Read lango 1 Obakki 11 Bible Online

1 Obakki 11 - lango bible

1 Obakki 11

¹Culeman rik te bedo maro anyira a rok ocele apol atata. Medo i kom nyaka abaka me Miciri, en dok obin onyomo anyira a jo Kitti, kede anyira a jo Moab, anyira a jo Edom, kede anyira a jo Ammon, kede anyira a jo Cidon.

²Kadi bed Rwot rik ociko ni myero jo Icrael kur nyomere i rok ocele, pien bino miyogi ocako woro obaŋe ocele, cite Culeman onyomogi.

³Culeman rik onyomo anyira obakki mia abiro kede mon aŋeca mia adek. Monnere-nono te miyo abaka lokki Obaŋa ŋee,

⁴man omio i kare ame en doŋ oti, mon owae te tere wot woro obaŋe mogo ocele. En mom dok omedde geno Rwot Obaŋa mere kede cunye ducu kite ame pappere Daudi obedo timo.

⁵En obedo woro obaŋa a dako me Cidon ame olwoŋo ni Aciterot, kede jok ipyeda ame nyiŋe Milkom me a jo Ammon.

⁶En obedo tiyo gin ame Rwot mom mito, kun daŋ mom ocuŋ atira i gin ame etio calo kit ame rik pappere Daudi obedo timo.

⁷Culeman rik te gero kabedo moro me woro jok ame ipyeda, ame olwoŋo ni Kemoc ame obedo me a jo Moab; en ogero i wi kidi ame tye tutuŋ to me Jerucalem; kede dok ka woro jok ame nyiŋe Molek ame obedo me a jo Ammon ame ipyeda.

⁸En rik te bedo timo amannono baŋ monne luŋ ame enyomo i rok ocele, kun yalo obanegi kede leyi ame oŋolo, dok wannigi odok akur.

⁹Akemo te mako Rwot i kom Culeman, pien onwoŋo mom dok geno Rwot Obaŋa a jo Icrael kede cunye ducu, Obaŋa ame rik onen baŋe tyen me aryo twal-li,

¹⁰dok ame rik daŋ ocike kun kobbe ni myero kur lub obaŋa moro ocele, dok en mom omako cik ame Rwot ocike kede-nono.

¹¹Man omio Rwot okobbi Culeman ni, “Kit acalo tim man doŋ obalo cunyi oko, dok daŋ mom igwoko cikerena kede icwilla, kun daŋ mom ilubo gin ame aciko, amoko doŋ ateteni me gamo loc oko i ciŋi ate miyo baŋ amironi.

¹²Kadi bed amannono, pi amironi Daudi, mom abino timo man i kare ame yin pwod itye kwo, cite abino timo i kare ame wodi doŋ tye i loc.

¹³Cite mom abino gamo loc luŋ i ciŋe; ento abino weko atekere acel me Icrael doŋ i te loccere, mannono atimo pi amirona Daudi kede pi Jerucalem ame en boma ame doŋ atyeko yero me bedo mega.”

¹⁴Rwot te miyo okwor bino i kom Culeman, ocwao Adad ame en dano me Edom, dok en rik dano ame oya i ot loc me Edom.

¹⁵Pien i kare ame Daudi rik onwoŋo tye i Edom, Joab adwoŋ ame loo mony owoto kuno me wot yiko kom jo ame onekogi i lweny, en rik te neko co luŋ ame onwoŋo tye i Edom.

¹⁶Joab kede jo Icrael ducu rik te bedo kuno dwete abicel tuno ka gin oneko co luŋ ame onwoŋo tye i Edom.

¹⁷Cite Adad rik te ŋwec oko i Miciri, kun ŋweco karacel omiro a pappere mogo ame gin jo Edom. I kare ame en ŋweconaca onwoŋo en pwod tidi.

¹⁸Gin rik oya i Midian, ote wot naka i Paran, kan ame jo mogo te wot karacel kedgi naka i Miciri. Gin te wot naka baŋ Parao abaka me Miciri, abaka te miyo Adad lobo kede ot buto, kun daŋ mie cam.

¹⁹Abaka me Miciri te cako maro Adad atek meicel, ame te miyo Adad nyomo amu mere, ame obedo a min a dako mere adwoŋ ame nyiŋe Tapenec,

²⁰Dako-nono te nywalle atin awobi ame nyiŋe Genubat, ame Tapenec te miyo doŋo i ot abaka kun bedo karacel awobe abaka me Miciri.

²¹Ento i kare ame kop otuno baŋ Adad i Miciri ni Daudi doŋ oto oko, Joab atel wi monnyere daŋ oto oko, en okobbi abaka me Miciri ni, “Weka doŋ adok gira paco i lobowa ikome.”

