Read lango 1 Obakki 13 Bible Online

1 Obakki 13 - lango bible

1 Obakki 13

¹Dano Obaŋa ame en ocao rik te ya i Juda, te wot naka i Betel, en otuno i kare ame onwoŋo Jeroboam ocuŋ i ŋet keno lam me yalo Obaŋa odok akur.

²Dano-nono te cako kobo kop Obaŋa agwa i kom keno lam me woro jogi, kun kobo ni, “Yin keno lam, keno lam we, Rwot okobo ni ba, ‘Obino nywalo atinnoro i doggola a Daudi ame nyiŋe Yocia. En ame bino ŋolo olamdog me ka woro jogi ame tye i wi kiddi malo, ame gin jo ame yalo jogi odok akur i komi, en bino ŋologi acalo mot i komi, bino waŋo cogo jo i komi.’ ”

³En te miyo gin a nyuto daŋ oko i nino-nono, kun kobo ni, “Man en gin a nyuto ni man obedo kop a Rwot; ‘Nen ba, keno lam bino mukere oko, buru ame tye i wie daŋ bino wukere oko piny.’ ”

⁴Kare ame abaka owinyo kop a dano Obaŋa, en oryeo ciŋe malo i ŋet keno lam kun kobo ni, “Make wunu oko.” Ciŋ Jeroboam ame onwoŋo eryeo malo te kan oko malo, ame mom dok eromo dolo dwoggo piny.

⁵Keno lam te daŋ mukere oko, buru ame onwoŋo tye iye te daŋ wukere oko piny; mannono te miyo anyut a Rwot ame dano Obaŋa okobo pire cobere kakare.

⁶Abaka te kobbi dano Obaŋa ni, “Tim ber doŋ ikwa Rwot Obaŋani pira, me en tima kica ye bada dolle dwog piny kakare.” Dano Obaŋa te kwayo Rwot, bad abaka te doŋ dolle dwogo piny kakare, kun bedo kite ame rik tye kede con.

⁷Abaka te kobbi dano Obaŋa ni, “Koŋ doŋ ibin owot paco, me koŋ iwot iwe anok kuno, ate miyi mottoro pi tic ame itio.”

⁸Dano Obaŋa te gamo dog abaka ni, “Kadi bed imia nucu me lonyo ame itye kede, mom atwero ye donyo i odi wan kedi, mom daŋ atwero ye camo ginnoro onyo mato pii i kabedo man;

⁹pien Rwot rik ocika kit man ni, ‘Yin gire mom ibino camo ginnoro kunu kadi mato pii-gu, dok daŋ mom ibino dwogo cen i yo ame iwoto kede.’ ”

¹⁰Mannono omio en mom odok cen i yo ame rik ebino kede i Betel, ento olunyo lubo yo ocele.

¹¹Adwarpinnyoro rik onwoŋo tye i Betel ame onwoŋo doŋ oti oko. Awobe mere te wot titte jami ducu ame dano Obaŋa otimo i nino-nono i Betel; kop ame en okobo baŋ abaka daŋ gin otito luŋ baŋ papagi.

¹²Papagi te penyogi ni, “En dano-nono olubo yo mene?” Awobe mere te nyutte yo ame dano Obaŋa ame oya i Juda olubo me dok paco.

¹³En te kobbi awobe mere ni, “Aco koŋ doŋ itweya wunu kom me bedo i wi kana.” Gin daŋ te tweyo kom me bedo i wi kana mere, en te bedo i wi kana.

¹⁴En te cako ryemo yo dano Obaŋa-nono, te nwoŋo en tye obedo i te kworo. Openye ni, “Yin ibedo dano Obaŋa ame oya i Juda-ni?” En te gamo ni, “An ennono!”

¹⁵En te kobbe ni, “Biye koŋ odok kedi cen me koŋ iwot ibil kwonnoro.”

