Read lango 1 Obakki 18 Bible Online

1 Obakki 18 - lango bible

1 Obakki 18

¹Icennere a doŋ kare okato alalac, i mwaka me adekkere, Rwot te cako kobbi Elia ni, “Wot inyutte keni baŋ abaka Akab; an doŋ abino cwayo kot i lobo.”

²Elia te cako wot me wot nyutte kene baŋ Akab. I karenono onwoŋo kec okur atek i Camaria.

³Akab rik te lwoŋo Obadia ame onwoŋo en adwoŋ ame loo jami me ot abaka. Obadia onwoŋo rik obedo lo ame tye i woro adwoŋ meicel baŋ Rwot.

⁴I kare ame rik Jejebel neko iye odwarpiny a Rwot, en otero odwarpiny mia acel te wot kanogi i gorogoro kun kano pyerabic pat kede pyerabic ocele daŋ pat, eka te bedo terrigi cam kede pii.

⁵Akab te kobbi Obadia ni, “Owot koŋ owot obe bea i lobo luŋ, kun oŋiŋio kan a pii yam tye iye luŋ, gwok onyo otwero nwoŋo kannoro onyo cuny kulo moro ame tye iye lum, atot ya aguragura kede kanewa kur to, me leyiwa mogo bed kwo.”

⁶Gin te poko kabedo ame ŋat acel acel i akinagi bino wot iye, eka ote pokere doŋ, kun Akab dok mero pat, Obadia daŋ mako mere yo apat.

⁷I kare ame Obadia doŋ tye iyo, en orwatte gin Elia. Obadia te ŋeyo Elia oko, te ryebere piny i nyime, kun kobbe ni, “Man mom yin adwoŋŋa Elia?”

⁸Elia te gamo ni, “Ee an Elia ennono. Wot ikobbi adwoŋŋi abaka ni an atye kan.”

⁹Obadia te gamo ni, “Gin aŋo kara ame abalo ba, adwoŋŋa, ame omio yin imito miya i ciŋ abaka Akab ni neka-ni?

¹⁰Akwoŋo akwoŋa i nyimi ni, kite acalo Rwot Obaŋani tye kwo-ni, mom tye lobo moro i wi lobo ame mom abaka Akab ocwao iye dano me wot yenyi. Kare luŋ ka onwoŋo odwoggo kop baŋe ni mom onwoŋo, en pwod mito ni aloc me lobo-naca kono okwoŋo akwoŋa ni mom doŋ otwero nwoŋi i lobo mere.

¹¹Cite nen yin dok ikobo ni an awot akobbi adwoŋŋa abaka ni yin itye kan.

¹²Kara ka kono i kare ame an dok awoto oko eka Cuny a Rwot te kwanyi teri oko teŋe kan ame mom dok oromo nwoŋo kono? koŋ inen, ka onwoŋo an doŋ akobbi abaka Akab ni yin itye kan, eka en mom te bino nwoŋi, mom en bino neka oko? Yin myero ipo ni an abedo ŋat ame woro Rwot cakere i kare me tinona.

¹³Yin mom iwinyo ce ni i kare ame Jejebel neko odwarpiny a Rwot, an abin akano odwarpiny mia acel, kun akano pyerabic pat kede pyerabic pat, dok daŋ ate bedo pitogi i cam kede pii me amata?

¹⁴Man mio ka yin dok icwaa baŋ abaka me wot kobbe ni yin itye kan, en bino neka gire oko.”

¹⁵Elia te gamo ni “Kite ame Rwot me mony ame an aworo tye kwo-ni, an ikoma en ame doŋ tin abino nyutte i nyim abaka Akab.”

¹⁶Obadia doŋ te cako wot baŋ abaka Akab, te wot titte, eka Akab te cako wot me wot rwatte gin kede Elia.

¹⁷Kare ame Akab oneno kom Elia, en okobo ni, “Aa, yin enu, ame itye ka kelo ayela iyi Icrael-li?”

