Read lango 2 Camwiri 8 Bible Online

2 Camwiri 8 - lango bible

2 Camwiri 8

¹Ame man doŋ otum oko, Daudi oloo jo Piriciti i lweny, te cako daŋ doŋ loyogi, te miyo twergi gik oko i lobo-nono.

²Daudi dok te loyo jo Moab i lweny, en te miyogi buto piny i lobo, te pimogi kede tol, eka te neko aryo me adek oko i komgi, te weko ka acel me adek i komgi. Jo Moab te doŋ cako bedo i te loccere kun daŋ oculo ocoro baŋe.

³Daudi dok te loyo abaka me Coba, ame nyiŋe Adadejer wot a Rekob, i kare ame en woto dwoggo loccere i ciŋe, me loyo lobo ame tye i ŋet kulo me Eufrate,

⁴Daudi rik te mayo i baŋe wegi aguragura tutumia acel kede mia abiro, kede cirikale a woto i tyengi tutumia pyeraryo. Daudi te ŋoŋolo odoŋe aguragura luŋ ame onwoŋo wao gadigadi lweny, cite te weko ame romo wayo gadigadi lweny mia acel keken.

⁵Kare ame jo Curia me Damaciko obino me konyo Adadejer, abaka me Coba, Daudi te neko jogi tutumia pyeraryo wie aryo.

⁶Daudi rik te keto cel a mony i lobogi, iŋet Damaciko jo Curia doŋ te bedo ite loc a Daudi, kun daŋ omio ocoro baŋe. Rwot te bedo miyo Daudi loyo lobo luŋ ame en cobo mony i komgi.

⁷Daudi te mayo lwak kwot apipim ame otio i jabu ame onwoŋo tye baŋ omiro abaka Adadejer, te terogi luŋ i Jerucalem.

⁸Abaka Daudi daŋ omao lwak mola adwoŋ meicel i boma me Belak kede me Berotai, ame gin obedo boma ame onwoŋo tye ite loc abaka Adadejer.

⁹Kare ame Toi abaka me Kamat owinyo ni Daudi oloo mony a Adadejer luŋ,

¹⁰en ocwao wode Yoram baŋ abaka Daudi, me wot mote, dok daŋ pwoc pi lweny loyo Adadejer oko; pien Adadejer yam onwoŋo obedo lweny gin kede Toi tyen apol meicel. Yoram te wot kun tero jami ame otio i ryal, i jabu kede mola,

¹¹Jami-nono luŋ Daudi te jalo baŋ Rwot, anaka ryal, kede jabu ame oya i baŋ rok ocele luŋ ame en oloo,

¹²ame oya Edom, Moab, i baŋ jo Ammon, jo Piriciti, jo Amalek, karacel kede jami ame oyako i baŋ Adadejer wot a Rekob, abaka me Coba.

¹³Daudi omio nyiŋe orwo. Kare ame en odwogo, oneko jo Edom tutumia apar wie aboro i luŋ me Kado.

¹⁴Oketo cel me mony oromo lobo me Edom luŋ, jo Edom luŋ te doŋ bedo i te loccere. Rwot te bedo miyo Daudi loyo lobo luŋ ame en cobo mony i komgi.

¹⁵Mannono te miyo Daudi loyo Icrael luŋ; obedo ŋolo kop atira kun daŋ neno ni jo luŋ otye ka tic kedgi aber.

¹⁶Yoab wot a Ceruya onwoŋo obedo atel wi monyere; Yekocafati wot Akilud te bedo aco kop i kom ginnoro luŋ ame otimere;

¹⁷Jadok wot Akitud kede Akimelek i wot Abiatar te bedo olamdog; Ceraya te bedo arannere;

¹⁸Benaya wot a Yekoyadi te bedo adwoŋ ame loo jo Keret kede jo Pelet; eka awobe a Daudi te bedo daŋ olamdog.