Read lango 1 Obakki 12 Bible Online

1 Obakki 12 - lango bible

1 Obakki 12

¹Rekoboam rik te wot i Cekem kan ame onwoŋo jo luŋ ocokere iye me kete i kom me bedo abaka.

²Jeroboam wot a Nebat owinyo pire i kare ame en onwoŋo pwod tye i Miciri, kan ame en rik oŋweco iye pi riŋo abaka Culeman; en oya oko i kuno te dwogo oko.

³Jo Icrael onwoŋo ocwao kwena me wot lwoŋe, eka Jeroboam karacel kede jo Icrael luŋ ame ocokere te kobbi Rekoboam ni,

⁴“Pappi Culeman rik otio kedwa agwa meicel kun mio obedo yeyo yec apek okato kare. Ka ce yin ibino dwoko yec ame en onwoŋo oketo i komwa bedo ayot kun ijwiko tic me opii opii ame adwoŋŋi rik oketo i komwa, wan obino bedo omironi ame winyo dogi.”

⁵Rekoboam te gamo ni, “Koŋ idok wunu, iwot ityek wunu nino adek ite dwogo wunu baŋa kan.” Lwak te dok oko cen.

⁶Abaka Rekoboam te cako penyo tam i baŋ jo oteggo ame rik obedo tic i pappere acalo omi-tam, kun en penyogi ni, “Tam aŋo ame imia wunu me dok ipeny a lwak?”

⁷Gin te kobbe ni, “Ka ce yin iye winyo kop a lwak man tin kun itio gin a twero konyogi, myero imwolle i nyimgi ka idok ipenygi; mannono bino miyogi bedo omironi nakanaka.”

⁸Cite Rekoboam mom oketo cunye i tam ame odoŋ oteggo-nono omie. En dok owoto oyenyo jo mere apat me miye tam, owoto baŋ olwagi mere.

⁹En openyogi ni, “Tam aŋo ame imia wunu me dok i peny a lwak ame okwaa ni myero ajwik yecgi dok ayot?”

¹⁰Gin te gamo ni, “Yin myero ikobbigi kit man ni, ‘Nyako ciŋa acel dwoŋ kato pyer pappa oko.

¹¹Pappa rik omiowu yec apek meicel, mega bino bedo apek ame kato me a pappa oko. Pappa rik pwodowu i del, cite an abino pwodowu i gin ame lit bala kwir yib yit’.”

¹²I ŋe nino adek, Jeroboam karacel kede jo Icrael te dwogo baŋ abaka Rekoboam, kite ame rik ocikogi kede, kun kobo ni, “Dwog wunu baŋa kan i ne nino adek.”

¹³Abaka te cako dok i peny a lwak kede gero, kun mom oye lubo tam ame odoŋe oteggo omie.

¹⁴En okobbi lwak kite ame olwagi mere omie kede tam, kun kobbigi ni, “Pappa rik omiowu iyeo wunu yec apek, an abino medo bedo apek ame kato mege. Pappa rik pwodowu kede del, cite an abino pwodowu i gin ame lit bala kwir yib yit.”

¹⁵En abaka okwero winyo kop a lwak pien Rwot ikome en omio otimere amannono, me wek kop ame rik eciko baŋ Jeroboam cobere kakare, kite ame rik emio Akija dano me Cilo okobo kede baŋ Jeroboam wot a Nebat.

¹⁶I kare ame jo Icrael oneno ni abaka mom oye winyo kokogi, gin luŋ ote redo ni, “Wan giwa mom otye kede dulloro ame obedo megwa i kom Daudi. Wan giwa mom obino nwoŋo ginnoro i baŋ Yece. Dok giwu i kemawu, wun jo Icrael! Nen doŋ odi keni yin Daudi!” Jo Icrael doŋ te cako ket oko, kun ŋat acel acel dok i paco mere.

¹⁷Rekoboam te doŋ loyo Icrael ame onwoŋo bedo i Juda.

