Read lango 2 Camwiri 4 Bible Online

2 Camwiri 4 - lango bible

2 Camwiri 4

¹Kare ame Ic-bocet wot a Caulo owinyo ni Abuneri otyeko to oko i Kebron, lworo omake atek, jo Icrael luŋ te bedo ame cunygi oŋabere aŋaba.

²Ic-bocet onwoŋo rik tye kede jo aryo ame telo wi eryoŋet aryo ame woto i yak; ŋat acel nyiŋe Baana, ŋat ocele nyiŋe Rekab, awobe a Rimmon, dano me Benjamin ame turgi tye i Beerot, pien Beerot daŋ okwano baŋ jo Benjamin.

³Jo Beerot onwoŋo oriŋo i Gittaim, gin te bedo gigi kuno naka atot tin.

⁴Yonacan wot a Caulo onwoŋo tye kede wode ame komo akoma. I kare ame okelo kop me to a pappere kede Caulo kun okelo i Jejreel, onwoŋo en doŋ tye i mwaka abic me dittere. Apidi mere te tiŋe ŋwec kede oko; i kare ame apidi onwoŋo tye aŋwec i myelkom, te weke rette oko piny, te doŋ doko aŋwalo. Nyine Mepibocet.

⁵Awobe a Rimmon me Beerot, Rekab kede Baana, gin ocako wot ote tuno i ot a Ic-bocet a ceŋ lyet atek, ote onwoŋo Ic-bocet tye pwod aryeye i kabuto mere dyeceŋ.

⁶Nen ba, icaanono onwoŋo dako ame tye apyeto ŋano nino omako waŋe oko, te daŋ nino gire oko; Rekab kede ominnere Baana te cedde donyo i ot.

⁷Kare ame gin odonyo baŋ Ic-bocet i ot, kan ame onwoŋo en obuto iye i wi tanda mere i ot buto, gin te cobe neke oko, ote ŋolo ŋute oko. Gin otiŋo wie ote wot kede dyewor benebene, kun olubo yo me Araba.

⁸Gin te kela wi Ic-bocet baŋ Daudi i Kebron. Gin te kobbi abaka Daudi ni, “Man en wi Ic-bocet wot a Caulo, akworri ame onwoŋo mito neki, Rwot tin doŋ oculo kwor adwoŋwa, abaka, i kom Caulo kede itino mere.”

⁹Cite Daudi te kobbi Rekab kede ominnere Baana, ame gin obedo itino a Rimmon me Beerot ni, “Kite a Rwot tye kwo-ni, Rwot ame olara i cannoro luŋ,

¹⁰i kare ame rik lo moro okobba ni, ‘Nen ba, Caulo doŋ oto oko,’ kun tamo ni ekela amut aber, an amake, ate neke oko i Ciklag; maci-naca en ame rik obedo mot ame an amie pi kop ame en okelo.

¹¹Kara doŋ jo areco ame neko dano ame kite atira i ode kono, i wi tanda mere-gu, mom abino mito remowu, ate nekowu oko i wi lobo?”

¹²Daudi te kobbi awobe mere ni nekgi oko, ote daŋ nekogi oko, ote ŋolo ciŋgi kede tyengi, ote ŋabogi i ŋet atapara me Kebron. Cite gin te wot yiko wi Ic-bocet i lyel Abuneri i Kebron.