Read lango 1 Obakki 15 Bible Online

1 Obakki 15 - lango bible

1 Obakki 15

¹I mwaka me apar wie aboro me loc a Jeroboam wot a Nebat, en ame Abijam ocako loyo kede jo Juda.

²En obedo loc i Jerucalem pi mwakki adek. Nyiŋ tottere onwoŋo Maaka, ame obedo nyaka Abicalom.

³En obedo timo kit bal luŋ ame pappere rik bedo timo, kun mom geno Rwot Obaŋa mere kede cunye ducu kite ame rik kwaro mere Daudi obedo timo,

⁴Kadi bed amannono, Rwot Obaŋa mere omie ebedo aloc i Jerucalem, omio wode daŋ en ame oleo kakare pi miyo Jerucalem cuŋ atek pi Daudi,

⁵pien Daudi rik obedo timo gin ame tye atira, mom oweko cik a rik Rwot ocike kede pi kare me kwo mere luŋ ento otimo bal ka i kom Uria dano me Kitti.

⁶Lweny rik obedo tye i akina Abijam kede Jeroboam pi kare me kwo Abijam luŋ.

⁷Kop i kom ginnoro luŋ ame Abijam obedo timo a mom ocoo kan, gin luŋ tye ocoo i buk me Tekwaro ame tito kop i kom oloc me Juda. Lweny rik obedo tye i akina Abijam kede Jeroboam.

⁸Abijam oto te wot weo karacel i kwari mere, ote yiko kome i paco a Daudi. Wode Aca en ame te leyo kakare.

⁹I mwaka me pyeraryo me loc a Jeroboam abaka me Icrael, en ame ocako loyo kede jo Juda.

¹⁰En obedo loc i Jerucalem pi mwakki pyeraŋwen wie acel. Nyiŋ tattere onwoŋo Maaka, ame obedo nyaka Abicalom.

¹¹Aca obedo timo gin ame nen atira i nyim Rwot kite ame kwaro mere Daudi rik obedo tiyo.

¹²En oryemo mon kede co luŋ ame rik mio co wadgi buto kedgi i ka woro jogigi, te kwanyo daŋ cal jogigi luŋ ame yam kwari mere otio.

¹³En okwanyo daŋ tattere Maaka oko i dittere me bedo toto abaka, pien onwoŋo en otimo tim me ipyeda pi tiyo cal jok a dako ame olwoŋo ni Acera. Aca ototoŋo cal jokkono oko te wot waŋo oko i ŋet kulo me Kidron.

¹⁴Kadi bed en pe omukuko ka woro jogi ame tye i wi kiddi malo, cite en omedde keto gennere i kom Rwot pi kare me kwo mere luŋ.

¹⁵En okelo mot a rik pappere otyeko jalo baŋ Rwot karacel kede mege ame en ojalo, acalo jabu, ryal kede jami mogo ame otio i mola, te ketogi i ot a Rwot.

¹⁶Aca abaka me Juda kede Baaca abaka me Icrael obedo lweny i akinagi kengi kengi pi kare luŋ ame gin onwoŋo tye i loc.

¹⁷Baaca abaka me Icrael obin ocobo mony i kom jo Juda, te celo Rama oko, me geŋo jo wot i Juda baŋ abaka Aca kede jo Juda me wot kannoro ocele.

¹⁸Aca te kwanyo ryal kede jabu luŋ ame rik onwoŋo odoŋ i ot kano lim a Rwot, kede jabu ame rik onwoŋo tye i ot kano lim abaka, eka te miyo baŋ omiro mere me tero baŋ Ben-adad wot a Tabrimmon, wot a Kejion, abaka me Curia ame rik onwoŋo bedo i Damaciko, kun cikogi me kobbi Ben-adad ni

¹⁹“Tim ber iye ocikere kedi kite ame rik kwarona kede kwaroni otimo. Ryal kede jabu enu acwayi-nu me mot. Tim ber iwot itur cikereni oko wun i Baaca abaka me Icrael, me en bin kwany monnyere oko i koma.”

²⁰Ben-adad te winyo gin ame Aca okobbe, en te cako cwalo odoŋe ame telo monnyere me wot ero lweny i kom pacci mogo me Icrael, eka te mayo Ijon, Dan, Abel-Bet-Maaka, kede Kinneret luŋ kede lobo a jo Naputali luŋ.

²¹Kare ame abaka Baaca owinyo gin ame otimere, oweko Rama oko, te dok wot bedo i Tiria.

²²Abaka Aca te cwayo kop i lobo me Juda luŋ kun lwoŋo jo luŋ me bino konyo tic me weko gweŋe kede bayi ame rik abaka Baaca obedo tic kedgi me celo Rama, en olwoŋo ni jo luŋ myero bin, ŋattoro kur doŋ. Abaka Aca te cako celo Geba ame en boma ame tye i lobo Benjamin kede Mijipa kun tio kede jami-nono.

²³Kop i kom ginnoro luŋ ame Aca otimo, lweny ame en olwenyo ame nyuto tek cunye kede kite ame en ocecelo kede boma mogo, gin luŋ tye ocoo i buk me Tekwaro, ame tito kop i kom oloc me Juda. Cite i kare ame en doŋ oteggo, two moro omako tyene te ŋwale oko.

²⁴Aca oto te wot wee karacel i kwari mere, ote yiko kome karacel i kwari mere i boma a Daudi. Wode Yekocafati en ame te leyo kakare.

²⁵I mwaka me aryo me loc Aca abaka me Juda, en ame Nadab wot a Jeroboam ocako loyo kede jo Icrael eka te loyogi pi mwakki aryo.

²⁶En obedo timo bal ame nen arac i nyim Rwot omako kit tim a pappere, kede bal ame pappere obalo, dok daŋ omio jo Icrael otimo bal.

²⁷Baaca wot Akija, dano me doggola Icakar, rik te cako poro kop i jo pi turo loc a Nadab; Baaca te cobo Nadab neko oko i kare ame en karacel kede monyere oguro boma me Gibeton, ame obedo paco a jo Piriciti.

²⁸Man otimere i mwaka me adek me loc abaka Aca, abaka me Juda, eka en Baaca te leyo kakare.

²⁹Kare ame Baaca doŋ otyeko doko abaka me Icrael, en ocako neko jo me doggola a Jeroboam luŋ, kun cobo gin ame rik Rwot omio amiro mere Akija me Cilo okobo; en oneko jo me doggola a Jeroboam luŋ, kun mom weko moro kadi acel.

³⁰Can man opoto i kom jo-ni pi bal ame Jeroboam obalo, kede pi bal ame omio jo Icrael obalo dok en rik omio akemo omako Rwot Obaŋa me Icrael.

³¹Kop i kom ginnoro luŋ ame abaka Nadab otimo a mom ocoo kan, gin luŋ tye ocoo i buk me Tekwaro ame tito kop i kom oloc me Icrael.

³²Abaka Aca me Juda kede Nadab me Icrael rik obedo lweny i akinagi kengi kengi i kare luŋ ame gin onwoŋo tye i loc.

³³I mwaka me adek me loc Aca abaka me Juda en ame Baaca wot Akija rik ocako loyo kede jo Icrael. En obedo aloc a jo Icrael pi mwakki pyeraryo wie aŋwen, kun bedo i Tirja.

³⁴En daŋ obedo timo bal ame nen arac i nyim Rwot calo abaka Jeroboam, dok daŋ omio jo Icrael otimo bal.