¹⁸Abaka Rekoboam te cwayo Adoram, ame onwoŋo rik en adwoŋ ame loo tic me eroni, cite jo Icrael luŋ te nanapo en i gweŋe, ote neke oko. Man omio abaka Rekoboam te ru ya yito oko i wi gadigadi lwennyere, te riŋo oko i Jerucalem.

¹⁹Cakere i kare-nono jo Icrael doŋ te jem oko i kom oloc ame ya i ot a Daudi naka atot tin.

²⁰Kare ame jo Icrael owinyo ni Jeroboam doŋ otyeko dwogo, gin ocwao kwena te wot lwoŋe, en te bino baŋ jo ame onwoŋo ocokere, eka jo te kete me bedo abaka ame loo jo Icrael ducu. Mom tye ŋattoro ame doŋ omedde lubo jo me ot a Daudi kono ka jo me atekere a Juda keken.

²¹Kare ame Rekoboam odwogo i Jerucalem, en ocako coko jo ame oyero ame romo tutumia acel kede pyeraboro iyi atekere a Juda kede Benjamin me wot lweny i kom jo Icrael me dwoggo jo luŋ i te loc a Rekoboam wot a Culeman.

²²Cite kop a Rwot te bino baŋ dano Obaŋa ame nyiŋe Cemayo, kun kobbe ni,

²³“Wot ikobbi abaka Rekoboam me Juda, wot a Culeman, kede jo luŋ me doggola a Juda, kede me doggola a Benjamin, kede baŋ jo ocele luŋ ni,

²⁴‘Rwot okobo ni myero kur iwot ilweny wunu i kom omegowu ame gin obedo jo Icrael. Ŋat acel acel myero dok cen i paco mere, pien gin ame otimere-nono. Rwot en ame omio otimere.’ ” Gin luŋ ote winyo kop a Rwot, ote dok oko cen, kun ŋat acel acel dok i paco mere kite ame onwoŋo okobo.

²⁵Jeroboam te wot bedo i boma me Cekem, i lobo obedo kidikidi me Epraim, en koŋ te wot bedo kuno; te dok ya i kuno te wot bedo i boma me Penuel.

²⁶Jeroboam te cako lwodo kop i cunye ni, “Loc be bino dok oko i ot a Daudi.

²⁷Ka ce jo man omedde wot yalo Obaŋa i ot a Rwot i Jerucalem, cuny jo man bino lokere oko i kom adwoŋgi Rekoboam abaka me Juda, gin bino neka oko ote lokere gigi dok baŋ Rekoboam.”

²⁸Mannono te miyo abaka Jeroboam cako poro kop i jo, te tiyo cal itino twoni aryo me jabu, eka te kobbi lwak ni, “Wot i Jerucalem doŋ ocirowu oko, koŋ inen anaka cene. Nenu wunu doŋ obaŋewu enu, wun jo Icrael, gin en a rik okwanyowu i lobo me Miciri.”

²⁹Rekoboam te keto cal twon acel i Betel kede en ocele i Dan.

³⁰Man rik te miyo jo Icrael poto i bal pi wot woro twon ame tye i Betel kede en ame tye i Dan twal.

³¹En dok te gero udi me woro Obaŋa i wi kiddi malo, te daŋ keto olamdog kun kwanyogi i akina jo ata, cite mom i akina jo Levi.

³²En te keto nino me ecuban bedo i nino dwe apar wie abic me dwe me aboro ame rom aroma kede en ame tye i Juda. En te cako yalo cal twoni ame en otio te keto i Betel, kun yalogi kede mottere. En te keto daŋ olamdog i kabedo me woro Obaŋa ame en ogero i wi kiddi malo, kun keto mogo daŋ i Betel.

³³En owoto i keno lam ame tye i Betel i nino dwe apar wie abic me dwe me aboro, ame en nino ame onwoŋo cunye oyero me bedo nino me ecuban, en te wot i keno me lam me waŋo odok akur.