Read lango 2 Camwiri 5 Bible Online

2 Camwiri 5 - lango bible

2 Camwiri 5

¹I kare-nono atekere me Icrael luŋ te bino baŋ Daudi i Kebron, ote bino kobbe ni, “Nen ba, wan acel kedi.”

²I kare okato Caulo onwoŋo abakawa; yin en a rik itelo jo Icrael me wot i lweny, dok daŋ idwoggogi paco; Rwot rik te kobbi ni, “Yin ibino kwayo jona Icrael dok daŋ ibino bedo aloc a jo Icrael.”

³Mannono en omio odoŋe luŋ me Icrael obino baŋ abaka i Kebron. Abaka Daudi te cikere kedgi i Kebron i nyim Rwot, gin te daŋ wiro Daudi kede moo me bedo abaka me Icrael.

⁴Daudi onwoŋo doŋ mwaka me dittere oromo pyeradek i kare ame en doko abaka, en te bedo aloc pi mwakki pyeraŋwen.

⁵Oloo jo Juda i Kebron mwakki abiro kede dwete kanyape, te dok loyo jo Icrael medo i Juda ducu pi mwakki pyeradek wie adek, kun en bedo i Jerucalem.

⁶I kare-nono abaka Daudi kede jo mere te ya me wot lweny i Jerucalem i kom jo me Jebuc, ame gin rik obedo wegi lobo-naca. Jo Jebuc otamo ni Daudi gire mom romo loyo bomagi, omio gin te kobo ni, “Yin gire mom itwero kato kan, otowaŋ kede oŋwalo romo gire ryemi oko.”

⁷Cite Daudi te mayo Cion oko, ame obedo ka ponogi atek, paco-nono te doŋ doko Gony a Daudi.

⁸I nino-naca Daudi okobbi jo mere ni, “Tye ŋattoro iyi akinawu ame cunye dag jo Jebuc bala an? Ŋat amito loyogi myero lub yo me bur pii, me wot lweny i kom otowaŋ kede oŋwalo.” Mannono en omio okobo ni, “Otowaŋ kede oŋwalo mom bino donyo i ot a Rwot.”

⁹Daudi te bedo i ka ponogi atekkono, te cako nyiŋe ni, Gony a Daudi. Daudi te gero boma-nono i cel mano amana, cakere i Millo dok kede i yie.

¹⁰Daudi te doŋ medde ameda ibedo twon lo moro adit, pien Rwot Obaŋa me mony obedo bedo kede.

¹¹Kiram abaka me Turo te cwayo kwena baŋ Daudi, kun miogi otero bao cedar, kede opac, kede opaa kidi me gedo, ame gin te geri Daudi ot.

¹²Daudi te niaŋ ni Rwot doŋ otyeko moke me bedo abaka me Icrael, dok daŋ ni doŋ omio loccere obedo malo meicel pi jo mere Icrael.

¹³I kare ame Daudi oya i Kebron te wot i Jerucalem, en omedde coko mon ocele, mon anyoma kede en aŋeca mege; te daŋ medde nywalo awobe kede anyira.

¹⁴Nyiŋ itino ame en onywalo i Jerucalem ene: Cammua, Cobab, Natan, Culeman,

¹⁵Ibkar, Elicua, Nepeg, Yapia,

¹⁶Elicama, Eliada kede Elipelet.

¹⁷Kare ame jo Piriciti otyeko winyo ni otyeko wiro Daudi kede moo me bedo abaka me Icrael, gin luŋ ote ciro wot malo kuno me wot yenyo Daudi; cite Daudi rik te winyo oko, te wot i ka-pono ame ogero atek.

¹⁸I kare-nono jo Piriciti obino te keketa i lula me Repaim.

¹⁹Daudi te penyo Rwot ni, “Awot alweny i kom jo Piriciti? Ibino miyogi i ciŋa?” Rwot te kobbi Daudi ni, “Woti; pien an abino miyo jo Piriciti i ciŋi, ateteni.”

²⁰Daudi te wot i Baal-peracim, te daŋ wot loyogi oko kuno. Daudi te kobo ni, “Rwot doŋ oemo dye okworra i nyima, kite ame pii mol yeco kede yore.” Omio ote cako nyiŋ kabedo-nono ni Baal-peracim.

²¹Jo Piriciti rik te weko cal jogigi kuno, eka Daudi kede jo mere te terogi oko.

²²Jo Piriciti dok te dwogo tyen me aryo mere, ote dok keketa i lula me Repaim.

²³Kare ame Daudi openyo Rwot, Rwot okobbe ni, “Kur iwot malo kuno, yin man amana, iwot i ŋegi, me ilokere wunu i komgi awulo kan ame abata pol iye.

²⁴Ka ibino winyo tyen jo awot amor awinyere malo i wi abata, myero inyutte wunu, pien Rwot nwoŋo doŋ otelo nyimi oko me wot neneko mony a jo Piriciti oko.”

²⁵Daudi te timo kite ame Rwot onwoŋo ocike kede, te neko jo Piriciti, cakere i Geba tuno naka Gejer.