Read lango 1 Obakki 16 Bible Online

1 Obakki 16 - lango bible

1 Obakki 16

¹Kop a Rwot rik te bino baŋ Yeko wot a Kanani kun kobo i kom Baaca ni,

²“Cakere i kare ame an akwanyi iyi apua ate miyi bedo abaka a jona Icrael, yin ibedo timo bal ame rom aroma kede me a Jeroboam, kun imio jona daŋ timo bal. Man omio akemo omaka pi balgi-nono.

³Nen ba, an doŋ abino neki oko yin Baaca karacel kede jo me doggolani luŋ, kite ame atimo kede i kom Jeroboam wot a Nebat.

⁴Dano moro me doggolani ame oto i boma, gwogi en ame bino camo kome, aco en ame oto i tim ata, acut en ame bino camo kome.”

⁵Kop i kom ginnoro luŋ ame Baaca otimo a mom ocoo kan, lweny luŋ ame en olwenyo ame nyuto tek cunye, gin luŋ tye ocoo i buk me Tekwaro ame tito kop i kom oloc me Icrael.

⁶Baaca oto te wot weo karacel i kwari mere, ote yiko kome i Tirja. Wode Ela en ame te leyo kakare.

⁷Kop a Rwot ame obino baŋ Yeko wot a Kanani i kom Baaca kede jo me doggola mere pi kop aryo; pi bal luŋ anen arac i nyim Rwot ame en obedo timo, kun mio akemo mako Rwot, ame rom aroma i bal a jo me doggola a Jeroboam, dok daŋ pien en oneko jo me doggola a Jeroboam oko.

⁸I mwaka me pyeraryo wie abicel me loc Aca abaka me Juda, en ame Ela wot a Baaca ocako loyo kede jo me Icrael, en te bedo loc i Tirja pi mwakki aryo.

⁹Dano acel i akina omiro mere adoŋo ame nyiŋe Jimri, ame onwoŋo loo nucu me gadigadi lweny abaka, te cako poro kop i muŋ i kome. Doŋ i nino moro acel abaka onwoŋo tye amero i Tirja, i ot a dano moro ame nyiŋe Arja, ame rik loo jami me ode i Tirja.

¹⁰Jimri te donyo i ot, te cobo Ela te neko oko, en te leyo kakare acalo abaka. Man otimere i mwaka me pyeraryo wie abiro me loc Aca abaka me Juda.

¹¹Kare ame Jimri ocako loc, en oneko jo me ot a Baaca oko luŋ. Mom oweko wat a Baaca moro odoŋ kadi awottere moro,

¹²Man te miyo kop a Rwot ame rik emio adwarpiny Yeko okobo i kom Baaca cobere kakare, kite ame en rik okobo kede. Jimri oneko jo me doggola a Baaca oko luŋ kun mom moro odoŋ.

¹³Pien Baaca kede wode Ela onwoŋo omio akemo omako Rwot Obaŋa me Icrael pi balgi me woro cal jogi kede dok pi miyo jo Icrael timo bal.

¹⁴Kop i kom ginnoro luŋ ame Ela otimo gin luŋ tye ocoo i buk me Tekwaro ame tito kop i kom oloc me Icrael.

¹⁵I mwaka me pyeraryo wie abiro me loc Aca abaka me Juda, en ame Jimri obedo kede aloc i Tirja pi nino abiro. I kare-nono onwoŋo mony a jo Icrael tye ka guro boma me Gibeton ame en boma a jo Piriciti,

¹⁶mony te winyo i kan ame gin oguro iye gonygi ni Jimri, otyeko poro kop i muŋ i kom abakagi te daŋ neko oko. Man te miyo mony keto Omri, ame rik obedo atel wi mony me bedo abaka me Icrael.

¹⁷Omri karacel kede monyere te ya oko i Gibeton, ote wot guro boma me Tirja.

¹⁸Kare ame Jimri oneno ni mony doŋ otyeko mako boma oko, en te wot tyelo i ot abaka ame ogero atek, te waŋo oko, en en daŋ te to iye kuno.

¹⁹Man otimere pi bale re ame en onwoŋo otimo baŋ Rwot. En daŋ onwoŋo otimo bal ame rom aroma kede me a Jeroboam; pi bale re en ikome pi miyo jo Icrael timo bal.

²⁰Kop i kom ginnoro luŋ ame Jimri otimo a mom ocoo kan, medo kede koppere me poro kop i kom abaka imuŋ, gin luŋ tye ocoo i buk me Tekwaro ame tito kop ikom oloc me Icrael.

²¹I kare-nono jo Icrael te cako pokere oko idul aryo; jo ocele onwoŋo mito ni myero oket Tibni wot a Ginat en ame bed abaka, eka jo ocele te mito Omri.

²²Cite jo ame onwoŋo mito Omri te loyo jo onwoŋo mito Tibni wot a Ginat oko; Tibni te daŋ to oko, eka Omri te bedo abaka a jo Icrael.

²³Omri doŋ te bedo abaka me Icrael i mwaka me pyeradek wie acel me loc Aca abaka me Juda, en te bedo aloc a jo Icrael pi mwakki apar wie aryo. Pi mwakki abicel me agege en obedo i Tirja.

²⁴En rik te wilo Camaria i baŋ lo ame olwoŋo ni Cemer, kun culo lim me ryal ame romo tutumia abicel pire. En rik te celo kidi-nono oko atek odoco, te cako nyiŋe ni Camaria, bala nyiŋ Cemer ame rik en won kannono.

²⁵Bal Omri te bedo adwoŋ atek i nyim Rwot ame kato bal obakki luŋ ame otelo nyime.

²⁶En daŋ omio akemo omako Rwot Obaŋa me Icrael bala abaka Jeroboam pi ballere en ikome kede pi miyo jo Icrael doko jo ame woro cal jogi,

²⁷Kop i kom ginnoro luŋ ame Omri otimo a mom coo kan, lweny ame en olwenyo ame nyuto tek cunye, gin luŋ tye ocoo i buk me Tekwaro ame tito kop i kom oloc me Icrael.

²⁸Omri oto te wot weo karacel i kwari mere, ote yiko kome i Camaria. Wode Akab en ame te leyo kakare.

²⁹I mwaka me pyeradek wie aboro me loc Aca abaka me Juda, en ame Akab wot Omri ocako loyo kede jo Icrael; en oloogi pi mwakki pyeraryo wie aryo kun bedo i Camaria.

³⁰Bal Akab wot Omri te bedo adwoŋ meicel i nyim Rwot ame ka to me obakki luŋ ame otelo nyime.

³¹En calo oneno ni timo bal ame rom aroma kede me a Jeroboam wot a Nebat mom rome, omio en dok onyomo Jejebel, nyaka Etibaal, abaka me Cidon, te daŋ dok cako woro Baal-gu

³²En ogero ot me woro Baal i Camaria, ogero keno lam a Baal, te keto i ot ame ogero pire.

³³Dok otio cal jok a dako ame olwoŋo ni Acera kun medo timo bal apol areco ame kato obakki luŋ me Icrael, ame mio akemo mako Rwot Obaŋa me Icrael.

³⁴Dok i kare ame en tye ka loc, en ame Kiel me Betel ogero kede Jeriko doki. Wode me kao ame nyiŋe Abiram rik te to i kare ame en cako gero acakki me Jeriko, eka atinnere me cogo Cegub te to i kare ame en gero dogcel me Jeriko, kite ame rik Rwot omio Yocwa wot a Nuni okobo kede.