¹⁸Elia te gamo ni, “An gira mom atye ka yelo jo Icrael, yin en akel ayela, karacel kede jo me doggola a pappi, pien yin mom itye ka lubo cik a Rwot dok daŋ iworo cal jogi a Baal.

¹⁹Aman yin myero icwa kop baŋ jo Icrael luŋ me gin bin rwatte keda i wi kidi me Karmel. Kel daŋ odwarpiny a Baal mia aŋwen kede pyerabic kuno karacel kede odwarpiny Acera mia aŋwen, ame gin jo ame nwoŋo kony i ciŋ agoŋŋi Jejebel.”

²⁰Abaka Akab te cwayo kwena lwoŋo jo Icrael luŋ karacel kede odwarpiny i wi kidi me Karmel.

²¹Elia te ya wot baŋ lwak, te kobbigi ni, “Kara ibino wunu medde bedo i tam aryo i cunywu naka awene? Ka ce Rwot en Obaŋa, wore wunu, aco ka ce Baal en obedo Obaŋa,” wore wunu, “Cite lwak mom te kobbe ginnoro.”

²²Elia te kobbi lwak ni, “An adwarpiny a Rwot en doŋ adoŋ kan an kena, kun odwarpiny a Baal tye kan mia aŋwen kede pyerabic twal.

²³Koŋ doŋ ikel wunu twoni aryo kan; odwarpiny a Baal yer twon acel me yalo obaŋagi, nek twonnono ote ŋiŋido atitino, gin te cano riŋogi-nono i wi yen, ento mom ote moko mac iye. An daŋ abino neko twon acel odoŋ, ate cano daŋ i wi yen, mom daŋ abino moko mac iye.

²⁴Odwarpiny a Baal myero kwa obaŋagi, an abino kwayo Rwot; doŋ Obaŋa ame bino dok i kwacwa-nono i cwayo mac i kom riŋo ame ocano ikeno, mannono en ame obedo Obaŋa me ateni.” Lwak te wo ni, “Koppi-nono ber.”

²⁵Elia te kobbi odwarpiny a Baal ni, “Kite acalo wun ipol wunu, wun ge yero wunu twon acel iyik wunu. Kwa wunu obaŋawu, cite myero kur imok mac i kom yen.”

²⁶Gin daŋ ote gamo twon ame omiogi ote yiko, ote cako kwayo Baal ca kere odiko naka i cuny dyeceŋ, kun okobo ni, “Ama Baal, gam ba kwacwa-nie!” Cite piny omedde liŋ aliŋa kun mom owinyo dwon ŋattoro ame gamo doggi, akadi dok i kwacgi. Gin te bedo myel kun omano keno lamgi ame ocano-nono, cite ginnoro mom omedo timere.

²⁷Elia doŋ te cako nyerogi oko caa abicel me dyeceŋ, kun kobbigi ni, “Kwa wunu atek ba! Obaŋa gire ennono! Onyo ca en pwod tye atamo, onyo tye akonyere, onyo pwod olato kannoro, aŋar ca onino oko, doŋ pi mannono myero ired wunu atek me icoe wunu.”

²⁸Odwarpiny te redo atek me kwayo obaŋagi kun oŋoŋolo-gu komgi i pala bat kede atero-gu acalo kitegi me kare ducu; obedo timo amannono naka remo omedo cwer i komgi.

²⁹Gin te medde ameda i redo kun daŋ otyeto-gu, tuno naka i caa aboŋwen me otyeno, ame en caa me yalo Rwot, cite piny omedde liŋ aliŋa aboŋo dwonnoro ame winyere, akadi ŋattoro ame gam doggi.

³⁰Icennere Elia doŋ te kobbi lwak ni, “Biye wunu ceggi baŋa kan.” Lwak luŋ te nyiko baŋe. En te cako yiko keno lam a Rwot ame rik onwoŋo omuko oko.

