Read lango 1 Obakki 14 Bible Online

1 Obakki 14 - lango bible

1 Obakki 14

¹I kare-nono two omako Abija wot a Jeroboam,

²Jeroboam te kobbi dako mere ni, “Ya malo iruk boŋŋi ocele, me ŋattoro kur ŋe ni yin ibedo dako a Jeroboam. Ya iwot i Cilo, kan ame adwarpiny ame nyiŋe Akija bedo iye, ame en adwarpiny ame rik okobo ni an abino bedo abaka ame loo rok man.

³Ter ogati apar karacel kede capattogo kede moo kic i tabo, ter jaminono naka baŋe, en bino titti gin ame bino timere i kom atin.”

⁴Dako a Jeroboam daŋ te timo kittono; en owoto naka i Cilo, te tuno i paco Akija. Onwoŋo Akija oti ame waŋe doŋ oto oko ame mom doŋ romo neno piny,

⁵Rwot te kobbi Akija ni, “Dako a Jeroboam ca bino baŋi ca. En obino me bino penyo kop i kom two a wode baŋi, pien atinnere-nono two meicel. Yin myero ikobbe kit man.” Rwot te kobbe kop a myero kobi. Kare ame dako-nono otuno baŋ Akija, en otemo bedo acalo dako moro ocele.

⁶Akija owinyo wottere i kare ame en otuno i doggola, eka te jolle, kun kobo ni, “Donyo ba, ama dako abaka Jeroboam. Piŋo kara ilokere calo dako ame oya i kan ocele? Rwot doŋ otyeko kobba kop apek meicel i komi.

⁷Yin wot ikobbi Jeroboam ni, Rwot a jo Icrael okobo ni, ‘An rik adwori, ate yeri miyi dit me loyo jo Icrael ame gin obedo jona.

⁸An rik agamo loc oko i ciŋ ikwae a Daudi, ate miyo baŋi, cite yin mom ibedo acalo amirona Daudi, ame rik omako cikka ducu, kun luba i cunye luŋ kun daŋ tio gin ame tye atira keken i nyima.

⁹Yin en a doŋ igeo timo bal areco meicel ame kato oloc luŋ ame otelo nyimi. Yin ikwera, itio obaŋe mogo ame otwako atwaka kun iroka kede me akemo maka.

¹⁰Mannono omio abino keto can i kom jo a Jeroboam luŋ, abino neko co luŋ i ode, ame tye i Icrael, opii naka jo ame gin anywalli. Abino weyo jo luŋ me doggola a Jeroboam, kit ame dano ka awaŋo cet dyaŋ waŋo naka waŋ ame mac doŋ omoko i cet dyaŋ luŋ ame mom dok kannoro odoŋ nono aboŋo mac iye.

¹¹Jo me doggola a Jeroboam luŋ ame bino to i boma, gwogi en ame bino mwodo komgi, ento jo ame bino to i dye tim ata, acut en ame bino camo komgi, pien Rwot en okobo kop man.’

¹²“Yin doŋ ya idok tuŋi. Tekki ituno paco keken, atin bino to oko.

¹³Jo Icrael bino kumo pire, ote yiko kome. En kene obino yiko kome i lyel i akina jo a Jeroboam, pien ginnoro onwoŋo tye i kome ame yomoro cuny Rwot Obaŋa me Icrael i akina jo me ot a Jeroboam,

¹⁴Rwot akome en ame dok bino yero dano moro ocele ame bino bedo abaka me Icrael. Dano-nono en ame bino miyo waŋ jo me ot a Jeroboam rwenyo oko i wi lobo tin. Kara ŋo doki i ŋe mannono!

¹⁵Rwot bino keto can i kom jo Icrael tuno waŋ ame komgi doŋ myel amyela calo ogada ame tye akwaŋ i wi pii. En bino kwanyo jo Icrael oko i lobo aber wok-ki ame yam omio baŋ kwarigi, en bino keketogi atata i ŋe kulo Efurate, pien gin omio akemo omako Rwot pi yen ame gin oguguro pi woro jok a dako ame olwoŋo ni Acera.