¹⁶En te gamo ni, “An gira mom atwero dok kedi cen, dok daŋ mom atwero donyo i odi, mom daŋ atwero camo ginnoro akadi mato pii-gu kedi i kabedo man;

¹⁷pien Obaŋa onwoŋo okobba ni, ‘Yin gire mom ibino camo ginnoro kuno, akadi mato pii-gu, dok daŋ mom ibino dwogo cen i yo ame iwoto kede.’ ”

¹⁸Adwarpiny me Betel te gamo ni, “An daŋ abedo adwarpiny calo yin, dok amalaika a Rwot en ame okobba ni, ‘Wot idwoggo adwarpiny ca paco, en myero bin karacel kedi naka i odi, me bin cam kwon dok daŋ bin mat pii baŋi.’ ” Man onwoŋo en tye abwolo adwarpiny ca abwola.

¹⁹Adwarpiny me Juda te dok karacel kede, te wot camo kwon i ode, kun mato anaka pii-gu.

²⁰I kare ame gin tye ka cam, kop a Rwot te bino baŋ adwarpiny me Betel-li;

²¹en te cako kop i twon gero meicel baŋ adwarpiny ame onwoŋo oya i Juda-ni, kun kobo ni, “Rwot okobo kit man ni, ‘Pien yin mom ibedo kede woro i kop ame Rwot ociki iye, dok daŋ mom imako cik a Rwot Obaŋani ociki kede,

²²ento iye dwogo cen, dok daŋ ibedo ka cam kun imato pii-gu i kabedo man ame rik aciki ni kur icam ginnoro iye-ni, dok daŋ kur imat pii-gu iye, man omio obino neki oko, komi mom obino yiko i lyel a jo me doggolawu.’ ”

²³Kare ame en doŋ otyeko cam kede mato pii, adwarpiny me Betel te tweyo kom me bedo i kom kana adwarpiny me Juda.

²⁴Adwarpiny me Juda te doŋ ya me wot gire oko, cite eŋatu moro te rwatte kede i yo, te make neke oko, kome te buto piny i yo kuno, kun kana mere tye ocuŋ i ŋete kuno.

²⁵Jo te bedo be bea i yo kannono kun okato gigi akata i ŋete, oneno kome ame obuto piny i yo kede eŋatu ame tye ocuŋ i ŋete. Gin te bino tito koppere i paco ame adwarpiny oti ca tye iye.

²⁶I kare ame adwarpiny oti me Betel ame rik odwogo en cen owinyo, en okobo ni, “Mannono obedo dano Obaŋa ame okwero bedo kede woro i kop ame Rwot ocike iye; mannono omio Rwot omie oko i ciŋ eŋatu, ame okae te neke oko, kite ame Rwot onwoŋo okobo kede baŋe.”

²⁷En te kobbi awobe mere ni, “Tweya wunu kom me bedo i wi kanana.” Gin daŋ te tweyo kom me bedo i wi kana mere,

²⁸en te ŋwec kuno, te wot nwoŋo kom adwarpiny tye obuto i dye yo, kun kana kede eŋatu tye ocuŋ i ŋete. Eŋatu daŋ mom omwodo kome, mom daŋ okao kana-gu.

²⁹Adwarpiny te tiŋo kom dano Obaŋo-nono keto i wi kana mere, en te kelo kome naka i paco mere me gin obin okoke ote yiko kome.

³⁰Adwarpinnyono te yiko kome i lyellere en ikome, en te bedo koke kun kobo ni, “Twon cannoro adwoŋ meicel opoto oko i komi, ominna!”

³¹I kare ame en doŋ otyeko yiko kome, ociko awobe mere ni, “Ka ato, myero iyika wunu i lyel ame ayiko iye dano Obaŋani, ket wunu cogona i ŋet cogo mere.

³²Pien kop a Rwot luŋ ame en okobo i kom keno lam ame tye i Betel kede i kom udi luŋ me woro Obaŋa ame ogegero malo i pacci luŋ ame tye i Camaria, koppere luŋ bino cobere kakare.”

³³I ŋe man, abaka Jeroboam mom oweko timo timmere arac-ci, en gire omedde ameda i keto olamdog me tic i kabedo me woro Obaŋa ame tye i wi kiddi malo, kun daŋ gire kwanyogi i akina jo ata. En ka onwoŋo ŋattoro keken ame mito bedo alamdog, en kwere oko me bedo alamdog, te kete i kabedo me woro Obaŋa ame tye i wi kiddi malo,

³⁴Tim magi olokere odoko bal i ot a Jeroboam, omio Rwot ojwero jo me doggola mere otyeko oko luŋ.