³¹Elia te kwanyo gweŋe apar wie aryo, kun poro wel atekere awobe a Yakobo ame kop a Rwot rik obino baŋe ni, “Nyiŋi doŋ bino bedo Icrael.”

³²En te doŋ cako cano keno lam a Rwot kun tio kede kiddi ame etiŋonono, te kunyo bur mano keno lammono luŋ, ame tut ame romo pii me debe acel twal.

³³Kare ame en doŋ otyeko cano yennere aber i kom keno lam, oŋiŋido riŋo twon, te cano i wi yen. En te kobbi lwak ni, “Twom wunnu pii poŋ gulli aŋwen-ni ite coro wunu luŋ i kom mot ame ayalo kede Rwot kede i kom yen.” Gin daŋ te timo kite ame en okobo.

³⁴En dok te kobbigi ni, “Dok imed wunu.” Gin daŋ dok ote medo timo kittono. Elia te kobbigi ni, “Dok imed wunu.” Gin dok te medo onyo pii i kom mot tyen me adek.

³⁵Pii ame gin oonyo-nono te mol romo keno lam luŋ, te daŋ poŋ bur oko.

³⁶A doŋ caa me otyeno oromo, Elia ame adwarpiny ocuŋ ceggi i ŋet keno lam, te kwayo Rwot kun kobo ni, “Ama Rwot Obaŋa Iburaim, Obaŋa Icaka kede me Icrael, mi doŋ tin ŋeye kannaler ni yin en ame ibedo Obaŋa iyi Icrael, dok ni an abedo amironi ame tio piri, dok atio man luŋ pi lubo kop-pi.

³⁷Tim ber igam kwacca-ni Ama Rwot, tim ber igam kwacca ba, me lwak man ŋe ni yin gire en ame ibedo Obaŋa yin keni, dok daŋ itye ka dwoggogi cen baŋi.”

³⁸Rwot te cwayo mac i kom mot me yale, te waŋo mot me yale oko karacel kede yen, kede kiddi ame onwoŋo ocano i keno lam kede kwoyo ame onwoŋo tye kaci-naca, eka pii ame onwoŋo opon bur te daŋ two oko iweŋ.

³⁹Kare ame lwak luŋ oneno man, gin luŋ ote rette oko piny aryeba cuny, kun okobo ni, “Rwot gire en ame obedo Obaŋa, Rwot gire en ame obedo Obaŋa.”

⁴⁰Elia te kobbi lwak ni, “Aco doŋ mak wunu odwarpiny a Baal luŋ, kur iwek wunu moro puti.” Lwak te makogi luŋ, eka Elia te terogi i kulo me Kicon, te wot nekogi luŋ kuno.

⁴¹Elia te kobbi Akab ni, “wot doŋ icem daŋ imat pii, pien dwon kot ame abino cwe doŋ tye aŋur awinyere baŋa.”

⁴²I kare ame abaka Akab awot cem, Elia te yito malo i wi kidi me Karmel, en te wot rumo kulo wie piny rwako iyi akina coŋe.

⁴³Elia te kobbi omiro mere ni, “Koŋ iwot inen tutuŋ nam.” Amiro mere daŋ te wot amannono tyen abiro.

⁴⁴I tyen me abiro mere, en te dwogo kobbi Elia ni, “Anene pol olyero aduno moro i tuŋ nam ame rom i cuny ciŋ.” Elia, te cwayo amiro mere ni wot kobbi abaka Akab ni yit i wi gadigadi mere ŋwec paco kun kot mom ru oŋoli.

⁴⁵Cite piny te ru cido oko oyotoyot, yamo daŋ te cako kodo, eka kot te cako cwe oko atek meicel. Akab te yito i wi gadigadi mere te cako riŋo me dok i Jejreel.

⁴⁶Cite teko a Rwot onwoŋo tye i kom Elia, en te tweyo pyere atek, te riŋo telo nyim abaka Akab naka i dogcel me Jejreel.