²²Cite abaka me Miciri te penye ni, “Piŋo kara imito dok paco turwu. Ŋo ce ame mom inwoŋo i kan?” En ogamo ni, “Yin koŋ iweka an awoti.” En doŋ te dok paco turgi.

²³Obaŋa dok te miyo Rejon wot Eliada doko akwor a Culeman. Rejon onwoŋo rik orino ariŋa i baŋ adwoŋŋere ame onwoŋo obedo Adadejer, abaka me Joba,

²⁴eka te doko atel wi oyak ame en obedo coko. Man otimere i kare ame Daudi oloo Adadejer, te neko jo Curia ame onwoŋo onotte kede. Rejon karacel kede jo mere te wot bedo i Damaciko, eka ote kete bedo abaka me Damaciko.

²⁵En obedo akwor a jo Icrael pi kare luŋ ame Culeman pwod kwo.

²⁶Ŋat ocele ame dok odoko akwor a Culeman obedo Jeroboam ame en rik obedo dano acel i akina omiro a Culeman. Jeroboam onwoŋo obedo wot a Nebat ame obedo dano me Jereda i lobo me Epraim. Tottere onwoŋo dako to ame nyiŋe Jerua.

²⁷En ocako lokere me bedo akwor a Culeman pi kop man. Culeman rik onwoŋo ogero Millo, en te culo dog cel me paco kan atwolo oko.

²⁸Jeroboam lo ame onwoŋo obedo atic atek, doŋ i kare ame Culeman oneno ni en tye atiyo tic atek meicel, omie dit me loyo tic ame orono iye jo arona i kom jo me ot a Yucepu luŋ, ame gin jo a Manace kede jo Epraim luŋ.

²⁹I nino moro acel ame onwoŋo Jeroboam tye ka wot kene iyo kun oya i Jerucalem, en orwatte kede adwarpiny ame nyiŋe Akija i dye tim, kun oya i Cilo. Akija onwoŋo oruko boŋo mere anyen.

³⁰Akija te gonyo boŋo mere anyen oko ikome, te yeyeco oko atitino i dul apar wie aryo.

³¹En te kobbi Jeroboam ni, “Gam boŋŋi ame ayeyeco atitino-ni, apar, iter obed meri, pien Rwot okobo ni, ‘Abino gamo loc oko i ciŋ Culeman, ate miyo atekere apar i ciŋi.

³²Culeman bino medde loyo atekere acel, ame man atimo pi po pi amirona Daudi kede pi Jerucalem, ame boma ame ayero me bedo bomana i kom lobo me Icrael luŋ.

³³Atimo man pien Culeman otyeko weka oko, ocako doŋ woro Aciterot, ame obedo jok ame jo Cidon woro, kede jok ame olwoŋo ni Kemoc amejo Moab woro, kedeen ame olwoŋo ni Milkom ame jo Ammon woro. En aman mom doŋ luba dok mom daŋ doŋ tio gin ame an amito, mom daŋ doŋ mako cikka kede icwilla luŋ, kite ame rik amirona Daudi obedo timo.

³⁴Mom abino kwanyo loc luŋ iciŋ Culeman, dok abino weko en koŋ bedo i kom loc pi kare luŋ me kwo mere pi amirona Daudi ame rik ayero dok ame obedo gwoko cikka kun tio gin ame an amito.

³⁵Abino kwanyo loc oko i ciŋ wode, ate miyi loyo atekere apar.

³⁶Abino miyo wot a Culeman doŋ atekere acel, me wek i kare luŋ akwar amirona Daudi obed i kom loc i nyima i Jerucalem, i boma ame ayero me bedo ka wora.

³⁷“ ‘Abino miyo yin Jeroboam idoko abaka me Icrael, abino miyi iloo lobo ame cunyi mito luŋ.

³⁸Ka ce ibino winyo cikka, ite tiyo gin ame an amito, kite ame amirona Daudi obedo timo, an bino bedo kedi kare luŋ. Abino miyo yin en iloo jo Icrael dok daŋ abino miyo ikwai en ame bedo i loc kakari kite ame atimo kede baŋ Daudi.

³⁹Pi bal ame Culeman otimo, abino keto can i kom ikwae a Daudi, cite cannono mom bino ri nakanaka.’ ”

⁴⁰Culeman te temo neko Jeroboam oko, ento Jeroboam te lwi riŋo gire oko i Miciri baŋ Cicak, abaka me Miciri, te wot bedo gire kuno naka Culeman oto.

⁴¹Kop ocele luŋ odoŋŋere i kom Culeman kede gin ame en otio a mom ocoo kan, otyeko coyo luŋ i buk me kwo a Culeman.

⁴²En obedo abaka ame loo jo Icrael luŋ i Jerucalem pi mwakki pyeraŋwen.

⁴³En oto te wot weo karacel i kwari mere, oyiko kome i paco a pappere Daudi. Wode Rekoboam te cako loc a kakare.