Read lango 1 Obakki 17 Bible Online

1 Obakki 17 - lango bible

1 Obakki 17

¹I kare-nono adwarpinnyoro ame nyiŋe Elia, ame obedo dano me Ticbe ame tye i Gilead, rik te kobbi abaka Akab ni, “Kite acalo Rwot Obaŋa a jo Icrael tye kwoni, ame en Obaŋa ame an aworo, atitti atira ni kot kede toyo bino bedo mom pi mwakki adek abino anyim, tuno waŋ ame an dok akobo.”

²Rwot rik te kobbi Elia ni,

³“Ya oko i kan iwot tutuŋ kide, me iwot ipon kuno i ŋet kulo me Kerit, ame tye tutuŋ kide me kulo Jordan.

⁴Yin ibino mato pii i kulonono, dok daŋ atyeko ciko agak me kelli cam kuno.”

⁵Elia te cako wot kite ame Rwot okobbe kede; en te wot bedo i ŋet kulo me Kerit ame tye tuŋ kide me kulo Jordan.

⁶Agakkogo te cako tere cam kuno, kun otero odiko kede otyeno. En onwoŋo mato pii ame ya i kulo me Kerit.

⁷Icennere pii i kulonono te dwono oko, pien kot onwoŋo mom doŋ cwe i lobo nono.

⁸Rwot te kobbi Elia ni

⁹“Ya iwot i Jarepat, ame ceggi i Cidon, me iwot ibed kuno. Nen ba, atyeko ciko dako moro a cware oto ame tye kuno, me miyi cam.”

¹⁰Elia te ya malo wot naka i Jarepat. I kare ame en doŋ ceggi i dogcel me boma, en te neno dako moro a cware oto tye arayo yen. En te kwayo dako-nono ni, “Tim ber ba ikella pii moro i gwata me amati.”

¹¹I kare ame dako-nono ocako wot me kelo pii. Elia dok te medo kobbe ni, “Tim ber ikella daŋ cammoro aduno.”

¹²Dako-nono te gamo kun kwoŋo akwoŋa ni, “Amaa, kite ame Obaŋani tye kwo-ni, ginnoro me acama mom tye baŋa kadi acel. Atye kom ka i moko kwon aduno moro i gulo moko kwon kede moo tedo aduno moro i te tabo. Aman an abino kan rayo yen ni atot ya ayik kede moro aduno ame roma kede woda keken, daŋ mannono doŋ me agikki, eka wan ote kuro giwa ka to.”

¹³Elia te gamo ni, “Kur ilwor, dako, yin wot iyik cem kit ame ikobonono, cite myero koŋ ige dolo kwon aduno ikella eka ite doŋ dok yiko megwu.

¹⁴Pien Rwot Obaŋa me Icrael ocika ni, ‘Moko kwon gire mom bino tum i gulu moko kwon, moo daŋ mom bino tum i tabo moo, tuno waŋ ame en Rwot omio kot ocwe i lobo.’ ”

¹⁵En te wot yiko cam kite ame Elia onwoŋo okobbe kede; gin gigi te medde bedo i cam ame romogi pi kare alac,

¹⁶kun moko kwon mom tum i gulu moko kwon, moo daŋ mom tum i tabo moo, kite ame Rwot onwoŋo okobo kede baŋ Elia.

¹⁷I nino moro acel two te mako wot a dako-nono, two-nono te bedo medde ameda, tuno waŋ ame kwo atin te tum oko.

¹⁸Dako-nono te kobbi Elia ni, “Ama dano Obaŋa, kara itimo aman piŋo ba? Yin ibino kan wek ipoyo wi Obaŋa i kom bal acon ame yam abedo timo, me atinna to oko?” Elia te gamo ni,

¹⁹“Tiŋ wodinono ikel baŋa kan.” Elia te gamo atin i ciŋe en te pyelo atin i wi tanda mere.

²⁰Elia te cako kwayo Rwot ni, “Ama Rwot Obaŋa, yin en a dok ikelo can i kom dako-ni ame an abedo baŋenie, yin en ineko wode?”

²¹Elia te cako buto aryeba cuny i kom atin tyen adek kun kwao Rwot ni, “Ama Rwot Obaŋana, tim ber idwoggo kwo atin man baŋe ba.”

²²Rwot te winyo kwac Elia, te miyo kwo atin dwogo cen ikome, te doŋ cako weo.

²³Elia te tiŋo atin iyi icika imalo kuno, te dwogo kede piny baŋ tottere, te miyo baŋ tottere. Elia te kobbe ni, “Nen, wodi doŋ tye kwo.”

²⁴Dako-nono te kobo baŋ Elia ni, “Aman an doŋ aniaŋ atira ni yin ibedo dano Obaŋa, dok daŋ Rwot gire kobo kedi ateteni.”