abuneri wot a Neri.

³⁸Abaka te kobo baŋ omiro mere ni, “Wun iŋeo wunu ni aloc kede twon lo moro adwoŋ meicel tin oto iyi Icrael?

³⁹An tin agoro, kadi bed owira kede moo me bedo abaka; jo mago ame gin obedo itino a Ceruya, otye agwa meicel i koma. Rwot gire myero cul Yoab pi tim arac kun lubo ballere.”