¹⁶Rwot bino weko jo Icrael ata, pi bal a Jeroboam ame en obalo kede pi bal ame en omio jo Icrael obalo.”

¹⁷Dako a Jeroboam oya te cako wottere me dok i Tirja. Kare ame en pwod otuno atuna i doggola me ode, atinnere te to oko.

¹⁸Jo Icrael luŋ te kumo pire kun okoke, ote yiko kome kite ame Rwot rik omio amiro mere adwarpiny Akija okobo.

¹⁹Kop i kom ginnoro luŋ ame Jeroboam obedo timo, kite ame en olwenyo kede i mony, karacel kede kite ame en oloo kede jo Icrael, gin luŋ tye ocoo i buk me Tekwaro ame tito kop i kom oloc me Icrael.

²⁰Jeroboam oloo jo Icrael pi mwakki pyeraryo wie aryo. En oto te wot weo karacel i kwari mere. Wode Nadab en ame te leyo kakare.

²¹I kare-nono onwoŋo Rekoboam wot a Culeman tye ka loyo jo Juda. En ocako loc ame onwoŋo doŋ tye kede mwakki pyeraŋwen wie acel me dittere. En obedo loc i Jerucalem pi mwakki apar wie abiro, i boma ame rik Rwot oyero i akina atekere luŋ me Icrael ni myero bed kan ame obino wore iye iyi Icrael luŋ. Nyiŋ tottere obedo Naama, ame obedo nya jo Ammon.

²²Jo Juda rik te timo bal a mom nen aber i nyim Rwot, pi balgi-nono omio gin oroko Rwot, ote miyo nyeko mako Rwot, balgi onwoŋo rac kato en ame yam kwarigi obedo timo oko,

²³Pien gin rik ogero-gu pirgi kengi ka woro jogi i wi kiddi, ocibo-gu gweŋe mogo ocuŋ atira i ka woro jogi, oguguro daŋ yen me woro jok a dako ame olwoŋo ni Acera i wi kiddi luŋ ame otiŋere malo anaka i te yen obuŋere-gu.

²⁴A doŋ onwoŋo rac okato kare, gin onwoŋo tye daŋ kede co mogo i ka woro jogigi kuno ame mio co wadgi buto kedgi kuno. Jo Juda obedo timo tim me ipyeda ame rom aroma kede me a rok apapat ame Rwot rik oryemo oko i nyim jo Icrael i kare ame rik gin obino i lobo-nono.

²⁵I mwaka me abiccere me loc a Rekoboam, abaka Cicak me Miciri ocobo mony i kom Jerucalem.

²⁶En rik te yako jami luŋ ame onwoŋo okano i ot kano lim a Rwot, kede en ame onwoŋo tye i ot kano jami abaka. En oyako jami luŋ kun yako anaka kwode-gu, ame rik Culeman otio i jabu.

²⁷Abaka Rekoboam rik dok te tiyo kwode ocele kaka en ame Cicak oyako; en otio kwode me mola te miyogi i ciŋ odoŋe a jo ame onwoŋo gwoko doggola ot abaka.

²⁸I kare luŋ ka rik abaka awot i ot a Rwot, jo ame gwoke ŋat acel acel woto i kwot i ciŋe, ote dok dwoko oko kakare i otgi.

²⁹Kop i kom ginnoro luŋ ame Rekoboam obedo timo a mom ocoo kan, gin luŋ tye ocoo i buk me Tekwaro ame tito kop i kom oloc me Juda.

³⁰Lweny rik obedo tye i akina Rekoboam kede Jeroboam kare luŋ,

³¹Rekoboam oto te wot weo karacel i kwari mere, oyiko kome karacel i kwari mere i paco a Daudi. Nyiŋ tottere rik Naama, ame obedo nya jo Ammon. Wode Abijam en ame te leyo kakare.